«موڭعولياداعى تاسقىننان زارداپ شەككەندەرگە ارناپ قازاقستاندىق بەلسەندىلەر سالعىزىپ جاتقان كەيبىر ۇيلەر «ءقاۋىپتى زونادا تۇرعاندىقتان» بۇزىلاتىن بولدى» دەپ جازادى ازاتتىق. بۇل تۋرالى Qamshy.kz حابارلايدى.

موڭعوليانىڭ بايان-ولگيي ايماعىنىڭ تۇرعىنى سايران – سەگىز بالانىڭ اناسى، جالعىزباستى ايەل. وتباسىن قۇرعان ۇلكەن ءتورت بالاسى قازاقستانعا كوشكەن. كامەلەتكە تولماعان ءتورت بالاسىمەن ولگيي قالاسىندا تۇرادى. شىلدەنىڭ 10-ىندا بولعان تاسقىننان سوڭ سايراننىڭ ءۇيى جارامسىز بولىپ قالعان. اپاتتان كەيىن قازاقستاندا ازاماتتىق بەلسەندىلەر الەۋمەتتىك جەلى ارقىلى جۇرتتان قارجى جيناپ، تۇرمىسى ناشار بەس ۇيگە باسپانا سالىپ بەرۋدى ۇيعارعان. سولاردىڭ قاتارىندا سايراننىڭ شاڭىراعى دا بار.

- ءۇيدىڭ ىرگەتاسىن قۇيىپ، كىرپىشتەرىن قالاعان بولاتىن. 50 پايىزى ءبىتىپ تۇرعان ەدى. ەندى كەلىپ، اكىمشىلىك قىزمەتكەرلەرى: «ءۇيدى بۇز. زاڭسىز جەرگە سالىنعان» دەپ جاتىر، - دەيدى سايران.

«پارتيا تارتىسى بولۋى مۇمكىن»

قازاقستاندىق بەلسەندىلەر جيناعان اقشانىڭ ءبولىنىپ، جۇمسالۋىن قاداعالاپ جۇرگەن بايان-ولگييلىك بەلسەندى ايدوس ازات:

- و باستا اكىمشىلىك ءوزى بەلگىلەپ بەرگەن جەرگە ءۇي سالىنعان. ءبىراق بۇل جەردە پارتيا تارتىسى بولىپ جاتۋى مۇمكىن، - دەپ بولجايدى.

بايان-ولگيي ايماعىنداعى 200-گە جۋىق ءۇيدى سۋ شايىپ، 700 تۇرعىن باسپاناسىز قالىپ جاتقان كەز موڭعولياداعى پارلامەنت سايلاۋىمەن تۇسپا-تۇس كەلگەن ەدى. سول كەزدە بيلىك باسىندا وتىرعان دەموكراتيالىق پارتيا وكىلدەرى تاسقىننان زارداپ شەككەن 100 ۇيگە جاڭادان باسپانا سالۋ ءۇشىن جەر بولگەن. جەرگىلىكتى تۇرعىنداردىڭ ايتۋىنشا، بۇرىنعى بيلىك باسىندا وتىرعان دەموكراتيالىق پارتيا جەڭىلىپ، ورنىنا كەلگەن موڭعوليا حالىق پارتياسى جەر ءبولۋ شەشىمىن زاڭسىز دەپ تاپقان.

- قازاقستاننان كەلگەن جىگىتتەر (بەلسەندىلەر – رەد.) باسىندا قانشا قارجى اكەلگەنىن ايتتى. ويلانا كەلە «جاعدايى جوق بەس وتباسىعا ءۇي سالىپ بەرەيىك» دەپ شەشىم قابىلدادى. ءقازىر ءۇش ءۇي سالىنىپ بىتۋگە تاياپ قالدى. ەكى ءۇي ەندى باستالىپ، سالىنىپ جاتىر. ءبىراق [جەرگىلىكتى بيلىك] باسىندا كورسەتىپ بەرگەن جەرلەرىن ەندى «دۇرىس ەمەس» (زاڭدى ۋچاسكەگە تۇسپەگەن – رەد.) دەپ، سونىڭ سالدارىنان ەكى ءۇيىمىز بۇزىلعالى جاتىر. بۇل ەندى باسىنداعى باسشىلىقتىڭ تەرىستىگى، - دەيدى ايدوس ازات.

