قازاق قول ونەرىن زامان تالابىنا ساي دامىتۋعا اتسالىسىپ جۇرگەن باۋىرلارىمىزدىڭ ءبىرى – نۇردىن تۇرعىن. ول قىتايداعى ىلە قازاق اۆتونوميالى وبلىسىنىڭ ورتالىعى قۇلجا قالاسىندا «مۇراعات» اتتى قولونەر بۇيىمدارىن شىعاراتىن سەرىكتەستىك قۇرىپ، قازاقتىڭ ماتەريالدىق مادەنيەتىن ناسيحاتتاۋعا، زامانعا ساي قولدانىس اياسىن كەڭەيتۋگە ۇلەسىن قوسىپ كەلەدى.

«بالا كەزىمىزدە انامىز ىلعي دا بىزگە قازاقى ويۋ-ورنەكپەن بەزەندىرىلگەن كيىم كەشەك كيگىزەتىن. 2008 جىلى مەكتەپتى بىتىرگەنىمدە جوعارى وقۋ ورنىنا ءتۇسىپ كەتە المادىم. وقۋسىز جۇرگەن جىلىمدا ءوزىمنىڭ قىزىعۋشىلىعىم بويىنشا، قۇلجا قالاسىندا ەلەكتريك بولىپ جۇمىس ىستەپ كوردىم. جۇرە كەلە جوعارى ءبىلىمسىز، كوش سوڭىندا قالۋعا بولمايتىنىن ءتۇسىندىم. ءسويتىپ، ءبىر جىلدان كەيىن قايتا تاپسىرۋ ارقىلى ىشكى قىتايداعى شي ان جاراتىلىستانۋ عىلىمدارى ۋنيۆەرسيتەتىنە «ەلەكتر-ينجەنەريا جانە اۆتوماتتاندىرۋ» ماماندىعى بويىنشا وقۋعا ءتۇستىم. قالىڭ جۇڭگو حالقىنىڭ اراسىندا جۇرگەندە سوناۋ بالا كەزدەگى ۇستىمىزدەن تاستامايتىن قازاقشا كيىمدەرىمىز تۋرالى ويلانىپ، وسى سالانى قولعا السا، زاماناۋي ۇلگىمەن ۇشتاستىرىپ وندىرىسكە سالسا، كوپكە تانىتسا دەپ وي ءتۇيدىم»، - دەيدى نۇردىن باۋىرىمىز.

وقۋدا جۇرگەن ۋاقىتىندا قىتايدىڭ ءىرى قالالارىن تۇگەلدەي ارالاپ، وراسان اعىمداعى ونەركاسىپ يەلەرىنىڭ ەڭبەكتەرىمەن تانىسقان. ءوزى دە سولاردىڭ قاتارىندا بولۋعا بەل بۋعان. وقۋدى بىتىرەر جىلى قىسقى دەمالىسىندا شىڭجاڭعا كەلىپ، اپكەسىنىڭ اجارلاندىرۋ سالونىن اشىپ، اناسى ەكەۋى قازاقى ورنەكتەرمەن كومكەرىلگەن كيىم تىگەتىن، ونى پاسدالانۋعا بەرەتىن دۇكەن جۇمىسىن جۇرگىزىپ وتىرعانىن كورەدى.

