10 jyldan keıin Qazaqstandaǵy mektepterdegi joǵary synyptarda qıyn pánder aǵylshyn tilinde oqytylady. Bundaı sharalar 2015-2020 jyldarǵa arnalǵan úsh tildi bilimdi damytýdyń Jol kartasynda belgilengen. Bul týraly «Qamshy» portaly QazAqparatqa silteme jasap habarlaıdy.
«Joǵary synyptarda aǵylshyn tilinde oqytý tórt pán boıynsha júrgiziledi, ıaǵnı ınformatıka, fızıka, hımıa jáne bılogıa aǵylshyn tilinde ótedi», - dedi Ortalyq komýnıkasıalar qyzmetindegi baspasóz máslıhatynda Y.Altynsarın atyndaǵy Ulttyq bilim akademıasynyń vıse-prezıdenti Marıam Muqatova.
Onyń sózine qaraǵanda, Jol kartasy aıasynda barsha deńgeıde úsh tildi bilimge kóshýdiń kestesi daıarlanýda. Osy oraıda joǵary synyptarda bilim berýdi aǵylshyn tiline aýystyrý kestesi de eskerilip otyr.
«2017-2018 oqý jylynda besinshi synypqa aǵylshyn tilin birinshi synyptan bastap oqyp kele jatqan balalar keledi. Aıta keteıik, 2013 jyly birinshi synyptyń baǵdarlamasyna aǵylshyn tili engizilgen bolatyn. Osy ýaqyttan bastap joǵary synyptarda aǵylshyn tilin oqytýǵa kóshýdiń daıarlyq kezeńi bastalady», - dep toqtaldy ol.
M. Muqatovanyń sózinshe, negizgi mektepte aǵylshyn tili sabaqtarynda atalǵan tórt pánniń materıaldary paıdalanylady. Besinshi synyptan bastap oqýshylar aǵylshyn tilinde osy pánder baǵytynda termınologıalardy oqıtyn bolady.
«Kestege sáıkes, 2022-2023 oqý jylynda aǵylshyn tilinde bilim berýge kóshý qazaq-túrik lıseıinde, halyqaralyq mektepterde, gımnazıalar men lıseılerde iske asyrylady. 2023-2024 oqý jylynda barsha bilim berý mektepterinde kóshý josparlanǵan», - dedi ol.
