Belgili ánshi, «Otyrar sazy» orkestriniń negizin qalaýshylardyń biri Ermek Ábildaev Nurǵısa Tilendıevtiń qyzy, bas dırıjer Dınara Tilendıevaǵa qatysty mádenıet mınıstrine ashyq hat jazdy, - dep habarlaıdy «Qamshy» portaly stan.kz- ke silteme jasap.

Ermek Ábildaev hatynda Nurǵısa Tilendıevpen birge orkestr ánshisi bolyp 18 jyl birge isteskenin, orkestrde 32 jyl eńbek atqarǵanyn baıandaı kele, qazirgi bas dırıjer Dınara Tilendıevanyń ony shyǵarmashylyq ujymǵa jolatpaı qoıǵanyna shaǵymdanady. Ánshiniń Mádenıet jáne sport mınıstrine joldaǵan ashyq haty «Qala men Dala» gazetinde jarıalandy. 

Ánshiniń aıtýynsha, ol Nurǵısa Tilendıevtiń basqarýymen birneshe dúrkin jeke shyǵarmashylyq konsertin ótkizgen. Orkestrge qatysty máselelerde árdaıym atsalysyp kelgenin aıtady.

“Shynyn aıtatyn bolsam, endigi másele Dınaraǵa (Dinzýhra) baılanysty. Ony jumysqa alý ońaı bolmady. Fılarmonıa ákimshiligi jáne kollektıv ony esh qoldamady”, – deıdi Ábildaev jazbasynda.

Ermek Ábildaev Muhtar Qulmuhammed mádenıet mınıstri bolyp turǵanda, Dınara Tilendıevany “Otyrar sazynyń” bas dırıjeri etip saılaýǵa ózi atsalysqan kórinedi. Tipti fılarmonıa ujymynyń qarsylyǵyna qaramastan, Dınara mınıstrdiń aldynda óner kórsetýi úshin “qasarysyp turyp alǵan”.

“Qaıtsek te Dınarany mınıstrge kórsetýimiz» kerek dedim. Fılarmonıa ákimshiligi «ony mınıstrge kórsetýge bolmaıdy, shıki, tájirıbesi joq uıatqa qalamyz» dep shyqty. Men qasarysyp turyp alǵan soń, shyqsa da «Ata tolǵaýymen» shyqsyn dedi. «Joq! Mahambetpen shyǵady», dedim. Oǵan ózi daıyndalǵan. Memlekettik emtıhanda dırıjerlyq jasaǵan”, – degen ánshi hatynda.

“Bul Tilendıevtiń orkestri, Dınara – Tilendıevtiń qyzy. Sondyqtan búginnen bastap, orkestrdiń bastyǵy Dınara bolady», –dedi. Biz qýanyp kettik”, – dep áńgimesin jalǵastyrdy Ermek Ábildaev.
Dınaranyń bas dırıjer bolýyna belsene kirisken ánshi endi Tilendıevtiń qyzy ózin orkestrdiń konsertterine qatystyrmaıtynyna keıigen. Tipti Nurǵısanyń 90-jyldyǵyna arnalǵan keshte de Ermek Ábildaev sahnaǵa shyǵa almapty.

“Kúshikti asyrap baqtym, ıt bolyp ózimdi qapty» demekshi… Taǵy bir máseleni aıta keteıin. 1985 jyly – Dınara dúnıege kelgen jyly – Nuraǵań bizdiń úıge keldi. Odan burynda bir sebeptermen Nuraǵań úıine qonbaı onshaqty kún bizdiń úıde jatty”,-dep ánshi Tilendıevpen dostyqta bolǵan jaqyn qarym-qatynastaryn aıta ketedi.

“Ol kisini meniń jubaıym marqum R. Shaýshıeva (ol da kásibı ánshi,Halyqaralyq ánshiler konkýrsynyń laýreaty ulaǵatty ustaz bolatyn) óte jaqsy kútti. Rysqandy kelinim dep jaqsy kórýshi edi. Dahada sút joq, Dınarany emizý úshin tek saǵan keldim, basqa eshkimge senbeımin dedi. Ol kezde balalarymyz kishkentaı arasy bir jastan bolatyn, eń úlkeni úsh jasta edi”,-deıdi ánshi.

“Soǵan qaramaı Rysqan marhum úsheýin jetektep alyp, kúnde baryp Dınarany bir aıdaı emizdi. Ol marhum Rysqannyń aq sútin aqtamady”,-deıdi ánshi.

“Qaı jaǵynan alsańyz da, Nuraǵańmen ekeýiniń arasy jer men kókteı.
Múldem Nuraǵańnan týmaǵan sıaqty! Nuraǵańnyń birde-bir qasıeti oǵan darymaǵan”, – deıdi ánshi.

Ánshiniń aıtýynsha, Nurǵısa Tilendıev konsertke daıyndyqsyz eshqashan shyqqan emes. Dınara bolsa óziniń tvorchestvolyq deńgeıine qaramastan, konsertke esh daıyndyqsyz shyǵa beredi eken. Jumysqa aılap kelmeıdi. Ujymmen jumysy joq, kollektıv týraly oılanbaıtyn kórinedi.

Jazbasynyń sońynda Ermek Ábildaev mınıstrden «Otyrar sazy» orkestrimen jeke shyǵarmashylyq konsertin ótkizýge qoldaý kórsetýin suraǵan.