Almaty qalasy Almaly aýdandyq soty Qazaqtyń S.Aspandıarov atyndaǵy Ulttyq medısınalyq ýnıversıtetiniń rektory A. Aqanovqa qatysty úkim shyǵardy. Bul týraly «Qamshy» portaly Zakon.kz-ke silteme jasap habarlaıdy.
Basynda laýazymdy tulǵa senip tapsyrylǵan iri kólemdegi múlikti ıemdený nemese talan-tarajǵa saldy dep aıyptalǵanymen, sot isti qyzmet babyn asyra paıdalaný babyna qaıta aýystyrǵan.
2008 jyldan beri ýnıversıtet rektory laýazymyndaǵy A. Aqanov memlekettik satyp alýlarǵa baılanysty daýǵa qalǵan. Atap aıtqanda, 2012 jyly ýnıversıtet pen «Flamıngo-9» JSHS arasynda 512 oryndyq ýnıversıtet jataqhanasy qurylysynyń jumysyn júrgizý týraly kelisim shart jasalǵan.
Qurylys aıaqtalǵan soń merdiger fırma úsh lıftini jáne tehnologıalyq qurylǵyny ornatpaı, atqarylǵan jumystar aktisine ýnıversıtet rektorynyń qolyn qoıǵyzyp, nysandy ótkizgen. Sol arqyly ýnıversıtetke 48997054 teńge shyǵyn kelgen.
Aqshany alǵan merdiger ol qarajatty jumysshylardyń eńbekaqysyna emes, nesıe tóleýge jumsaǵan. Al, 2013 jyly jobalyq-smetalyq qujattar ózgerýine baılanysty jataqhana qurylysy aıaqsyz qalǵan.
Sotta rektor óz kinásin moıyndady, biraq, qarajat jymqyrý deregin joqqa shyǵardy. JSHS basshysy lıftini keıin ornatýǵa ýáde berip, banktegi nesıeni tóleý úshin qarajatty aýdarýdy suraǵanyn aıtty.
Sondaı-aq, aǵymdaǵy jyldyń jaz aıynda merdiger fırma men ýnıversıtet arasynda bebit kelisim jasalyp, JSHS jarty jyl ishinde 48997054 teńge kólemindegi qurylǵylardy ornatyp berýge mindetteme alǵan.
Osy sebepterge baılanysty medısınalyq ýnıversıtet ókilderi Aqanovqa esh narazylyqtary joq ekenin aıtyp, sýdıadan ony bas bostandyǵynan aıyrmaýdy surady. Prokýror da aıyptalýshynyń qylmysynn QK-niń 307-baby, 2-bólimine (qyzmet babyn asyra paıdalaný) aýystyrýdy usyndy.
İstiń mán-jaıyn qaraǵan sýdıa Aqanovty QK 307-baby 2-bólimi boıynsha aıypty dep tanyp, oǵan 2000 AEK ( 3 964000 teńge) aıyppul salý týraly úkim shyǵardy. Sondaı-aq, sottalýshyǵa 7 jyl merzimge deıin memlekettik qyzmetpen aınalysýǵa, jergilikti basqarý organdarynda qyzmet etýge tyıym salyndy. Endi rektor atalǵan somany úkim kúshine engen soń úsh táýlik ishinde memleketke tóleýi tıis.
Osyǵan qaramastan, aıyptalýshynyń qorǵaýshylary appelásıalyq shaǵym daıyndap jatqandyqtaryn aıtqan.
