Búgin Aqordada Ál-Farabı atyndaǵy ǵylym men tehnıka salasyndaǵy syılyqty tabystaý rásiminde Elbasy Nursultan Nazarbaev «Úıindilerde Qazaqstannyń «ekinshi baılyǵy» jatyr» dedi. Bul týraly «Qamshy» portaly habarlaıdy.

«Árıne, bizdiń jer qoınaýymyz óte baı. Mıllıondaǵan tonna ken qazyp aldyq. Biraq, úıindilerde, qorlarda jatqan qaza baılyǵy da mol. Ýaqyty kelgende biz olardy da qaıta óńdeıtin bolamyz. Ony jaqsy bilemin, ol meniń keńes zamanynda Máskeýde qorǵaǵan doktorlyq dısertasıam bolatyn. Tek Sokolov-Sarybaı kombınatynyń úıindilerinde júzdegen mıllıon tonna temir, vanadı, vólfram syndy qazbalar bar. Al Ekibastuz úıindilerinde alúmını totyǵy bar. Biz keıin ony óndiretin bolamyz», -  dedi N.Nazarbaev.

Elbasy  «QR Mıneraldy shıkizatty keshendi qaıta óńdeý jónindegi ulttyq ortalyǵy» ujymyn búgingi syılyqtarymen quttyqtaı kele, olardyń zor is tyndyryp jatqanyn basa aıtty. Óıtkeni, ken úıindilerinde Qazaqstannyń «ekinshi baılyǵy» jatyr.  

Aıta keteıik, «Álemdik tehnologıa naryǵynda Qazaqstannyń mártebesin kótergen jáne elimizdiń ınovasıalyq damýyna eleýli úles qosqan altyn men qorǵasyn metalýrgıasy salasynda jasalǵan ázirlemelerdi óndiriste iske asyrý» taqyrybyndaǵy jumystar sıkli úshin  QR IDM Indýstrıalyq damý jáne ónerkásiptik qaýipsizdik komıteti «QR Mıneraldy shıkizatty keshendi qaıta óńdeý jónindegi ulttyq ortalyǵy» RMK-nyń bas dırektory, tehnıka ǵylymdarynyń doktory, profesor, QR UǴA akademıgi, Ábdirásil Jármenov, atalǵan ortalyq fılıalynyń zerthana meńgerýshileri, hımıa ǵylymdarynyń kandıdaty Lúdmıla Bolotova, tehnıka ǵylymdarynyń doktory, profesor Saǵyntaı Isabaev, ǵylymı qyzmetkeri, tehnıka ǵylymdarynyń kandıdaty, dosent Qanat Kúzgibekova, fılıal dırektory Igor Starsev, bas ǵylymı qyzmetkeri, tehnıka ǵylymdarynyń kandıdaty Nıkolaı Ýshakov, fılıal dırektory, dosent Serikbol Shalǵymbaev, fılıal dırektorynyń orynbasary, tehnıka ǵylymdarynyń kandıdaty Vıktor Shýmskıı «Ál-Farabı» atyndaǵy syılyqqa ıe bolǵan edi.