الماتىداعى ستۋدەنتتەردىڭ جاتاقحاناسى جالعا بەرىلگەن. ال شالعايدان ءبىلىم ىزدەپ كەلگەن جاستارعا جاسالعان جاعداي كوزبوياۋشىلىق. ستۋدەنتتەر ۇيىندە جۋىناتىن بولمەسى، جاتتىعۋ جانە وقۋ زالدارىنىڭ ەسىگى قۇلىپتاۋلى تۇر. الماتى قالالىق جاستار ساياساتى باسقارماسى باستاپ، قوعامدىق ۇيىمدار قالاداعى بىرنەشە وقۋ ورىندارىنىڭ جاتاقحاناسىن قاراپ شىقتى. كۇتپەگەن  قوناقتاردان تىعىلعان بوگدە ادامدار مەن باسشىلاردىڭ ءۋاجى مىناداي.

بۇل تۋرالى الماتى تەلەارناسى حابارلايدى.

بۇل قازاق ۇلتتىق اگرارلىق ۋنيۆەرسيتەتىنىڭ ستۋدەنتتەر ءۇيى. ستۋدەنتتەرگە ارنالعان جاتاقحانادا تۇراتىن ادامدار اياق استى كەلگەن تەكسەرىستى كۇتكەن جوق. ءار بولمەنىڭ ەسىگىندە كىمدەردىڭ جانە قاي كۋرس ستۋدەنتتەرى ءتۇراتىنى انىق جازىلعان. سول ەسىكتەردىڭ بىرىندە ەشقانداي اقپارات جوق. ىشىنەن جاۋىپ العان ەسىكتى پوليسەيلەر اشقىزا المادى. جالپى اگرارلىق ۋنيۆەرسيتەتتە ونعا جۋىق جاتاقحانا بار. وقۋ ورنى جەتەكشىلەرىنىڭ ايتۋىنشا، ءبىر عيمارات ارنايى قىزمەتكەرلەرگە، دوكتورانتتار مەن ماگيسترانتتارعا بەرىلگەن. قالعاندارىندا تەك كىلەڭ ستۋدەنتتەر تۇرادى ەكەن. ءبىراق تەكسەرىس بارىسىندا جانۇيالى جانداردىڭ دا تۇراتىنى بايقالىپ قالدى. اتالعان ۋنيۆەرسيتەت جاتاقحاناسىندا بيىلدىڭ وزىندە ەكى ستۋدەنتتىڭ ءومىرى قيىلعان. ءبىراق وقىس وقيعالاردى جاسىرىپ باعۋعا تىرىسقان باسشىلار اقىرى ولىمگە سوقتىرعان ءىستىڭ ورىن العانىن راستادى. 

«وقىس جاعداي بولدى. مىناۋ جاڭاعى قار كوشكىنى بولىپ، ءبىر قىزىمىزدى ۇستىنەن باسىپ قالىپ، سونداي ءبىر جاعداي بولدى. وكىنىشكە وراي»،- دەدى قازاق ۇلتتىق اگرارلىق ۋنيۆەرسيتەتى تەحنولوگيا جانە بيورەسۋرستار فاكۋلتەتىنىڭ  دەكانى، باتىرحان بۇرالحييەۆ. 

ەسكىرگەن جاتاقحانا، توزىعى جەتكەن بولمەلەر، سىنعان ورىندىقتار، اۋىستىراتىن ۋاقىتى الدەقاشان ءوتىپ كەتكەن  كارىس جەلىلەرى، لاس بولمە. «اقبوتا» دەپ اتالاتىن ستۋدەنتتەر ءۇيىنىڭ قازىرگى جاعدايى وسىنداي. 

«جاتاقحانادا تولىق جاعداي جاسالعان دەپ ايتا المايمىز. كەيبىر بولمەلەردە بىزدە سىلاق قۇلاپ جاتىر. كەيبىر بولمەلەردە رەمونتتى شالا-پالا جاساعان. ءبىزدىڭ ماقسات ەكى اپتانىڭ ىشىندە 94 جاتاقحانانى ءجۇرىپ ءوتىپ، ناقتى ستۋدەنتتەردىڭ مازاسىن الىپ وتىرعان جاعدايلاردى جوعارى وقۋ ورىندارىنىڭ باسشىلارىنا كورسەتۋ»،- دەدى جاستار ساياساتى ماسەلەلەرى جونىندەگى باسقارما باسشىسىنىڭ مىندەتىن اتقارۋشى، شىڭعىس بەسكەمپىروۆ.  

سونىمەن قاتار، قانىش ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ جاتاقحاناسى دا بار. جالپىلاما العاندا جاقسى كورىنگەنمەن، جاتاقحانانىڭ جىپكە تىزەر كەمىشىلىكتەرى كوپ. جۇزدەگەن ستۋدەنتتەر جۋىناتىن دۋش اپتاسىنا ءۇش اق كۇن، ونىڭ وزىندە ارى كەتسە ءۇش ساعات قانا جۇمىس ىستەيدى. ال، وقۋ جانە جاتتىعۋ زالدارى ستۋدەنتتەرگە ەمەس، زات ساقتايتىن  قويماعا اينالعان. كىرگەن شىققاندى قالت جىبەرمەي، قاۋىپسىزدىكتى قاداعالايدى دەپ قويىلعان كامەرالاردىڭ اتى عانا.   

«ۇل بالالار مەن قىز بالالاردىڭ بولمەلەرى بىر-بىرىنە قاراما قارسى. ءار ءتۇرلى كۋرستاردىڭ بىرگە جاتۋى كۇش كورسەتۋ شارالارىنىڭ فاكتورى رەتىندە انىق كورسەتىپ وتىر»،- دەدى ستۋدەنتتەر اليانسىنىڭ  جەتەكشىسى، البينا سارييەۆا.

«دارەتحانادا ءتورت كابينكا بار. ونىڭ ەكەۋى جۇمىس ىستەمەيدى. جۋىناتىن بولمەنىڭ ءىشى لاس جانە ونىڭ ءبىر راكۆيناسى جۇمىس ىستەمەيدى. جاتاقحانانىڭ تۇرعىندارى رەمونتىنا ءار بولمەگە ءوز قالتالارىنان قارجى شىعارادى»،- دەدى جاستار كونگرەسىنىڭ جەتەكشىسى، ساندۋعاش ساندىبايەۆا. 

ەلىمىزدىڭ ءاربىر ءۇشىنشى ستۋدەنتى  الماتىدا ءبىلىم الادى. ءبىلىم الىپ جاتقان جاستاردىڭ سانى جالپى 140 مىڭعا جۋىق. قالادا 38 جوعارى وقۋ ورنى بار بولسا،ولاردىڭ 7-ەۋى  ۇلتتىق مارتەبەگە يە.  ءبىراق، ءبىلىم بەرۋمەن بيزنەستى دە قاتار جالعاستىرىپ جاتقان  وقۋ ورىندارىنىڭ بارلىعىندا ارنايى ستۋدەنتتەرىنە ارنالعان جاتاقحانا جوق. ال، الماتىدا 90-نان استام جاتاقحانا بولسا، وندا تۇراتىن قىزمەتكەرلەر مەن ىزدەنۋشىلەر سانى نە بارى 30 مىڭ.