Qazaqstandyq jýrnalıs Azamat Bıtan Shyǵys Qazaqstan oblysynyń ákimi Danıal Ahmetovke Semeı qalasyndaǵy áli kúnge «qyzyl kósem» V. Lenınniń atymen atalyp kele jatqan kóshege Alashqa Abaıdy tanytqan, Shákerimdi aqtap alǵan, Álıhan Bókeıhanov, Ahmet Baıtursynuly bastaǵan ult zıalylarynyń esimderin, eńbekterin jańǵyrtqan ǵalym-oqytýshy Qaıym Muhamedhanulynyń esimin berýdi usyndy, - dep habarlaıdy «Qamshy» portaly.

«Qurmetti Danıal Ahmetov! Bizdiń usynysymyz osy kisiniń esimimen baılanysty bolyp otyr. Tarqatyp aıtar bolsaq, Táýelsizdigimizdiń 25 jyldyǵy mereıtoıy qarsańynda Semeı qalasyndaǵy mańyzy jaǵynan óte úlken oryn alatyn, ortalyqta ornalasqan Lenın atyndaǵy kóshe ataýy Qaıym Muhamedhanulynyń esimimen aýystyrylsa, bul tek semeılikter úshin emes, tutas qazaq jurty úshin oń ózgeris, qutty jańalyq bolar edi dep aıtqymyz keledi. Onyń ústine bıyl Qaıym atamyzdyń Semeı topyraǵynda dúnıege kelgenine 100 jyl tolyp otyr. Sondyqtan, da ol kisige basshylyq tarapynan osyndaı qurmet kórsetilip jatsa, alqalaǵan áleýmettiń sizge aıtar alǵysy mol dep bilgeısiz» delingen ákim atyna jazylǵan úndeýde.

Sondaı-aq, jýrnalıs oblys basshysynyń nazaryn búgingi Egemen eldiń jastary úshin Lenınniń eshkim emestigine aýdartady.

«Onyń tikeleı buıryǵymen qazaq halqyna jasalǵan qastandyqtary, aýyr qylmystary myna ýaqytta eshkimge de qupıa bolmaı qaldy. Sol sebepti de bul ataý bir kezderi Alash zıalylarynyń mádenı-rýhanı ortalyǵyna aınalǵan Semeı qalasynyń kartasynan múlde syzylyp tastalýy kerek degen ustanymdamyz» deıdi bastama kóterýshi jýrnalıs.