Keshe Jambyl oblysy Qordaı aýdandyq soty Ermek Taıshybekovti 4 jylǵa bas bostandyǵynan aıyrdy. Bir qaraǵanda, «ultaralyq arazdyq týdyrdy» dep aıyptalǵan azamatqa berilgen jaza az sıaqty bolyp kórinýi múmkin. Óıtkeni, ol ult arazdyǵyn qozdyryp qana qoımaı Qazaq eliniń terıtorıalyq tutastyǵyna qaýip tóndirdi. Elimizdi terrtıorıalyq turǵyda bólshektep, Reseı Federasıasynyń quramyna qosýǵa shaqyrdy. Alaıda, separatıstiń jasaǵan qylmysy úshin jazadan qutylyp ketpeı az merzimge bolsa da túrmege jatqyzylýynyń ózi qazirgi jaǵdaıda ultshyldar úshin az jetistik emes.
Azattyq radıosynyń jazýynsha, sot Ermek Taıshybekovke sońǵy sóz sóıleýge ruqsat bergende, bir jarym saǵattaı sóılegen. Aıyptalýshy ózine qarsy qozǵalǵan istiń quramynda qylmystan buryn saıası astar basym ekenin aıtady. Sondaı-aq, ol óz sózinde «Qazaqstandy uly el dep sanamaımyn, biraq prezıdent Nursultan Nazarbaev – uly tulǵa. Nursultan Nazarbaev birlesken Qazaqstan-Reseı memleketiniń basshysy, al Vladımır Pýtıni arnaıy qyzmet basshysy bolǵany jón» dep málimdedi.
Shyn mánisinde, Ermek Taıshybekovtyń usynysy aqylǵa syımaıtyn usynys. Sondyqtan da, onyń N.Nazarbaevty birlesken Qazaqstan-Reseı memleketiniń basshysy bolsyn deýi – shekten shyqqandyq. Ásili, bul Prezıdenttiń mártebesin arttyra sóılep, jazamdy jeńildetem degen dámeden týǵan qylyq bolsa kerek. Ári-beriden soń, Taıshybekov logıkasyna súıenip, sondaı jaǵdaı bola qaldy degenniń ózinde «arnaıy qyzmet basshysy» orta azıalyq eshbir saıasatkerdiń ózine basshy bolýyna esh múmkindik bermeıdi. Muny aıyptalýshy bes saýsaqtaı biledi. Bile tura, ol quıtyrqylyqqa baryp otyr.
Negizinde, Ermek Taıshybekovtyń sózin talqylap, odan belgili bir qortyndy shyǵarýdyń esh qajeti joq. Sebebi, buǵan deıin qazaq buqaralyq aqparat quraldarynda arandatýshy týraly kóp jazyldy. Al, onyń sottaǵy sońǵy sózi Taıshybekovtyń burynǵy kózqarastarynan bas tartpaǵanyn ańǵartty. Sondyqtan da, biz Ermek Taıshybekovtyń sottaǵy sózi – sońǵy sóz bolǵanyn qalaımyz. Alaıda, aıyptalýshy men onyń advokaty appelásıalyq shaǵym ázirlep, Jambyl oblystyq sotyna joldaıtynyn aıtady. Demek, aldaǵy ýaqytta aıyptalýshynyń aryzy boıynsha sot otyrysy Jambyl oblysynda jalǵasýy múmkin.
Buǵan deıin SHQO Rıdder qalalyq soty "separatızmge shaqyrdy" degen aıyppen Igor Sychevti bes jylǵa sottaǵany belgili. Ol «VKontakte» áleýmettik jelisinde «Daýysqa salý Rıdder qalasynda ótip jatyr dep elestetip kóreıikshi» dep saýalnama jarıalaǵan bolatyn. Atalǵan saýalnamada Sychev kópshilikke Shyǵys Qazaqstan oblysyn Reseı federasıasy quramyna qosýdy «qoldaımyn» nemese «qarsymyn» dep jaýap berýdi usynǵan. Mine osy saýalnamaǵa baılanysty ol 5 jylǵa bas bostandyǵynan aıryldy.
Sondaı-aq, búginde "áleýmettik jelidegi jazbalary arqyly arazdyqty qozdyrdy" dep aıyppen Ermek Narymbaev pen Serikjan Mámbetalın isti bolýda. Alaıda, olar Ermek Taıshybekov pen Igor Sychev sıaqty reseıshil kózqarastary úshin emes, búgingi bılikke degen synı ustanymdary úshin qýdalanyp jatqany málim. Sot olardy aıypty dep taýyp, túrmege jatqyzýy ábden múmkin. Degenmen, qazaqstandyq quqyqqorǵaýshylar ult janashyrlarynyń sońyna sham alyp túsý ornyna el ishin ala taıdaı búldirýdi maqsat etken, áleýmettik jelilerde Taıshybekovke ashyq qoldaý bildirip, separatıstik ıdeıalardy nasıhattap júrgen Qaırat Baıgereev, Erlan Esenalıev, Amır Kasenov syndy jeli qoldanýshylaryn tekserse, sol arqyly aram ıdeıalar sońynda júrgen jastardyń betin qaıtarsa nur ústine nur bolar edi. Óıtkeni, olar ult arazdyǵyn qozdyryp qana qoımaı Qazaq eliniń Táýelsizdigine qater tóndirip júr.
Qandaı jaǵdaı bolsa da Taıshybekov soty – Qazaqstandyq bıliktiń separatızmge bergen resmı baǵasyn bildiretin sot boldy. Al, basty kináliniń aıyptalyp, qamaýǵa alynýy – ultshyldar qozǵalysynyń úlken jeńisi.
Serik JOLDASBAI
Astana
