Almatyda "Altyn alqa" ıegeri, segiz balanyń anasy basynda baspana joq, qıyn kún keshýde. Jalǵyzbasty ananyń aıtýynsha, ókimetten kómek kútip kúder úzgen. Kóp balaly otbasy retinde páter kezegine de turǵan eken, alaıda 7 jyldan beri kezek jyljymaı qoıdy dep nalıdy. Bul týraly 31-arna habarlady.
Tań ata úıden ketken Kúlzada tús qaıta úıge oraldy. Kámeletke tolmaǵan 5 balaǵa tamaq taýyp keldi. Aıtýynsha, bireýdiń úıin aqtap 1500 teńge alypty. Balalardyń úlkeni 21 jasta, eń kishisi 1 jastan asqan. Úlken uly áskerde. Kúıeýimen 1 jyl buryn ajyrasypty. Bar armany - baspanaly bolý.
KÚLZADA MYRZAKERİMOVA, kópbalaly ana:
- Halyqtyń sanyn kóbeıtińder, sonda kóbeıtkende ne paıda tabamyz aıtyńyzshy. Qudaı ózi keshirsin, keıde oılaımyn, 1-2 balam bolǵanda. Ózim oılaımyn, qudaı keshirsinshi, meniń baılyǵym - osy balalarym. Osylarǵa nan taýyp, osylardy jetkizý meniń maqsatym. Basqa eshteńe emes. Endi bir baspanasy bolsa, osylar óz úılerinde otyrsa, eshkimge jáýteńdemeı.
Ázirge bul armannyń aýyly alys bolyp tur. 7 jyl buryn baspana kezegine turǵan ananyń barmaǵan mekemesi, ashpaǵan esigi joq. Jaýap jalǵyz - kezek kútý kerek. Al mektep jasyndaǵy balalar keıde oqýlaryna ashqursaq attanady. "Altyn alqa" úshin alatyn járdemaqysy baspananyń jaldaý aqysyna da jetpeıdi eken.
KÚLZADA MYRZAKERİMOVA, kópbalaly ana:
- Kómektesińizder. Mynaý qazaqtyń qaradomalaq balalary. Kórip otyrsyzdar, bári kishkentaı. Bulardy tastap jumysqa da shyǵa almaımyn. Qol ushtaryńyzdy berip, kómektesedi dep úmittenemin.
Batyr ananyń sońǵy turaqtaǵan baspanasy myna qulaǵaly turǵan shaǵyn saraı. Munyń ózine bir aı buryn qonystanypty. Buǵan deıin aýystyrǵan páterdiń sanynan jańylystyq deıdi segiz balanyń anasy.
Alataý aýdanynyń ákimdigi bul otbasynyń jaǵdaıyna qanyq eken. Tek naqty qandaı kómek kórsetilgenin aıta almady. Ákimdiktegiler aldaǵy ýaqytta qolǵa alamyz dep ýáde berdi. Tipti, ákimniń orynbasary kómekke zárý otbasynyń ahýalymen ózi baryp tanysatynyn aıtty.
MARJAN BALBAEVA, Alataý aýdany ákiminiń orynbasary:
- Qazir biz turǵyn úı máselesine aralaspaımyz. Óıtkeni turǵyn úı basqarmasy bar. Endi men óz esebimnen osyndaı kisi kezekte tur eken. Qanshasynshy kezekte, qalaı jyljyp jatyr, qalaı bolady dep surap bile alamyn. Konsýltasıa retinde.
Áleýmettik kómek kórsetilgenimen, ákimdik baspana máselesin sheshe almaıtynyn kesip aıtty. Biraq qala basshylary batyr ananyń muńyna qulaq asar degen úmit bar.
