بيىل «الاش» ۇلت-ازاتتىق قوزعالىسىنىڭ كوسەمى، تۇركى الەمىندەگى ۇلى قايراتكەرلەردىڭ ءبىرى ءاليحان بوكەيحانوۆتىڭ تۋعانىنا 150 جىل تولدى. قيلى زاماندا تۋىلىپ، ءومىرىن تاۋەلسىزدىك جولىنداعى كۇرەسكە ارناعان عازيز جاننىڭ اتىن ارداقتاپ، ارۋاعىن ۇلىقتاۋعا ارنالعان شارا مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىندا ءوتتى. اتالعان شاراعا قاتىسقان الماتى قالاسىنىڭ اكىمى باۋىرجان بايبەك – ەلباسى نۇرسۇلتان نازاربايەۆتىڭ تىكەلەي ۇسىنىسىمەن تاۋەلسىزدىك يدەياسىنىڭ نەگىزىن سالۋشى ءاليحان بوكەيحانوۆتىڭ مەرەيتويى يۋنەسكو شەڭبەرىندە اتالىپ ءوتىپ جاتقانىن ايتا كەلە، ەلىم دەگەن ەردىڭ ەسىمى تاريحتا ماڭگى قالارىن جەتكىزدى.

«ءاليحان بوكەيحانوۆ حالىقتىڭ كوكىرەگىنە عاسىرلار بويى شەر بولىپ قاتقان ازاتتىق تۋرالى اڭساردى، ەگەمەن ەل بولۋ جايلى ۇلى يدەيانى جاڭعىرتۋشى، ابىلاي مەن كەنەسارى حانداردىڭ ىستەرىن لايىقتى جالعاستىرۋشى بولدى. سۇلتانماحمۇتشا ايتساق، «قازاق ءۇشىن جۇرەك مايىن شام قىلعان» كوزسىز باتىر، زامانىنان وزىپ تۋعان ءبىلىمدى دە بىلىكتى بيىك ورە يەسى ەدى»، - دەدى ب.بايبەك.

بۇگىندە ازاتتىقتىڭ اق تاڭى اتىپ، سول بابالار ارمانى ورىندالدى. تاۋەلسىزدىكتىڭ 25 جىلدىعىنا قادام باسۋدامىز. بۇل اتاۋلى داتانىڭ ۇلت مۇراتىن كوكسەگەن ۇلى تۇلعانىڭ 150 جىلدىعىمەن تۇسپا-تۇس كەلۋى دە تەگىن بولماسا كەرەك. ويتكەنى ءاليحان نۇرمۇحامەد ۇلىنىڭ 150 جىلدىق تويى يۋنەسكو كولەمىندە تويلانۋدا. بۇل جونىندە 18 قاراشادا يۋنەسكو-نىڭ پاريجدە وتكەن باس كونفەرەنسياسىنىڭ 38ء-شى سەسسياسىندا بەلگىلى بولعان ەدى. سونىمەن قاتار، سانكت-پەتەربۋرگتە ءاليحان بوكەيحانوۆتىڭ ەسكەرتكىش-بيۋستى قويىلاتىن بولدى.

سالتاناتتى كەشتە ءاليحان بوكەيحانوۆقا ارنالعان ءومىرباياندىق دەرەكتى فيلم كورسەتىلدى.

جالپى، جىل باسىنان بەرى الماتى قالاسىندا مەرەيلى داتاعا وراي بىرنەشە شارا وتكىزىلگەن. قازاق ۇلتتىق ۋنيۆەرسيتەتىندە «ءاليحان بوكەيحانوۆ جانە الاش مۇراسى» اتتى عىلىمي-پراكتيكالىق كونفەرەنسيا وتكىزىلسە، ۇلتتىق كىتاپحانادا ارنايى مەرەيتويلىق كورمە ۇيىمداستىرىلعان بولاتىن.