«Aqsarbas» kınosyn aıryqsha atap otyrǵanymyz, bul fılm tek Qytaıda ǵana emes, qazaq kınosynyń Otany sanalatyn óz elimizde de kórsetilip, joǵary baǵaǵa ıe boldy. Qıt etse qazaqty masqaralaýdy ádetke aınaldyrǵan bizdiń keıbir rejıserlerimizge úlken sabaq bolarlyq atalmysh fılmniń kórermenge bereri kóp. Kınoǵa arqaý bolǵan oqıǵalar qazaq mádenıetiniń tereńdigin pash etip, tektilik tegeýrinin tanytady. Shyǵarmalaryn qytaı tilinde jazatyn jazýshy bola tura qazaq halqynyń tarıhı taǵylymy men fılo¬sofıasyn kınonyń ón boıyna sińirip jiberýi senarı avtory Erkesh Qurmanbekqyzynyń jetistigi ekendigi sózsiz. Onyń shyǵarmalary Qytaı jazýshylarynyń joǵary baǵasyna ıe bolýynyń syry da sonda jatsa kerek. Jazýshynyń «Ertis syńǵyry» atty tyrnaq aldy áńgimesi 1985 jyly Beıjińde shyǵatyn «Ulttar ádebıeti» jýrnalynda jaryq kórgen. Odan keıingi birneshe jylda «Aqsarbas», «Saǵym saqınasy», «Kógildir aspan kók teńiz», «Jomart», «Altyn arna» syndy birsypyra áńgimeleri «Tańdamaly áńgimeler jýrna¬ly», «Halyq ádebıeti», «Batys óńir úzdik tańdamaly shalqymalary» syndy Qytaıdyń eń áıgili basylymdarynda jarıalan¬dy. Jazýshy qalamynan týyndaǵan kórkem shyǵarmalar 2006 jyly birinshi kezekti Shyńjań «Jas Jazýshylar syılyǵyna» ıe boldy. «Kelmeske ketken qarager» atty áńgimeler jınaǵy 2008 jyly memlekettik 9 kezekti «Tulpar» syılyǵyna ıe boldy. Osyǵan oraı onyń shyǵarmalary «Chań jıań ádbıet-kórkemóneri» sanynda Shyńjańdaǵy bes myqty jazýshynyń qatarynda tanystyrylǵan. Erkesh Qurmanbekqyzynyń shyǵarmashylyǵyndaǵy eń basty erekshelik – qazaq ómiriniń mıllıardtar tilinde kórkem obrazǵa aınalýy desek, qatelespeımiz. Osy kúnge deıin jazýshynyń ártúrli merzimdi baspasózderde jarıalanǵan shaǵyn áńgime-povesterinen tys, «Aqsarbas» , «Kelmeske ketken qarager», «Saharadaǵy Umaı ana» atty úsh jınaǵy jaryq kórdi. Erkesh Qurmanbekqyzynyń aýdarma salasyna sińirgen eńbegi de ushan-teńiz. Ásirese, onyń qazaq ádebıetin mıllıardtar tilinde sóıletýge qosqan úlesi aıryqsha. Aıtalyq, Omarǵazy Aıtanulynyń «Kókbóri» óleńder jınaǵyn, Jumabaı Biláldiń «Arýlar», «Qorly qaıyń» áńgimeler jınaǵyn, Raqymjan Otarbaevtyń «Soǵystyń sońǵy bombasy», Nemat Kelimbetovtiń «Úmit úzgim kelmeıdi» shyǵarmalaryn qytaı tiline aýdaryp, aspan asty eliniń qalyń oqyrmandaryna tartý etti. Bul – qazaq ádebıetiniń jeńisi dep baǵalaýǵa turarlyq dúnıe. Qytaıdaǵy qazaq jastarynyń «Kóktem keldi, kóp boldy» almanaǵyn qurastyryp, qytaı tiline aýdarǵanyn da avtordyń óz aýzynan estidik. Al onyń aýdarmasymen mıllıardtar tilinde sóılep jatqan kishigirim maqala, áńgime, povesterdiń sany tipti kóp. Shyndyǵyna kelsek, shetel ádebıetinen qanshama shyǵarmalar qazaq tiline aýdarylyp jatqanymen, qazaq tilindegi shyǵarmalardyń ózge tilge sapaly aýdarylý jaıy aqsap tur. Tipti joqtyń qasy. Bul turǵydan qaraǵanda, meıli, proza janry bolsyn, meıli, poezıa bolsyn Erkesh Qurmanbekqyzynyń alǵan asýy bıik. Iá, óz halqynyń mádenıeti men ádebıetin áspetteýdegi qalamger qazaq qyzynyń tynym¬syz eńbegi talaıǵa úlgi bolarlyq. Onyń ómir joly men áserli áńgimelerinen uqqanymyz, ol eshqashan josparyn jarıalamaıdy. Tek nátıje men eńbekti ǵana eline usynady. Sol nátıjeli eńbektiń taǵy bir jemisi – jaqynda jaryq kóretin «Qara torǵaı» fılmi. Búgingi ómirdi ózek etken atalmysh kınoda qarapaıym qazaq balasynyń taǵdyr-talaıy beınelenbek. Eń bastysy, «Aqsarbas» syndy aıtýly fılmniń senarıin jazǵan Erkesh Qurmanbekqyzy qazaq kınosynyń qorjynyn taǵy bir sátti týyndymen toltyrmaq. Mıllıardtardy Alash balasynyń bolmysyna tánti etken qazaq qyzyna tek qana aqjol tileımiz!