2016 جىلدىڭ 1 تامىزىندا «بۋراباي» ۇلتتىق پاركىندە بالالار اراسىندا الەم رەكوردسمەنى، كەۋدەنى جەردەن كوتەرۋدەن جانە ماكسيمالدى ۋاقىتقا «پلانكا ۇستاۋدان» قازاقستان رەكوردتار كىتابىنىڭ ءتورت مارتە رەكوردسمەنى امير ماحمەت ءبىزدىڭ وليمپيادالىق قۇراماعا قولداۋ رەتىندە جاڭا رەكورد ورناتتى، - دەپ حابارلايدى Qamshy.kz.

10 جاسار امير كەۋدەسەن جەردەن 1000 رەت كوتەرىپ، قازاقستان بويىنشا ءابسوليۋتتى رەكورد ورناتتى. «بولەكتاۋ» شىڭىندا ورىنداعان رەكوردىن امير قازاقستاننىڭ وليپيادالىق قۇراماسىنا قولداۋ كورسەتۋ ماقساتىندا ورناتتى.

رەكورد كينەس قازاقستان رەكوردتار كىتابىنىڭ رەسمي وكىلى قۋاندىق قۇدايبەرگەنوۆتىڭ تاراپىنان تىركەلدى. 

جاستىعىنا قاراماستان امير ماحمەت بۇگىندە كينەس قازاقستان رەكوردتار كىتابىنىڭ ءتورت مارتە رەكوردسمەنى بولىپ تابىلادى. العاشقى رەكوردىن ول 2015 جىلدىڭ 1ء-شى ماۋسىمىندا «بالالاردى قورعاۋ كۇنى» مەرەكەسىنە وراي Bar Bars كومانداسى تاراپىنان ۇيىمداستىرىلعان Street Workout بويىنشا جازعى ماۋسىمىنىڭ اشىلۋىندا كەۋدەسىن جەردەن 450 رەت كوتەرىپ ورناتقان بولاتىن. ەكىنشى رەكوردىن امير Street Workout-تان وتكەن اقمولا وبلىسىنىڭ چەمپيوناتىندا كەۋدەسىن جەردەن 30 مينۋتتا 50 رەت كوتەرىپ ورىنداعان! ال ءۇشىنشى رەكوردىن جاس سپورتشى 2015 جىلدىڭ قىركۇيەگىندە قازاق حاندىعىنىڭ 550 جىلدىق مەرەيتويى اياسىندا كەۋدەسىن جەردەن 550 رەت كوتەرىپ ورناتتى. ءتورتىنشى، بالالار اراسىنداعى الەمدىك رەكوردىن امير بوكستان كاسىبيلەر اراسىندا الەم چەمپيونى گەنناديي گولوۆكيننىڭ دومينيك ۋەيدپەن وتەتىن جەكپە-جەگىنە قولداۋ رەتىندە ورناتتى.

امير استانادان بىرنەشە شاقىرىم جەردە ورنالاسقان قاجىمۇقان اۋىلىنىڭ تۇرعىنى. قازىرگى تاڭدا ونى ءتۇرلى تەليەۆيزيالىق باعدارلامالار مەن سپورتتىق ءىس-شارالارعا قاتىسۋعا ءجيى شاقىرادى. سالاۋاتتى ءومىر سالتىن بەرىك ۇستانعان امير وزگەلەردى دە سپورتپەن شۇعىلدانۋعا شاقىرادى!

امير — سپورتتى سەرىك ەتكەن ماحمەتوۆتەر اۋلەتىنىڭ جارقىن وكىلدەرىنىڭ ءبىرى. اعاسى ايدار ماحمەتوۆ، قر-نىڭ ەڭبەك سىڭىرگەن سپورت شەبەرى، كاراتە جانە مما-دان 3 مارتە الەم چەمپيونى، دجيۋ-دجيتسۋدان 3 مارتە ەۋروپا چەمپيونى، اتاسى ءالىمجان ماحمەتوۆ سپورتتىڭ التى ءتۇرى بويىنشا رازرياد يەگەرى بولىپ تابىلادى. تاعى ءبىر اعاسى، بوكستان قر-نىڭ چەمپيونى ازات ماحمەتوۆ «استانا ارلانس» كومانداسىنىڭ ساپىنا كىرەدى، سونداي-اق بوكستان قازاقستان قۇراماسىنىڭ مۇشەسى. وقۋدا دا، سپورتتا دا الدا بولۋ – بۇل اۋلەتتىڭ بەرىك ۇستانعان باستى قاعيداسى.