«Abaı murajaıynyń kitaphanasy» serıasymen «Abaı týraly estelikter» jınaǵy taǵy da jaryq kórdi. Abaı ómir súrgen ortada kún keshken, aqynmen aralas-quralas bolǵan, kózin kórgen adamdardyń estelikteri – uly aqynnyń ómiri men shyǵarmashylyǵyn, adamdyq tulǵasyn zertteýde mol aqparat beredi. 1940 jyly Semeı qalasynda Abaı murajaıyn ashý týraly arnaıy qaýly shyqqannan bastap uly aqynǵa qatysy bar eksponattar jınaý jumysy bastaldy. Zattyq jádigerlermen qatar sol kezde kózi tiri Abaıdyń zamandastary, urpaqtarynan bar bilgen estelikterin, shyǵarmalaryn jınaý jumysyn sonaý 40-jyldary Abaıdyń nemere inisi Árham Kákitaıuly Ysqaqov bastaǵan bolatyn. Ol elden jınaǵan estelikter, shyǵarmalar qoljazbalary bir tóbe bolsa, óziniń estelikteri de qazirgi kúnde qundy jádigerler qatarynda. Estelikterde Abaıdyń boıyndaǵy aqyndyq óneri men mashyqtary, minez-qulyq erekshelikteri, óz ortasymen qarym-qatynastary qyzyqty túrde baıandalady. Jınaqqa Abaıdyń memlekettik qoryq-murajaıynyń qoljaz­balar qorynda saqtalǵan Árham Kákitaıulynyń, Turaǵul Abaıulynyń, Kókbaı Janataıulynyń, Qasen Qusaıynov­tyń, Músiráli aqsaqaldyń, Dáýletıar Stambektiń, Nıazbek Aldajarovtyń, Ahat Shákárimulynyń estelikteri toptastyrylǵan. Kitap Abaı Qunanbaıulynyń ómir­baıany men shyǵarmashylyǵyn tereńdep tanýǵa qyzyqqan zertteýshiler men ádebıettanýshylarǵa, magıstranttar men stýdentterge, mektep muǵalimderi men oqýshylaryna, jalpy qalyń oqyrmanǵa arnalǵan. Meıramgúl Qaırambaeva