«Qazaqstan musylmandar odaǵy» degen uıym quryp, ózin sol uıymnyń basshysy retinde tanystyryp júrgen Murat Telıbekov týraly Qazaqstan musylmandary dinı basqarmasynyń baspasóz qyzmeti resmı málimdeme jasady, - dep habarlaıdy «Qamshy» portaly.
Múftıat ókili newtimes.kz aqparattyq saıtynyń saýalyna bergen jaýabynda M. Telıbekovtiń áreketin Qazaqstannyń musylman jamaǵatyna qatysy joq degendi aıtady.
«QMDB (Qazaqstan musylmandarynyń dinı basqarmasy – red.) buǵan deıin de Murat Telıbekov Qazaqstannyń barlyq musylmandary atynan sóıleýge quqyǵy joqtyǵy, «Qazaqstannyń musylmandar odaǵy» musylman uıymy emes ekendigi týraly resmı málimdeme jasaǵan bolatyn. Biz Ádilet mınıstrligine de suraý salyp, atalǵan uıym týraly málimetterdi izdestirdik. Bizge mınıstrlikten «Qazaqstan musylmandarynyń odaǵy» degen uıymnyń tirkelmegeni týraly jaýap keldi. Budan basqa, M. Telıbekov eshbir dinı uıymnyń basshysy nemese múshesi retinde de tirkelmegen. Osyǵan baılanysty QMDB onyń ózin Qazaqstan musylmandar odaǵynyń basshysy dep tanystyrýyna, BAQ-tarda musylmandar atynan sóıleýge, ómirde joq uıymnyń atynan aqparat taratýǵa quqyǵy joq dep sanaıdy», - delingen QMDB baspasóz qyzmetiniń jetekshisi Aǵabek Qonarbaıuly bergen jaýapta.
Sondaı-aq, newtimes.kz-ke atalǵan uıym týraly «Dinderdi zertteý ortalyqtary qaýymdastyǵynyń» dırektory Iýlıa Denısenko da pikir bildirgen.
«El ishinde Murat Telıbekovtiń BAQ-ta kóriný úshin aqparattyq sebep týǵyzýǵa tyrysyp júrgen adam ekenin bári biledi. Al, sheteldik quqyqorǵaý organdaryn «Qazaqstan musylmandar odaǵy» adastyryp keledi. Adam quqyqtary, terorızm, ekstremızmmen kúres taqyrybyndaǵy jıyndarda, dóńgelek ústelderde onyń pikirleri musylmandar dinı birlestigi atynan qabyldanyp júr. Murat Telıbekovtiń jynystyq qatynasqa salyq engizý sıaqty destrýktıvti sózderi qoǵamda túsinbeýshilik týdyryp, halyqaralyq uıymdarmen baılanys ornatý áreketterine kedergi jasaýda. Sol úshin onyń Qazaqstan musylmandary atynan sóıleýiniń jolyn kesý kerek», - degen Iýlıa Denısenko.
Al, Murat Telıbekovtiń ózi «Qazaqstan musylmandar odaǵynyń» «MAK» – Muslim Association of Kazakhstan jeke qaıyrymdylyq qory retinde tirkelgen uıym ekendigin, oǵan qoldanystaǵy zańnamalarǵa sáıkes, múshelikke ótýge bolatynyn jáne ol úshin musylman bolý mindetti emes ekendigin aıtqan.
"Qazaqstan musylmandar odaǵy" uıymy basshysy retinde tanymal bolǵan M. Telıbekov buǵan deıin uıym atynan MS Saılaýbek esimdi reperge "Jyl adamy" ataǵyn berip, M. Saakashvıllıdi Qazaqstannyń bir oblysyna ákim etip taǵaıyndaýdy, G. Merchenkony QMDB tóraǵalyǵyna usynyp, jynystyq qatynasqa túsetinderden salyq jınaýdy bastama etip kóterip aty shyqqan bolatyn. Qazir Almatynyń Almaly aýdandyq sotynda "M. Telıbekovtyń "Veter s ýlısy" kitabynan qazaq halqynyń ar-namysyna tıetin úzindiler jarıalady" degen aıyppen qoǵam belsendileri E. Narymbaev pen S. Mámbetalınniń ústinen qylmystyq is qaralýda. M. Telıbekovtyń ózi atalǵan kitaptyń avtory ekenin moıyndaǵanymen, qos belsendi jarıalaǵan úzindilerge qatysym joq dep, at-tonyn ala qashyp otyr.
