Qytaıda turatyn qazaq boksshysy Beısenbi Násıolla jaqynda úlken jeńiske jetip, óz salmaq kategorıasynda QHR-dyń birinshi nómirli boksshysy atandy, - dep habarlaıdy «Qamshy» portaly QazAqparatqa silteme jasap.

Bir apta buryn Beısenbi Kýnmın qalasynda 2015 jyly ótkizgen sońǵy kezdesýinde alǵashqy mınýtta-aq qarsylasyn uryp jyqqan.

Beısenbi Násıollauly – qazaq boksshysy Qanat Islamnyń jerlesi, Qytaıdaǵy Altaı aımaǵynyń týmasy. Qaba qalasynda 1994 jyly dúnıege kelgen. Boksshynyń esimi tek Qytaıda ǵana emes, Fılıppın men Taılandta da tanymaldyqqa ıe.

Ótken jyly ol kásibı bokstan Qytaıda ótken Azıa týrnırlerine 8 márte qatysyp, tek bireýinde ǵana upaı sanymen jeńilis tapqan. Qazir boksshy qytaılyq «Jon-Veı» kompanıasymen kelisimge otyryp, fılıppındik Lıabyn Dýnnyń qol astynda jattyǵýda. Salmaǵy – 66,8 keli, boıy – 180 sm. Ótken jyldyń qorytyndysy boıynsha ol óz salmaǵy boıynsha álemdik reıtıńte 270-orynǵa turaqtaǵan.