«وسى مۇمكىندىك پەن مەنىڭ يدەيام قابىسىپ، 2012 جىلدىڭ سوڭىندا «نۇردىن» دەگەن ساۋدا بەلگىسىن تىركەتتىك. وقۋىمدى ءبىتىرىپ كەلىپ، جاقسى قىزمەت تابىلىپ تۇرسا دا وسى سالاعا ءبىر جولا بەت تۇزەدىم. ءبىر جىل بويعى شىعارعان ونىمدەرىمىز نارىقتان وزىندىك ورنىن الىپ، جەرگىلىكتى بيلىك بىزگە قولداۋ كورسەتتى. ولاردىڭ كاسىپتىك وقىتۋى بويىنشا 60 ايەل بىزگە جۇمىسقا تۇردى. 2014 جىلى كاسىپكەرلىگىمىز «مۇراعات» ج ش س بولىپ قۇرىلدى. انامىزدىڭ «مۇراسى» عوي دەپ وسىلاي اتادىق. قۇرىلعالى بەرى ءبىراز جەتىستىكتەرگە قول جەتكىزدىك. كوپتەگەن حالىقارالىق كورمەلەرگە قاتىستىق. ءبىز ۇلتتىق كيىم-كەشەك، جاساۋ-جابدىقتار مەن قوسا «3D» پرينتەردى دە 2013 جىلدان باستاپ قولعا الىپ،  ادامداردىڭ وي قيالىنداعى زاتتاردىڭ ءمۇسىنىن كومپيۋتەرلىك باعدارلامالار ارقىلى باسىپ شىعارۋدى جۇزەگە اسىرىپ كەلەمىز»، - دەيدى نۇردىن تۇرعىن.

سوڭعى ۇلگىدەگى قۇرالدار مەن تەحنولوگيانى پايدالانىپ اتقارىلعان جۇمىستار رەتىندە مارجاننان ءتىزىپ كورىنىس جاساۋدى اتاپ ايتۋعا بولادى. «مۇراعات» سەرىكتەستىگى ازىرلەگەن 1،80×1،70 كولەمىندەگى مۇحتار شاحانوۆ پەن شىڭعىس ايتماتوۆتىڭ پورترەتتەرى تۇتىنۋشىلاردىڭ كوپ قىزىعۋشىلىعىن تۋدىرعان. اقىن مۇحتار شاحانوۆقا سەرىكتەستىكتە ازىرلەنگەن پورترەت تارتۋ ەتىلىپتى دە.  

«ول كىسى رازى بولىپ، جاقسى باعاسىن بەردى. سونداي-اق، 3،20×1،70 ولشەمىندە قازاقستاننىڭ كورنەكتى تۇلعالارىن دا، سوناۋ حاندارىمىزدان باستاپ، قازىرگى پرەزيدەنتىمىزگە دەيىن وسىلاي بەينەلەدىك. بۇل جۇمىستارىمىز ناۋرىز مەرەكەسىندە استانادا حالىققا كورسەتىلۋى كەرەك ەدى. بۇل جاققا جۇمىستارىمىزدى كورسەتۋگە «نار جول» كومپانياسى دەمەۋشى بولىپ جاتىر. سايلاۋعا بايلانىستى بىزبەن بايلانىسقان كىسىلەر مامىر ايىنا قالدىردى. پرەزيدەنتىمىزگە ارناعان مارجان ءمۇسىندى جۇمىسىمىز ءقازىر مونتاج ۇستىندە، مۇمكىندىك بولسا وزىنە ساۋعا رەتىندە سىيلاۋدى ويلاستىرىپ جاتىرمىز»، - دەگەن نۇردىن تۇرعىن وزدەرى ازىرلەگەن پورترەتتى ەلباسىعا تارتۋ ەتۋ جوسپارلارى بار ەكەنىن ايتادى.

ءقازىر 185 كىسىنى تۇراقتى جۇمىسپەن قامتىپ وتىرعان كاسىپورىن شىڭجاڭداعى توي كيىمىن، قىز جاساۋىنىڭ جابدىقتارىن، قول ونەر بۇيىمدارىن، مەرەكلەىك شارالاردى بەزەندىرۋ جابدىقتارىن شىعاراتىن ءىرى سەرىكتەستىككە اينالعان. سەرىكتەستىك باسشىسى كاسىپورىننىڭ اي سايىن 20 مىڭ اقش دوللارى شاماسىندا تازا كىرىس كىرگىزەتىنىن ايتىپ وتىر.

ەرلان تولەۋباي