Keshe Almatydaǵy Ó. Joldasbekov atyndaǵy Stýdentter saraıynda Halyqaralyq «Qazaq daýysy» án baıqaýynyń qorytyndy kezeńi – Gala-konsert ótti.

Rýhty kóterip, sanany sergitetin án keshine aınalǵan konsertte qazylar alqasy jeńimpazdardyń esimin jarıalady.

Qazylar alqasynyń jan-jaqty talqysy men jankúıerlerdiń ınternet arqyly berilgen daýystary saralana kele Bas júldege taǵaıyndalǵan 1 mıllıon teńgelik syılyq saıystyń tórt kezeńinen de súrinbeı ótip, úzdik óner kórsetken eki qatysýshyǵa teńdeı bólinip berildi.

Sonymen, dástúrli ánderdi oryndaýshy Sáken Álimhan men estradalyq jas ánshi, baıqaýǵa Qytaıdan arnaıy kelip qatysqan Jannát Ádilhanqyzy «Qazaq daýysy» Halyqaralyq án baıqaýynyń Bas júldesine laıyq dep tanyldy.

Jınalǵan jurtshylyqqa saıys qatysýshylarynan basqa, «Alashuly» toby, «Qas saq» ulttyq etnografıalyq ansambli, Nurlan Alban, Nurbolat Abdýllın, Saıa Mahanbet, Oljas Abaev, Áset Esjan syndy ánshiler, Qytaıdan kelgen bıshi qyz Saıa Baqytqyzy án men bıden shashý shashty.

Mońǵolıadan kelip, baıqaýdyń aqtyq saıysyna qatysqan ánshi Qadyqan Manaıulyna qazaqstandyq kásipqoı boksshy Qanat Islam bastaǵan bir top azamat arnaıy aqshalaı júlde tapsyrdy.

Esterińizge salsaq, alty aıǵa sozylǵan án baıqaýynda barlyǵy 220 úmitker baq synap, qatysýshylardyń ónerin Ramazan Stamǵazıev, Erkin Shúkiman, Altynaı Jorabaeva,Móldir Áýelbekova, Ushqyn Jamalbek syndy elge tanymal ánshilerden quralǵan qazylar alqasy baǵalaǵan bolatyn.