Almatylyq fermer Aıtjan  Tyńálıev eki jyl buryn etti baǵyttaǵy qara maldy ósirýmen aınalysatyn sharýa qojalyǵyn qurdy. Qaratal aýdanyndaǵy «Altynbaı» sharýa qojalyǵynda 90-nan astam bas iri qara bar, - dep habarlaıdy «Qamshy» portaly QazAqparatqa silteme jasap.

Fermer isin 20 bas iri qara ósirýden bastady. Oblystaǵy jaǵdaıdy zerttep, osy baǵytty damytýǵa bel baılady. Ótken jyly sharýa qojalyǵy 40 bas qazaqtyń aqbas sıyryn, bıyl taǵy 21-in satyp aldy.

«Bıznestiń jol kartasy-2020» baǵdarlamasy boıynsha «Altynbaı» sharýa qojalyǵy memlekettik qoldaýǵa qatysýdyń arqasynda mal asyraıtyn qoralary men ǵımarattaryn qalypqa keltirdi.  

«Asyl tuqymdy maldy ósirý úshin veterınarlyq jáne sanıtarlyq talaptarǵa sáıkes oryn qajet.  «Damý» qorynyń kómegine júginip, bankten nesıe aldyq. Ǵımaratty qalpyna keltirý úshin 5 mln teńge nesıe rásimdedik. Nesıeniń paıyzdyq mólsherlemesiniń 7 paıyzyn memleket óteıdi, bul tıimdi» - dedi Aıtjan Tyńálıev.

Fermer óz qarajatyna 50 bas iri qaraǵa arnalǵan mal jemdeıtin oryn saldy. Qysqa shóp ázirledi. A. Tyńálıevtiń mal basyn 290-ǵa jetkizý jospary bar.