قازاقستان قاشاعان شيكىزات ءوندىرۋ جۇمىستارىن بيىل باستاۋعا ءۇمىتتى. بۇل تۋرالى ەلىمىزدەگى مۇناي-گاز سالاسىنىڭ مامانى سەرگەي سميرنوۆ حابارلادى.

«2014 جىلعا مۇناي ءوندىرۋ 83 ملن. توننا كولەمىندە بولادى دەگەن جوسپار ساقتالىپ وتىر. ۇكىمەت قاشاعان جۇمىسىنىڭ باستالۋىنا ايتارلىقتاي كەدەرگىلەر بولىپ جاتقانىنا قاراماستان، كەن ورنىندا شيكىزات ءوندىرۋ بيىلدان قالمايدى دەپ مالىمدەدى»، - دەدى سەرگەي سميرنوۆ. الدىن حابارلانعانداي، ق ر ەكونوميكا جانە بيۋدجەتتىك جوسپارلاۋ ءمينيسترى ەربولات دوسايەۆ مۇناي ءوندىرۋ كولەمىنىڭ بولجامى 2014 جىلى 83 ميلليون توننا دەڭگەيىندە ساقتالىپ تۇرعانىن جەتكىزگەن بولاتىن. 2013 جىلى ەلىمىز 81،731 ميلليون توننا مۇناي وندىرگەن بولاتىن. بۇل كورسەتكىش 2012 جىلمەن سالىستىرعاندا 3،2 پايىزعا ارتىق. قازاقستان مۇناي قورى بويىنشا الەمدە 9 ورىندا تۇر. 20 جىلدىڭ ىشىندە مۇناي ءوندىرىسى 3 ەسەگە، ال گاز شىعارۋ 5 ەسەگە ارتقان. ال، قاشاعان - كاسپيي تەڭىزىنىڭ قازاقستاندىق بولىگىندە ورنالاسقان الەمدەگى ءىرى مۇناي جانە گاز كەن ورىندارىنىڭ ءبىرى. ول اتىراۋ قالاسىنان وڭتۇستىك-باتىسقا قاراي 80 شاقىرىم جەردە ورنالاسقان. سوڭعى زەرتتەۋ دەرەكتەرىنە سۇيەنسەك، كەن ورنىنىڭ مۇناي قورى 4،8 ميلليارد باررەلدى قۇرايدى. قاشاعاندا سونداي-اق، تابيعي گازدىڭ ءىرى قورى بار. (ءبىر تريلليون تەكشە مەتر گاز). ەستەرىڭىزگە سالا كەتەيىك، قاشاعانداعى مۇناي ءوندىرۋ جۇمىسىن باستاۋ مەرزىمى وتكەن جىلدىڭ سوڭىندا بىرنەشە رەت اۋىستىرىلعان بولاتىن. 2013 جىلدىڭ قازان ايىندا باستالعان جۇمىس اراعا ەكى اپتا سالىپ قايتا توقتاپ قالىپ ەدى.