ايبەك جانسەيىتوۆ. بۇل – وتاندىق ءانشى، ەكى بالانىڭ اكەسى بۇركىتتىڭ ازان شاقىرىپ قويعان ەسىمى. 1978 جىلى تاراز وڭىرىندە دۇنيەگە كەلگەن ايبەك مىرزا بۇگىندە حالىقتى كوڭىلدى اندەرىمەن قۋانتىپ ءجۇر. ءانشىنىڭ ونەرمەن اينالىسامىن دەگەن شەشىمىن وتباسى قۇپ كورمەي، ءتىپتى الماتىدان  تارازعا قايتارۋعا تىرىسقان. الايدا بۇركىت ەشكىمگە دەس بەرمەي، دەگەنىنە جەتتى.

«اكەم اسكەري ادام. ال اعالارىم بيزنەستە جۇرگەندىكتەن، ونەردى كوپ تۇسىنە بەرمەيدى. «نە ءجۇرىس مىناۋ؟!» دەپ ۇرىساتىن كەزدەرى بولدى. مەن ءاۋ باستان بۇل ءىستىڭ قولىمنان كەلەتىنىن ءبىلدىم. تەك ۋاقىت قاجەت ەدى. ءقازىر اكە-شەشەمدى «بۇركىتتىڭ اتا-اناسى» دەپ تانىستىرعاندا، مارقايىپ قالادى. بۇل كۇنگە قاجىرلى ەڭبەكپەن عانا جەتتىم. نيەت تە اق بولۋ كەرەك».

انشىلەرگە قارداي اپپاق نيەتتەن بولەك، كوڭىلدى اندەر دە كەرەك. ءان – ادام  ومىرىنە تىكەلەي اسەر ەتەدى دەپ سەنەدى بۇركىت. مۇنى ول ءوز ومىرلىك تاجىربيەسىنەن ايتىپ وتىر. بىرنەشە جىل بۇرىن بۇركىتتىڭ رەپەرتۋارىندا – «باقىتىمدى تابا الماي ءجۇرمىن» نەمەسە  «جاۋاپسىز ماحاببات» دەگەن سارىنداعى اندەر كوپ ەدى.  ول ءانشىنىڭ ومىرىنە كەرى اسەرىن بەرىپ، كوپ ۋاقىت بويى ومىرلىك جارىن تابا الماي ءجۇردى. رەپەرتۋارىندا كوڭىلدى اندەر پايدا بولا سالىسىمەن، باقىتىن تاپقان. ءقازىر زەيىن، ومار ەسىمدى بالالارى بار.

«ومىردەگى ەڭ ۇلكەن ماقساتىم – بالالارىمنىڭ بويىنا ناعىز ەر ازاماتقا ءتان قاسيەتتەردى ءسىڭىرىپ ءوسىرۋ. قارتايعاندا بالالارىڭىڭ ساعان قالاي قارايتىنى،  تاربيەگە بايلانىستى. ءقازىر جىگىتتەرمەن «اسسالاۋماعالەيكۋم، قالىڭ قالاي؟» دەسەڭ  «بارلىعى وك» دەپ قاراپ تۇرادى. سوندىقتان، بالانىڭ تاربيەسىنە ۇلكەن ءمان بەرۋ كەرەك. سوڭعى ۋاقىتتا قوس جىنىستىلار مەن جىنىسىن اۋىستىرعىسى كەلەتىن جىگىتتەر دە كوبەيىپ كەلەدى. ولار دا وزدەرى تۋرالى اشىق مالىمدەي باستادى. وعان عالامتوردىڭ كوپ اسەرى بار. 18-گە تولماعاندارعا زاڭ جۇزىندە كەيبىر سايتتارعا كىرۋگە تىيىم سالۋ تۋرالى ۇكىمەتكە ۇسىنىس جاساۋ كەرەك. ال ءوزىم اكە رەتىندە  بالالارىم 18-گە تولماعانشا ۇيدەگى عالامتوردى ءوشىرىپ تاستايمىن».

ارىپتەستەرىڭىز سەكىلدى دەپۋتاتتىققا سايلانىپ، اتالمىش ماسەلەلەردى كوتەرگىڭىز كەلمەي مە دەگەن ساۋالىمىزعا، ءانشى ۇزىلدى-كەسىلدى «جوق» دەپ جاۋاپ بەردى.

 «مەن ءوز ەلىمدى سۇيەمىن. سايلاۋعا قاتىسىپ، ازاماتتىق بورىشىمدى وتەپ ءجۇرمىن. قازاقستاندا نە بولىپ جاتقانىنان حابارىم بار. الايدا، ءار ادام قولىنان كەلەتىن ىسپەن اينالىسۋ قاجەت».

سۇحباتتاسقان اسەم المۇحانبەت