ءوزىن تەك اسقار دەپ تانىستىرعان بايان-ولگيي ايماق اكىمشىلىگىنىڭ قىزمەتكەرى ازاتتىققا جەر ۋچاسكەلەرىنىڭ نە سەبەپتى جارامسىز دەپ تانىلعانىن ءتۇسىندىردى.

- اەروپورتقا تىم جاقىن، ءقاۋىپتى زوناعا كىرىپ كەتكەن. بۇنى ەلەكتر جۇيەسىن تارتۋ كەزىندە كورىپ، ءۇي سالۋدى توقتاتۋ جونىندە شەشىم قابىلدانعان، - دەدى ول.

ءبىراق اسقار ناقتى قانشا ءۇيدىڭ ءقاۋىپتى زوناعا كىرىپ كەتكەنىن ايتىپ بەرە المادى.

جاڭا اكىمنىڭ جاۋابى

ءۇيسىز قالعان سايران جاڭا اكىمنىڭ ءبولىپ بەرگەن جەرىنە كيىز ۇيمەن كوشىپ بارعانىن، جارتىلاي سالىنعان ءۇيىنىڭ تۇرعانىن، ونى بۇزىپ اكەپ قايتا سالۋعا قارجىسىنىڭ جوق ەكەنىن ايتادى.

بايان-ولگيي ايماعىنىڭ اكىمى عىلىمحان ايىپ ۇلى 20 ءۇيدىڭ ءقاۋىپتى ايماققا كىرىپ كەتكەنىن راستادى.

- ۇكىمەت اۋىسىپ، الدىڭعى كىسىلەر (اۋەلگى باسشىلار – رەد.) كوپ ءمان بەرمەي، شەشىلمەگەن ماسەلەلەرگە ارالاسىپ، كىرىسىپ جاتىرمىز. قىزمەتكە كەلگەلى ءبىر اپتا بولعان. كوميسسيا قۇرىلىپ، تەكسەرىلمەگەن. جيىرماداي ۇيگە بەرىلگەن جەر اەروپورتقا جاقىن. سامولەتتىڭ ۇشىپ-قونۋىنا كەرى اسەرىن تيگىزەدى دەگەن ماماندار قورىتىندىسى شىققان. سول بويىنشا ول 20 ۇيگە باسقا جەردەن جەر ءبولىنىپ بەرىلدى، - دەيدى ايماقتىڭ جاڭا اكىمى.

عىلىمحان ايىپ ۇلى دا ازاتتىققا «ءقاۋىپتى زوناعا» ناقتى قانشا ءۇيدىڭ سالىنا باستاعانىن انىقتاپ ايتىپ بەرە المادى.

ايماق اكىمى ۇكىمەت تارابىنان 100 وتباسىعا كيىز ءۇي تاراتىلعانىن حابارلادى. ەلەكتر جارىعىن تارتۋ جانە ءۇش-تورت جەردەن قۇدىق قازۋ ماسەلەسىن قاراستىرىپ جاتقانىن ايتتى. ازاتتىق ءتىلشىسىنىڭ «ۇيلەرىن جارتىلاي سالىپ قويعان تۇرعىنداردىڭ شىعىنىن كىم وتەپ بەرەدى؟» دەگەن ساۋالىنا «بىلمەيمىن» دەپ قىسقا قايىردى.

قازاقستاندىق بەلسەندى اياتجان احمەتجاننىڭ باستاۋىمەن الەۋمەتتىك جەلى قولدانۋشىلارى بايان-ولگييدەگى تاسقىننان زارداپ شەككەندەرگە كومەكتەسۋ ماقساتىندا قارجى جيناعان بولاتىن. بەلسەندى ازاتتىققا جينالعان 2 ميلليون 500 مىڭعا جۋىق قارجىنى بايان-ولگييگە جەتكىزىپ، بەس وتباسىنا 32 شارشى مەترلىك باسپانا تۇرعىزىپ بەرۋگە كىرىسكەندەرىن ايتتى. بۇدان باسقا، قازاقستان بيلىگى بايان-ولگييدەگى تاسقىن سۋدان زارداپ شەككەندەرگە ارناپ 200 مىڭ اقش دوللارىن بولگەن بولاتىن.