الەۋمەتتىك جەلىدە ءدىني كوزقاراستارىن باتىل ايتىپ، قىزدى-قىزدىمەن مەشىتتەن باستاپ قاۋىپسىزدىك ورگاندارىنىڭ قىزمەتىنە دەيىن سىناپ-مىنەپ تاستايتىن تالعات رىسقۇلبەك ەسىمدى جەلى قولدانۋشىسى روجدەستۆو قارساڭىندا تاعى دا اتقا قونىپتى. بۇل جولعى نىساناسى – ءمۇفتيات تا، ۇقك دا ەمەس، وسىعان دەيىن ەل وزىمەن پىكىرلەس، مۇددەلەس دەپ ساناپ كەلگەن ءماجىلىس دەپۋتاتى، جىرشى، ۇلتتىق سپورت تۇرلەرى قاۋىمداستىعىنىڭ باسشىسى بەكبولات تىلەۋحان. 19 قاڭتار كۇنى استانادا كونسەرت بەرگەلى وتىرعان جىرشىنى ت. رىسقۇلبەك ب ا ق پەن بيلىكتى كوتەرە المادى، ناپسىگە ەرىپ كەتتى دەپ ايىپتاپتى. جۇرتتىڭ جاعاسىن ۇستاتپاسا دا، كوپتىڭ تاڭدانىسىن تۋعىزعان تالعاتتىڭ بۇل تاپسىرلەۋىنەن تۇسىنگەنىمىز، قولىنا دومبىرا الىپ، ساحناعا شىققان جان ءناپسىسىن تىيا الماعان، اللاسىنان الىستاپ، جىننىڭ جەتەگىندە كەتكەن ادام ەكەن.

«جەل تۇرعاندا تۇيەنى شايقالتسا، ەشكىنى كوكتەن ىزدە» دەۋشى مە ەدى...
بەكبولاتتىڭ ءدۇيىم جۇرتتى جيناپ، ەسترادامەن كونسەرت بەرۋى، قانشا ءتاۋھيدشىل دەسەك تە، اقىلعا قونىمسىز ەكەنى راس. ۇلتتىق فولكلور دەپ، دومبىراسىن قۇشاقتاپ ءبىراز ءجۇردى دە، مىنە ەندى، قانشا دەگەنمەن ءناپسىسىنىڭ دەڭگەيىن كورسەتىپ تىندى. ءجۇز جەردەن اقتاساق تا، شاريعات تۇگىلى، اتا-بابام بۇلاي باتىستىڭ داڭعازا-ەستراداسىمەن «كونسەرت» قويماعان ەدى. 

جاقتاۋشىلار وزىنە ايتپادىڭ با دەرسىڭدەر، وزىمەن سويلەسىپ، ايتۋداي-اق ايتتىم-اۋ... تىڭدار قۇلاق كورمەدىم. 

ب ا ق، بايلىق، بيلىك بەرىپ سىنالعاندا، يماندىنىڭ يماندىسى عانا، ناپسىسىنە يە بوپ قالاتىنى اقيقات. ءيا، مەن تۇسىنەمىن بەكەڭدى. دەپۋتات بولۋ وڭاي ەمەس، ارينە. ەكى ءجۇز مىڭ xالىقتىڭ، بىرەۋىنىڭ عانا قولىنان كەلەر شارۋا ەمەس پە... دەسەك تە، وتكەندە بۇكىل وبلىستان «يت» قوسىپ قۋىلعان «91» توبىنىڭ وسىنشاما جەككورىنىشتى بولعانى، قازاققا جات «كورىنىسى» ەدى. بىلە بىلسەڭدەر، ولار دا وسىنداي «تيپا نورمالنىي» ەسترادالىق مۋزىكادان باستاپ، وسى «جەككورىنىشتى» دەڭگەيگە ءبىراق جەتىپ تىنعان ەدى. بەكبولات ونداي «دەڭگەيگە» بارا قويماس، ءبىراق سول داڭعازانىڭ باستاۋىن جاستارعا ءوزى اشىپ بەرىپ وتىرعان جوق پا ەكەن...؟!

بءىر اللاھقا قۇلشىلىق ەتىپ-اق جۇرگەن شىعار، دەگەنمەن جەمە-جەمگە كەلگەندە ءناپسىسىنىڭ قۇربانى بولعانى وكىنىشتى-اق»، - دەپ جازادى ت. رىسقۇلبەك.

جالپى، جىرشىلىق ونەرىمىزدىڭ بۇگىنگى تاڭداعى جۇيرىگى، ۇلتتىق سپورتتىڭ جاناشىرلارىنىڭ ءبىرى بەكبولات تىلەۋحانعا قارسى باعىتتالعان سىني پىكىر ءبىر بۇل ەمەس. ت. رىسقۇلبەكتىڭ بەكبولاتقا قارسى باعىتتالعان سونداي جازبالاردا بۇرىن دا اتى اتالعان. ماسەلەن، اقىن سەرىك بوقان الدىڭعى ءبىر جىلدارى «بەكبولات اداسىپ ءجۇر» دەپ ماقالا جازىپ، وندا بەكەڭنىڭ تاۋھيدشىلدىگىن تالعاتتان تومەن ەتىپ كورسەتكەنى بار.

ال، بەكبولات تىلەۋحانعا بۇل جولعى شۇيلىگۋدىڭ تۇپكى سەبەبى دەپۋتاتتىڭ ءدىني سەنىمىندە جاتىر ما، جوق الدە بەكەڭە شۇيلىگۋشىلەردىڭ شىنىمەن دە ۇلتتىق ونەر مەن ءسالت-داستۇردى سىرتقا تەبەتىن تەرىس اعىمنىڭ جەتەگىندە كەتكەنىنەن بە، ول جاعىن تاپ باسىپ ايتۋ قيىن. 

وسى ورايدا، جىرشى بەكبولات ءدىني ۋاعىزشى رەتىندە قۇرمەتتەيتىن دارىن مۋباروۆتىڭ ت. رىسقۇلبەكپەن قۇدا ەكەنىن دە تىلگە تيەك ەتە كەتكەن ءجون.