Búgin Senattyń jalpy otyrysynda palata spıkeri Qasym-Jomart Toqaev jıyndy bastamas buryn QR Prezıdentiniń «Qazaqstan jańa jahandyq naqty ahýalda: ósim, reformalar, damý» atty kezekti Qazaqstan halqyna Joldaýyna baılanysty óz pikirin bildirdi, - dep habarlaıdy «Qamshy» portaly QazAqparatqa silteme jasap.
Senat Tóraǵasy sóz basynda Elbasynyń Qazaqstan halqyna arnaǵan Joldaýyn el ómirindegi asa mańyzdy oqıǵa retinde atap ótti.
Onyń pikirinshe, Prezıdent álemdik ekonomıka men geosaıasatta qalyptasqan kúrdeli ahýalǵa taldaý jasap, jahandyq syn-qaterlerdi tabysty eńserýdiń týra jolyn kórsetip berdi.
«Álem elderi jahandyq daǵdarysqa tótep berý úshin barynsha talpynys jasap jatqan kezde Elbasy usynǵan bul strategıa elimizdiń damýynyń jańa deńgeıine baǵyttalǵan naqty baǵdarlama bolyp otyr. Ekonomıkalyq ósim, tabysty reformalar jáne turaqty damý bizdiń keshendi josparymyzdyń basty maqsattary bolmaq. Osyǵan baılanysty Prezıdent taıaý ýaqytta júzege asyrylýy tıis bes aýqymdy mindetti aıqyndap berdi», - dedi spıker.
Budan bólek, Q.Toqaev Memleket basshysynyń Joldaýyndaǵy negizgi baǵyttarǵa da toqtalyp ótti. Onyń paıymynsha, Prezıdent usynyp otyrǵan jańa áleýmettik saıasattyń túpki maqsaty - joǵary sapany qamtamasyz etý jáne naqty muqtaj adamdarǵa ataýly áleýmettik qoldaý kórsetý.
«Basqasha aıtqanda, budan bylaı memleket áleýmettik salada álsiz qorǵalǵan azamattardy qoldaýǵa jáne adam kapıtalyn damytýǵa barynsha den qoıylatyn bolady», - dedi spıker.
Osyǵan baılanysty Senat Tóraǵasy depýtattyq korpýs aldynda jaýapty jumystar turǵanyn aıtyp, mańyzdy mindetterdi oryndaý úshin kúsh-jiger salýǵa senim bildirdi.
