Almatyda ótetin 2017 jylǵy qysqy Ýnıversıada búdjeti eki esege qysqartyldy. Bul týraly «Qamshy» portaly Tengrinews.kz –ke silteme jasap habarlaıdy.

Ýnıversıada búdjetindegi ózgerister týraly sharaǵa daıyndyq barysy aıasyndaǵy Otandyq ónim óndirýshilerdiń yntymaqtastyq forýmy kezinde Uıymdastyrý komıtetiniń dırektory Áset Ábdýalıev aıtty.

Onyń aıtýynsha, búdjettiń qysqarýyna baılanysty uıymdastyrý komıteti 32 mıllıard teńgeden qysqartý jasady. "Sońǵy aıda Ýnıversıada búdjeti eki esege, 17 mıllard teńgege deıin qysqardy. Biz sportqa qatysy joq birneshe shyǵyndy qysqarttyq. Eń aldymen, Ýnıversıadanyń ashylý jáne jabylý saltanatyna bólingen qarajat 1,2 mıllard teńgege qysqartyldy. Ashylý, jabylý saltanaty bolady, degenmen qysqarǵan formatta ótedi", - dedi Ábdýalıev.

Uıymdastyrý komıtetiniń málimetinshe, "Ýnıversıada Mádenıeti" jobasy, halyqaralyq PR jáne marketıńke 1,5 mıllard teńgege qysqartý jasaldy. Bir mıllıard teńge kólik shyǵyndarynan qysqartyldy. "Kólikterdi satyp almaımyz, jalǵa alatyn boldyq. Sharanyń daıyndyǵyn kórýge bólingen qarajatty 500 mıllıon teńgege qysqarttyq", - dedi dırektor.

Aıta keteıik, endi shara 53 mıllıon evroǵa ótkizilgeli otyr. Salystyra ketsek, Ýnıversıada-2011 ótkizý úshin Túrkıa 83 mıllıon evro jumsady, Qytaıda 2009 jyly 105 mıllıon evro jumsaldy, al 2013 jyly 500 mıllıon evro jumsaldy.

"Ákimdik bizge úsh naqty tapsyrma berdi. Birinshisi - Ýnıversıadany joǵarǵy deńgeııde ótkizý. Ekinshisi - qarajatty barynsha únemdeý. Iaǵnı, osy bólingen búdjetti biz únemdeýge tyrysamyz. Úshinshi tapsyrma - iri korporatıvti demeýshilerdi tartý arqyly bılet jáne lısenzıalanǵan ónimderdi satý", - dep sózin aıaqtady Áset Ábdýalıev.

Almaty ákimi Baýyrjan Baıbektiń aıtýynsha, Ýnıversıada halyqaralyq standarttarǵa sáıkes ótkiziledi. "Mindetti túrde oryndalýy tıis talaptar bar. Bul - FISU (Stýdenttik sporttyń halyqaralyq federasıasy). Biz quny jaǵynan eń tómengi standarttardy aldyq. Satyp alǵansha, keıde jalǵa alǵan durys. EKSPO-ǵa alynǵan zattardy paıdalanamyz. Degenmen ol halyqaralyq standartqa sáıkes bolady", - dedi B. Baıbek.