Qazaqstan Ulttyq Banki Elbasynyń 2015 jyldyń 11 aqpanynda bolǵan Úkimettiń keńeıtilgen otyrysynda bergen tapsyrmasyna sáıkes «Ipotekalyq turǵyn-úı qaryzdaryn qaıta qarjylandyrý» baǵdarlamasyn bekitken edi. Alaıda, osy baǵdarlama oryndalmaı, memlekettik organdardyń ekinshi deńgeıli bankterge tisteri batpaı otyr. Osynyń kesirinen boryshkerler Elbasynyń tapsyrmasyna sáıkes berilýge tıisti jeńildikterge qol jetkize almaýda. Osyǵan jany ashyǵan Parlament Májilisindegi «Halyqtyq komýnıser» fraksıasy depýtat Aıqyn Qońyrovtyń bastamasymen Bas prokýror A.Daýylbaevtyń atyna saýal joldap, máseleniń oń sheshilýi úshin prokýrorlyq baqylaý jasaýdy ótingen. Ústimizdegi jyldyń 27 qazanynda bergen jaýap hatynda Bas prokýratýra baǵdarlamanyń «qarqyndy túrde iske asyrylýy boıynsha birqatar is-sharalar júrgizilip jatqandaǵy» týraly aıtqan. Alaıda, is júzinde olaı bolmaı, kóptegen boryshkerler Baǵdarlamaǵa qatysý múmkin emes ekendigine shaǵymdanýda. Bul - ekinshi deńgeıli bankterge qatysty naqty eshqandaı is-sharalardyń júrgizilmeı jatqandyǵynyń aıqyn aıǵaǵy.
Sóıtip, Bas prokýratýra, Ulttyq Bank, jergilikti atqarýshy bılik organdary – bári birigip, ózderiniń áreketsizdikteriniń saldarynan memlekettik Baǵdarlamanyń iske asyrylýyna tejeý bolyp otyr. Osyǵan oraı «Halyqtyq komýnıser» mynadaı naqty sheshimder usynady:
- Jergilikti atqarýshy bılik organdarynyń janynan qurylǵan Baǵdarlamanyń iske asyrylý barysyn baqylaıtyn qoǵamdyq komısıalardyń tóraǵasy etip arnaıy ýákiletti prokýrorlar taǵaıyndalsyn;
- Baǵdarlamany iske asyrý barysynda memlekettik organdar, Ulttyq Bank, ekinshi deńgeıli bankter, saıası partıalar men qoǵam arasyndaǵy ózara árekettesý tetigi qamtamasyz etilsin;
Sonymen birge «Halyqtyq komýnıser partıasy» atqarýshy, baqylaýshy jáne retteýshi memlekettik organdar tarapynan tolyq retteý jáne qoldaý bolǵan jaǵdaıda Baǵdarlamanyń moderatorybolýǵa daıyn ekenin aıtady.
Mine, osy usynystardy aıtyp, Májilistiń sońǵy plenarlyq otyrysynda depýtat Aıqyn Qońyrov taǵy da Premer-Mınıstr K.Másimov pen Bas prokýror A.Daýylbaevtyń atyna depýtattyq saýal joldady. Osydan bir nátıje shyǵa qoıýyna kúmánimiz bar, óıtkeni bizdiń memlekettik organdar jekemenshiktiń qolyndaǵy «dókeı kókelerdiń» ekinshi deńgeıdegi bankterine azýyn batyra almaıdy-aý...
Ádil BEKOV
