1963 جىلى باربادوستا دجەنيفەر مەن دجۋن گيببونس ەسىمدى ەگىز قىزدار دۇنيگە كەلدى. قىزدار تەك بىر-بىرىمەن عانا سويلەسەتىن. ولار وزدەرى عانا تۇسىنەتىن ءتىلدى ويلاپ تاپتى. دارىگەرلەردىڭ ءبىرى ەگىزدەردىڭ سوزدەرىن ديكتافونعا جازىپ الىپ، ولاردىڭ  اعىلشىنشا سويلەيتىنىن انىقتاعان. وتە جىلدام سويلەگەندىكتەن ولاردى باسقالار تۇسىنبەگەن. كەيبىر عالىمدار بۇنى ەگىزدەردىڭ ينتەللەكتۋالدىق دەڭگەيىنىڭ جوعارى دامىعانىنىڭ بەلگىسى دەپ ەسەپتەيدى.

قىزدار دۇنيەگە كەلگەننەن كەيىن وتباسىمەن ۋەلسكە كوشەدى. قۇرداستارىنىڭ اراسىندا جالعىز قارا ءناسىلدى بولعاندىقتان، ولاردىڭ تاراپىنان كەمسىتۋ، قورلاۋعا ءجيى ۇشىرايتىن. وسىدان كەيىن ولار سىرتقى ورتادان بۇرىڭعىسىنان دا وقشاۋلانا ءتۇستى.

ەگىزدەردىڭ بىر-بىرىنە دەگەن ماحابباتى قانشالىقتى كۇشتى بولسا، جەككورۋشىلىك سەزىمى سونشالىقتى مىقتى بولدى. دجۋن ءوزىنىڭ كۇندەلىگىندە اپكەسىن الىپ كولەڭكە سەكىلدى الەمدى مەننەن وقشاۋلادى دەپ جازعان. دجەنيفەر دە ەكەۋىنىڭ اراسىندا تۇنشىقتىراتىن قارىم-قاتىناس ورناعانىن جازعان.

دارىگەر مەن اتا-اناسى قىزداردى ەكى بولەك وقۋ ورنىنا جىبەرەدى. الايدا، مۇنداي ءادىس كەرى اسەرىن بەرىپ، ولار بۇرىڭعىسىنان بەتەر سىرتقى ورتادان وزدەرىن الشاقتاي باستادى.

قىزدار قايتا قاۋىشقاننان كەيىن روماندار مەن اڭگىمەلەر جازا باستايدى. الايدا ولاردىڭ جازبالارى زورلىق-زومبىلىق، قاتىگەزدىك تۋرالى بولعان. باسپاحانالار مەن ب ا ق ەگىزدەردىڭ جازبالارىن شىعارۋدان باس تارتتى. وسىدان كەيىن اپكەلى-سىڭلى ادامدارعا شابۋىل جاساپ، ۇرلىققا بارادى. قىزداردىڭ پسيحولوگيالىق جاعدايىن تەكسەرۋ بارىسىندا ولاردا پسيحيكالىق اۋىتقۋلار بار ەكەندىگى انىقتالعان. ەگىزدەردى پسيحياتريالىق اۋرۋحاناعا جاتقىزادى. 11 جىل ءومىرىن قىزدار سوندا وتكىزدى.

اۋرۋحانادا  دجەنيفەر مەن دجۋن ءبىرىمىز باقىتتى عۇمىر كەشۋىمىز ءۇشىن ءبىرىمىز ءولۋىمىز كەرەك دەگەن ۇيعارىمعا كەلگەن. دجەنيفەر وزىنە قول جۇمساۋعا بەكىنەدى. ەگىزدەردى باسقا مەكەمەگە اۋىستىرعاندا دجەنيفەر اپكەسىنىڭ الدىندا ءولى كۇيىندە جاتقان. مەديسينالىق تەكسەرۋ بارىسىندا ميوكارديدان كوز جۇمعانى بەلگىلى بولدى. الايدا قىزدىڭ قانىنان جۇرەگىنە اسەر ەتەتىن ەشقانداي ءدارى تابىلماعان. ول كەزدە دجەنيفەردىڭ جاسى 30-دا ەدى.

ءقازىر دجۋن گيببس اتا-اناسىنىڭ ۇيىندە تۇرادى. ونىڭ جاسى 53-تە جانە ول الەۋمەتتىك ورتاعا بەيىمدەلگەن. دەسەك تە، ونى بارلىعى تۇسىنە بەرمەيدى.