شەتەل مۇراجايلارىنداعى قازاقستاندىق قۇندى جادىگەرلەردى ەلگە قايتارۋ كەرەك. بۇگىن ماجىلىستە قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەدي ۇلىنىڭ قاتىسۋىمەن وتكەن ۇكىمەتتىك ساعاتتا دەپۋتات گۇلنار ىقسانوۆا وسىنداي ۇسىنىس تاستاعان.

Bnews.kzء-تىڭ جازۋىنشا دەپۋتات: "الەمدەگى كوپتەگەن مۇراجايلاردا، ماسەلەن، لۋۆر، بريتان مۇراجايى، بريتان كىتاپحاناسى، مەتروپوليتەن-مۋزەي، ەرميتاجدا ءبىزدىڭ مادەني قۇندىلىقتارىمىز بار. قازاق حاندارىنىڭ حاتتارى، رۋنا جازبالارىنىڭ ەسكەرتكىشتەرى، قالالاردىڭ كارتالارى، كەنەسارىنىڭ قىلىشى، بوكەي ورداسى حانىنىڭ سۋرەتى، ابىلاي حاننىڭ زاتتارى سەكىلدى جادىگەرلەر شەتەلدە قويىلعان. وسى ەكسپوناتتاردى بىرتىندەپ قايتارۋ بويىنشا ستراتەگيالىق جۇمىس جۇرگىزۋ قاجەت. بۇل ءبىزدىڭ ۇلتتىق يدەيامىز بولۋى ءتيىس"، - دەپ ءوز ۇسىنىسىن جەتكىزگەن.

قامشى-اقپارات