Búgin elimizde ıslamtaný ǵylymy boıynsha tuńǵysh ǵylymı dısertasıa qorǵaldy. Nur-Múbarak ýnıversıtetiniń alǵashqy doktoranttary Qaırat Qurmanbaev «6D021500 – Islamtaný» mamandyǵy boıynsha «Hýsamýddın ás-Syǵnaqı eńbekterindegi «Ýsýl ál-fıqh» iliminiń lıngvısıkalyq negizderi» taqyrybynda, al Almasbek Shaǵyrbaev «6D020600 – Dintaný» mamandyǵy boıynsha «Máshhúr Júsip Kópeıulynyń dinı kózqarasy» taqyrybynda dısertasıasyn qorǵap shyqty, - dep habarlaıdy muslim.kz.
Qaırat Qurmanbaevtyń otandyq ǵylymı keńesshisi fılologıa ǵylymynyń doktory, profesor, Shyǵystaný ınstıtýtynyń dırektory A.B.Derbisáli: «Bul ǵylymı qorǵaý bizdiń tól tarıhymyzdy tanýda, elimizdegi ıslam dininiń tereń tamyryn zerdeleýde óte mańyzdy. Keńestik kezeńde bizge qazaq halqynyń tarıhy joq dep úıretken. Al qazir qarasaq, bir ǵana ál-Farabıler 30-ǵa jýyq, kóne Tarazdan 60 ǵalym, 15 Túrkistanı, Úndistan jerinen 7-8 Iassaýılerdiń eńbekteri tabylyp jatyr. Iaǵnı bizdiń ata-babalarymyzdyń danalyǵy men bilim bulaqtaryn dáleldeıtin derekter óte kóp, halqymyz rýhanı óte baı bolǵan. Nur-Múbarak ýnıversıtetiniń mindeti sonyń barlyǵyn elge qaıtaryp, ǵylymı aınalymǵa engizý. Mine búgin sonyń alǵashqy kóshi bastaldy deýge bolady. Qaırat Qurmanbaevtyń bul ǵylymı dısertasıasy kitap bolyp shyqsa, qoldan qolǵa ótetin qundy eńbek bolatyndyǵyna senimdimin», – dep qorǵaýshynyń zertteýin joǵary baǵalady.
Al, «6D020600 – Dintaný» mamandyǵy boıynsha Almasbek Shaǵyrbaev «Máshhúr Júsip Kópeıulynyń dinı kózqarasy» taqyrybynda dısertasıa qorǵady. Osy kezge deıin onǵa jýyq ǵylymı jumysqa taqyryp bolǵan M.Júsiptiń eńbekteri tuńǵysh ret fıqh ǵylymy turǵysynan, onyń 40 paryzǵa jáne sharıǵı taraptan ǵıbadattaǵy ustanymdary, sonymen qatar aqıdalyq senimge qatysty kózqarastary matýrıdılik ilimimen baılanysty qarastyrylǵan. Búgingi túrli jat aǵymdarǵa qatysty ata-babalarymyzdyń aıqyn ustanymyn aıtýda mańyzdy aıǵaq bolatyn jańa zertteý.
Osylaısha, búgin Nur-Múbarak Egıpet ıslam mádenıeti ýnıversıteti janyndaǵy dintaný boıynsha dısertasıalyq keńesinde fılosofıa doktory (PhD) ǵylymı dárejesin eki birdeı doktorant óte joǵary baǵada qorǵap shyqty. Biri ıslamtaný ǵylymy boıynsha shet elderdegi ata-babalarymyzdyń muralaryn elmen qaýyshtyrsa, endi biri dintaný boıynsha qazaq dalasyndaǵy ıslam dini ustanymyn ǵylymı deńgeıde dáleldep shyqty. Ǵylym salasyna den qoıǵan jáne qyzyqqan jandar da búgingi dısertasıalyq qorǵaýǵa bastan-aıaq kýá boldy.
Ǵylym doktory, profesor Áshirbek Mýmınov bastaǵan quramynda 11 ǵalym bar dısertasıalyq keńes Nur-Múbarak ýnıversıtetindegi búgingi bastalǵan ǵylym kóshine sáttilik tiledi.
