Janaıqaı

(kóliktiń terezesinen laqtyrylyp, týa sala ólim qushqan sábıdiń monology)

Keldim. Kettim. Men senderge ne jazdym,
Anashym-aı, osynshalyq nege azdyń,
Jatyryńnan sál keńirek kólikten, 
Basqa álemdi kórsetpediń nege az kún?!

Anashym-aı,
Qulaq salshy, qursaǵyńda búrlegem,
Sharanańmyn bir kún ómir súrmegen.
Syrtqy álemniń salqyndyǵyn sezýshi em,
Biraq munsha sýyqtyǵyn bilmegem.

Sen jylytar dep em tánim muzdasa,
(Aldandyń ǵoı, jurt sókpes ed sizdi asa)
Kim emedi aıtshy sony,anashym,
Sútke tolyp, aq mamańyz syzdasa?!

Ájetaıym,
Jandy aýyrtyp, kindigimdi julmalap,
Qutylýǵa asyqtyń-aý jyldam-aq.
Besigime bólep qoısań men seniń,
Mazańdy da almas em ǵoı ińgáláp.

Bolar em ǵoı, qolǵanatyń, ermegiń,
Ázireıilim bop shyqtyń ǵoı sen meniń.
Ájetaı-aý, áldılegiń kelmese,
Balasy joq janǵa nege bermediń?!

Áýletińdi tuzdaı qurtyp joımaq pa eń,
(Tilegińdi qabyl etip qoıdy átteń).
Áıneginen laqtyrǵanda kóliktiń,
Aspanǵa ushyp ketedi dep oılap pa eń?!

Qazaǵym-aı,
Sap-saý týdym, Er bolar em tý alǵan,
Erligimdi namysyma sýarǵan.
Qazaq degen eldiń uly bolam dep,
Jatyryńa bitken kezde qýanǵam!

Qazaǵym-aı,
Qysqa kúnde qyryq óleń shyǵarǵan,
Aqyn ulttyń uly bolý-uly arman.
Men, áý basta, Jaratqannan sol úshin, 
Myna seniń jatyryńa suranǵam!

Eı adamdar,
Men joldamyn, meni umytyp ketpeńder,
Aza tutyp jatyr maǵan Kók pen Jer,
Tym qurysa baspańdarshy mıymdy, 
Jınap alsyn kepterler!...
 

Qýanysh Oıýly

14.01.2016