Qaraǵandylyq qara metalýrgıa alyby «ArselorMıttal Temirtaý» kompanıasy jumysshylarynyń eńbekaqysyn ósirýden bas tartty, - dep habarlaıdy «Qamshy» portaly.

Buǵan deıin kompanıadaǵy metalýrgter men kenshilerdiń «Jaqtaý», «Qorǵaý» kásipodaq uıymdary Ulttyq bank ótkizen devalvasıa esebinen kórgen paıdadan jumysshylardyń jalaqysyn ósirý týraly talap qoıǵan edi. Buǵan kompanıa basshylyǵy dollardyń qymbattaýy kompanıanyń ahýalyn jaqsartýǵa yqpal etken joq degen syńaıda túsinik bergen.

«Ókinishke oraı, teńge devalvasıasy máseleni sheshpedi. Valúta naryǵyndaǵy ózgerister durys qadam boldy, biraq, bul máseleni sheshe almady. Bul kompanıa óndirisi men reseılik básekelester arasyndaǵy aıyrmashylyqtyń ornyn toltyra almady. Sondaı-aq, munyń biz eksporttaıtyn temir rýdasy men kómirdiń naryqtaǵy baǵasynyń quldyraýynan týǵan qıyndyqtarymyzǵa da oń áser etpedi» delingen kompanıa taratqan habarlamada.

Buǵan deıin devalvasıa ótkizgeni úshin qazaqstandyq jetekshi kompanıa basshylary Prezıdentke alǵys bildirip, bul qadam eńbekshiler úshin jaǵymdy jaǵdaı týǵyzýǵa sebep bolady degen edi.