ق ر پرەزيدەنتى نۇرسۇلتان نازاربايەۆ كونستيتۋسيانىڭ 26-بابىن كەيىنگە شەگەرە تۇرۋ قاجەت دەپ سانايدى، دەپ حابارلايدى قازاقپارات.

مەملەكەت باسشىسى كونستيتۋسيانىڭ 26-بابىن وزگەرىسسىز قالدىرۋدى ۇسىنعانىن تاعى ءبىر مارتە ەسكە سالىپ: «نەگىزى، «قازاقستان ازاماتتارىنىڭ» ورنىنا «اركىم» دەگەن وزگەرىستى ەنگىزۋدى زاڭگەرلەر قاۋىمى تولىعىمەن قولدادى. سەبەبى سونىڭ ارقاسىندا ەلىمىزگە ينۆەستيسيانى كوبىرەك تارتۋعا مۇمكىندىك بار. ينۆەستورلاردىڭ سەنىمى دە ارتا تۇسەدى. دەگەنمەن، اسىعىستىق جاساماي-اق قويالىق. بىزگە كونسەنسۋس كەرەك. وسىنى كەڭىنەن ءتۇسىندىرۋ قاجەت. ءبارىبىر ءبىز وعان كەلەمىز. جەر ماسەلەسىندە دە ونداي بولادى. ويتكەنى يەسىز جەر توزادى. ونىڭ قۇنارلىعى جوعالادى. سوندىقتان كۇندەردىڭ كۇنىندە ونى ءتۇسىنىمۋىمىز كەرەك. «يەسى جوق جەر جەتىم» دەگەن قازاقتىڭ ءسوزى بار. تالاي رەت كورگەنبىز، قۋراي ءوسىپ، جەردىڭ توزىپ كەتكەنىن. بۇل باپتى كەيىنگە شەگەرە تۇرايىق»،-دەدى نۇرسۇلتان نازاربايەۆ پارلامەنت پالاتالارىنىڭ بىرلەسكەن وتىرىسىندا.

پرەزيدەنت زاڭدى جولمەن يەلەنگەن كەز كەلگەن جەكە مەنشىكتىڭ كونستيتۋسيامەن قورعالاتىنىنا باسا نازار اۋداردى.

ەستەرىڭىزگە سالا كەتەيىك، 1 ناۋرىز كۇنى مەملەكەتتىك بيلىك تارماقتارى اراسىندا وكىلەتتىكتەردى قايتا ءبولۋ ماسەلەلەرى جونىندەگى جۇمىس توبىنىڭ وتىرىسىندا قازاقستان رەسپۋبليكاسى كونستيتۋسياسىنىڭ قولدانىستاعى رەداكسياسىندا مەنشىك قۇقىعىنا قاتىستى 26-باپقا ۇسىنىلعان تۇزەتۋلەر تالقىلاندى. جۇمىس توبى مۇشەلەرى اتالعان نورماعا ۇسىنىلعان وزگەرىستەرگە قاتىستى حالىقتان ءتۇرلى ۇسىنىس تۇسكەنى تۋرالى ايتتى. نۇرسۇلتان نازاربايەۆ قازاقستان ازاماتتارىنىڭ پىكىرىن ەسكەرىپ، 26-باپقا وزگەرىس ەنگىزبەۋدى ۇسىندى.