Ótken aptada Qazaqstan parlamenti Jańa eńbek kodeksiniń jobasyn maquldady. Jaqyn kúnderi eńbek qatynastaryn retteıtin bas qujatqa Elbasy qol qoıady. Bul týraly «Qamshy» portaly habarlaıdy.
Jańa kodekste daǵdarys jaǵdaıyndaǵy eńbek qatynastary arqaý bolǵan máseleler enip otyr. Eń aldymen eńbek kelisim-shartyna ózgerister engizý tártibiniń jeńildetilýin aıtýǵa bolady. Jańa qujatta jumys berýshige qarjyny únemdeý maqsatynda jumysshylardy qysqartýdyń ornyna tolyq emes jumys ýaqytyna kóshý nemese jumyskerdi basqa jumysqa aýystyrý múmkindigi berilgen. Jumys oryndaryn saqtap qalý maqsatynda kásiporyn toqtap turǵan ýaqytta jumysshylardy aýystyrý merzimi burynǵy bir aıdyń ornyna kásiporyn toqtap turǵan tolyq merzimge aýystyrylǵan. Sondaı jaǵdaılarda jumys berýshige qyzmetkerin densaýlyqqa zıan keltirmeıtin kez-kelgen bos laýazymǵa aýystyrý quqyǵy berilgen.
Sondaı-aq, qujatqa jumys berýshiniń bastamasymen eńbek kelisim-shartyn buzýǵa negizdeme engizilgen. Iaǵnı, kelisim-shartty toqtatýǵa «óndiris, atqarylatyn jumys pen kórsetiletin qyzmet kóleminiń kemýi, sonyń saldarynan uıymnyń ekonomıkalyq jaǵdaıy tómendeýi» jumys berýshi taraptyń kelisim-shartty doǵarýyna negiz bolmaq. Alaıda, jumysshy bul týraly bir aı merzim buryn eskertilip, bir aılyq ortasha eńbekaqy kóleminde járdemaqy ala alady.
Sonymen qatar, jumys berýshi zeınet jasyna jetken jumysshymen kelisim shartty buzý, kez kelgen kategorıadaǵy jumyskerlerge synaq merzimin belgileý syndy qosymsha quqyqtarǵa ıe bolyp otyr.
Eńbekaqy taǵaıyndaý, tóleý máselelerine de jańa kodeks birqatar jańalyq ákelmek. Kodekste jumys berýshiniń óz erkimen, jumyskerlerdiń usynysymen jalaqy taǵaıyndaý, tóleý erejeleri usynylǵan.
Alaıda, kodeks avtorlary munda kásipodaqtardyń ókilettigi keńeıtiledi degenmen, sol kásipodaq uıymdarynyń birshamasy jańa kodekske qarsylyq tanytyp otyr. Túrli saladaǵy kásipodaqtardyń basyn qosqan Qazaqstan kásipodaqtar federasıasy (QKF) «Jańa jobada jumysshynyń jumys berýshi erkine táýeldi bolyp qalǵanyn, jumys berýshige kelisimshartty óz qalaýymen uzartýǵa, qaıta jasaýǵa, synaq merzimindegi jumysshyny jumystan shyǵarýǵa quqyq berilgenin, jas mamandar, múgedekter quqyǵy qamtylmaǵanyn, jumys berýshiniń «ekonomıkalyq sebepter» degen bulyńǵyr ýájben jumysshyny jumystan bosatý quqyǵy bekitilgenin, jumys ýaqytynan tys eńbektiń aqysy qysqarǵanyn, jumys berýshiniń jalaqy kólemin ózi taǵaıyndaı alatynyn, jumys berýshige ujymdyq sharttaǵy jalaqy ındeksasıasyn ózgertýge quqyq berilgenin, kásipodaqtardyń eńbek zańynyń buzylmaýyn qadaǵalaý quzyry qaralmaǵanyn» aıtyp, mundaı jobaǵa qarsy ekenin málimdedi. Tipti, Mańǵystaý oblysyndaǵy iri kásiporyndar jumysshylarynyń basyn qosqan 16 kásipodaq basshylary jańa kodekske qarsylyqtaryn jazyp Prezıdent pen Premer-mınıstrdiń atyna hat ta joldaǵan.
Sonymen, qoǵamda túrli pikirlerge arqaý bolǵan jańa Eńbek kodeksiniń jobasy Parlamentte maquldandy. Daýly máseleniń sońǵy núktesin Prezıdenttiń ózi qoıady.
Darhan Muqan
