Túrkıa prezıdenti Rejep Taıyp Erdoǵan AQSH prezıdenti Barak Obamamen reseılik Sý-24 ushaǵyn atyp túsirgennen keıingi shıelenisti báseńsitý qajettigine kelisti. Bul týraly «Qamshy» portaly Azattyqqa silteme jasap habarlaıdy.
Túrkıa prezıdenti baspasóz qyzmetiniń habarlaýynsha, Erdoǵan men Obama 24 qarashada ushaqtyń atyp túsirilýine baılanysty telefonmen sóılesken. Obama AQSH pen NATO da Túrkıanyń "óz egemendigin qorǵaý quqyǵyn" qoldaıtynyn bildirgen.
"Qos prezıdent shıelenisti báseńsitýdiń mańyzdy ekenin aıtyp, mundaı oqıǵalardyń qaıtalanýynyń aldyn alý sharalaryn jasaýǵa ýaǵdalasty" dedi Erdoǵannyń baspasóz qyzmeti.
Aq úı ázirge Obama men Erdoǵannyń sóıleskenine qatysty aqparat taratpady.
24 qarashada Túrkıa "eldiń áýe keńistigin birneshe ret buzdy, eskertýdi elemedi" dep Sırıamen shekarada Reseıdiń Sý-24 áskerı ushaǵyn atyp túsirgen. Ushaq Sırıa aýmaǵyna qulaǵan. Máskeý ushaqtyń Túrkıa áýe keńistigine kirgenin joqqa shyǵaryp, "bir de bir ret eskertý jasalmaǵanyn" málimdegen.
Reseı prezıdenti Vladımır Pýtın ushaqtyń atyp túsirilýin "qylmys" ári "tý syrtynan soqqy jumsaý" dep atap, oqıǵa Reseı men Túrkıanyń qarym-qatynasyna keri áser etetinin málimdegen.
Reseı qazan aıynan beri Sırıa prezıdenti Bashar Asad úkimetimen soǵysyp jatqan "Islam memleketi" (IM) ekstremıstik uıymy men basqa da kóterilisshilerge qarsy shabýyl bastaǵan.
NATO-ǵa múshe Túrkıa Asad bıligine qarsy jáne ol ótken jyldan beri AQSH bastaǵan koalısıamen birge Sırıa aýmaǵynda ótken jyldan beri IM-ge qarsy operasıalarǵa qatysyp keledi.
