قۇداعي تاباق – قازاقتىڭ قۇداعي كۇتۋ جولىندا، داستارحان جايۋ سالتىندا دا ۇلكەن جول بار، ءتارتىپتى ءمان ماعىنا بار. ەرى قايتىس بولعان، قۇدا جوق، قۇداعي عانا كەلگەندە، «قۇدانىڭ جولى»، «ءولى-تىرىنىڭ سىباعاسى» دەپ باس، جامباس، ومىرتقا، ارقا، بەلدەمە، قازى-قارتا، جال-جايا، قارىن، قيماي، ورتان جىلىك، جاۋىرىن، قۇيرىق-باۋىر سالىنعان ۇلكەن سىي تاباق تارتادى. مۇنى قازاق كادەسىندە «قۇداعي تاباق» دەپ اتايدى.

ال، ەرى ءتىرى ايەلدەرگە ادەتتە باس تارتپايدى. «باس تارتسا، بايى ولەدى» دەپ ىرىمدايدى. اكەسى ءتىرى بالالار دا باس مۇجىمايدى، جەمەيدى، باستى قولىنا دا المايدى. «اكەم ءتىرى، باس مۇجىمايمىن» دەپ جاتادى.

قۇداعيدىڭ جولى قىزىنان دا جىڭىشكە دەپ، ءار ىسكە جاۋاپتى بولىپ، ءار قيمىلىن قالت جىبەرمەي باعادى. ولاي بولسا، قۇداعي ۇلكەن اۋىر ءمىن تاعادى دەپ سانايدى. «قۇداعي كۇتۋ پاتشا كۇتۋدەن دە قيىن» دەگەن ءتامسىل ءسوزدىڭ استارىندا الاقىزعان الاڭداۋ جاتىر، جۇمىسقا مۇقياتتىق جاتىر. ارى قاراي ايتساق، تەرەڭ قوپارىپ قازساق، جاسىرماي جازساق، قۇداعيدىڭ تاباسى جاتىر. سونداي سىن اۋادان تۋعان تابالاۋعا ەمەس، باعالاۋعا ۇسىنعان ءۇمىت پەن كۇدىك جاتىر... وسىنىڭ ءبارىن باعالى كوڭىلدەن تانيتىن، جاقسىلىققا جاراسقان، جاعىمدى قۇداعيلارى دا قۇدالارىن بەت الدى سىنامايدى، جوقتان وزگەگە جول تاپ دەپ قينامايدى، قايتا شىن جۇرەكتەن، اق تىلەكپەن سىيلايدى. جاقسىلىقپەن جارىسادى، ءبىر-بىرىن ايالاپ، قاراسادى، ويناپ-كۇلىپ، اتا داستارقانىنان ءدام تاتىپ تاراسادى.

بولات بوپاي ۇلى جوتا قاجى