Maqsat Kádirhan Qazaqstan kórermenderine «Kórikti meken» jáne «Bóri soqpaqty boz dala» fılmderi arqyly tanys. Ol – Úrimshidegi Tán-SHan kıno stýdıasy dırektorynyń orynbasary, memlekettik İ dárejeli rejıser, «Gúlbıke» fılminiń kórkemdik jetekshisi, prodússeri. Maqsat Kádirhanuly – Altaıdyń Býryltoǵaı aýdany, Jetaral aýylynyń Sartaqtaı degen jerinde 1954 jyly 15 tamyzda dúnıege kelgen. Mákeń alǵashqy jumysyn 1974 jyly Altaı aımaqtyq oıyn-saýyq úıirmesinde akter, ánshi bolyp bastaıdy. Daýysynyń eshkimge uqsamaıtyn dara qasıetiniń arqasynda ol 1976 jyly Shyńjań «Tıan-SHan» kınostýdıasyna arnaıy dýbláj jasaýshy bolyp qyzmetke ornalasady. Sonymen qatar 1978 jylǵa deıin Shyńjań ýnıversıtetinde radıo-dıktorlyq mamandyǵyn oqıdy. Kásibı bilim men shynaıy talantyn áıgileı bilgen Mákeń 1995 jylǵa deıin tapjylmastan «Tán-SHan» kıno stýdıasynda aýdarma bóliminiń bastyǵy bolyp mindetin ótedi. Biz joǵaryda ataǵan «Kórikti meken» fılmi – Mákeńniń bir ǵana eńbegi. Atalmysh fılm álemniń 27 memleketinde kórsetilipti. «Tán-SHan» kınostýdıasynyń dırektory Jan I Gannyń aıtýy boıynsha, 2006 jyly Qytaı basshysy Hý Szın Tao Amerıkaǵa barǵan saparynda Qytaıdyń tańdaýly 4 fılmin ala barypty. Sonyń biri osy «Kórikti meken» bolǵan eken. Maqsat Kádirhanuly osy kúnge deıin 500-ge jýyq kınoǵa dybys rejısery boldy ári kóptegen shetel kınolarynyń basty róldegi keıipkerlerin sazdy daýysymen qazaqsha sóıletti. Mákeń rejıserlik etken "Iýelıańýandaǵy kúlki" kınosy 1985 jyly Shyńjańdaǵy az sandy ulttardyń tańdaýly fılm syılyǵyn, «Baısy kóterilisi» kınosy 1995 jyly Shyńjań aýdarma kınolary arasyndaǵy «Aryndaǵan aıdahar» syılyǵyn enshilegen. Sonymen qatar 2-dárejeli "Perızat" syılyǵyn, "Tulpar" syılyǵyn, Shyńjańnyń "Bes bir ınjenerıa" syılyǵyn jeńip alǵan "Saharadaǵy Dánesh" fılminde Maqsat Kádirhanuly fılm meńgerýshisi, bas baqylaýshy, aqylshy ári kıno ózeginiń basty ánin oryndaýshy sıaqty birneshe mindetti qatar atqardy. Mákeń Shyńjańdaǵy ataqty 8 kıno mamanynyń biri. Ol tek kıno salasymen ǵana aınalysyp qalmaı, kórkem ádebıettiń de beldi qalamgerine aınaldy, sahna jańǵyrtar ánderdi de jazdy.