Qytaıda qazaqtyń ulttyq kıimderin daıyndaý qolǵa alynda, - dep habarlaıdy «Qamshy» portaly 24.kz telearnasyna silteme jasap.
Telearna tilshileriniń málimetinshe, osyndaı mektep ashylyp, ony aıaqtaǵandarǵa arnaıy kýálik beriledi ári turaqty jumyspen qamtylady. Búginge deıin dál osylaı júzden astam órimdeı jas osy mekteptiń túlegi atanǵan. Shaǵyn sheberhana, qyzý qarbalas jáne ulttyq kıimder. Syrttaı qaraǵanda Qytaıda keńinen etek jaıǵan tigý sehtarynyń biri sıaqty. Bir ereksheligi bul shaǵyn sheberhananyń arnaıy kásiptik mektep degen ataýy bar. Iaǵnı ony aıaqtaǵan mamandar aımaqtaǵy fabrıkalarǵa jumysqa ornalasady. Tipti, jeke kásibin ashyp alǵandary da bar. Qazaq ulttyq kıimderin daıyndaý mektebiniń dırektory Jeńisgúl Nurdanaqynqyzynyń aıtýynsha, oqýshylar úsh túrli baǵytpen tárbılenedi. "Birinshisi - osy mektepten shyqqan qyz-kelinshekterdi oqý ordamyzda alyp qalý. Ekinshisi - osy mamandyq boıynsha aýyldardan, eldi mekenderden kásip asha alady. Úshinshisi - elimizdegi jáne sheteldegi osyndaı iri kásiporyndarǵa jumysqa ornalastyrý", - dedi Nurdanaqynqyzy.
Ónimder tek Qytaıda emes, Mońǵolıa, Qazaqstan, Túrkıaǵa da jiberiledi. Budan bólek, dál osy ortalyqta daıyndalatyn kıim-keshekter men kıiz úılerge murajaılar tarapynan tapsyrys joǵary. Kıiz úı demekshi, ujym aldaǵy jyly dál osyndaı etnopark ashpaqshy. Bul maqsatta jergilikti bılik segiz gektar jer bóldi. Ol jerde 22 túrli 100 kıiz úı boı kóteredi. Al Qulja qalasyndaǵy qazaq ulttyq mýzeıiniń basshysy Áziráli Ámirtbekuly qazaqtyń úıi tek qara lashyq emes, taýdyń basyna tigiletin jaılaýdaǵy úı ǵana emes, ol 22 túrge bólinedi deıdi. "Hannyń úıi, qarashanyń úıi degen sekildi. Al endi bizdiń maqsatymyz - sol 22 túrli kıiz úıdi aýyl retinde quryp, bizdiń mádenıetimizdi basqa ulttarǵa tanystyrý", - dedi tilshilerge bergen suhbatynda mýzeı basshysy.
Qazir ujym atalǵan etnopark elementterin jasaýǵa qyzý kirisip ketti. Kelesi jyldyń sońyna deıin demalys ári tanymdyq ortalyq buqaranyń qoldanysyna beriledi dep kútilýde. Budan bólek, qazaqtyń osy kıiz úıleri men ulttyq kıimderin jan-jaqty zerdeleý maqsatynda kásiptik mektep janynan arnaıy zertteý ortalyǵy uıymdastyrylmaq.
