30 ءساۋىر كۇنى (باست. 17.00 دە) م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ۇلكەن زالىندا قازاقستاننىڭ حالىق ءارتيسى ءاشىرالى كەنجەيەۆتى ەسكە الۋ كەشى وتەدى دەپ حابارلايدى قامشى اقپاراتتىق اگەنتتىگى تەاتردىڭ "باسپاسوزبەن جۇمىس جاساۋ"بولىمىنە سىلتەمە جاساي وتىرىپ.
ءاشىرالى كەنجە ۇلى 1946 جىلى 6 قاڭتاردا وڭتۇستىك قازاقستان وبلىسى، كەلەس اۋدانى، كولتوعان اۋىلىندا دۇنيەگە كەلگەن. 1964 جىلى الماتىداعى قۇرمانعازى اتىنداعى ونەر ينستيتۋتى تەاتر فاكۋلتەتىنىڭ اكتەر بولىمىنە كسرو حالىق ءارتيسى، كسرو مەملەكەتتىك سىيلىقتىڭ لاۋرەاتى، پروفەسسور حاديشا بوكەيەۆانىڭ شەبەرحاناسىنا تۇسەدى. ستۋدەنت كەزىنەن-اق ەرەكشە دارىنىمەن تانىلعان ءا.كەنجە ۇلى ينستيتۋتتىڭ 4 كۋرسىندا وقىپ ءجۇرىپ، م.اۋەزوۆ اتىنداعى دراما تەاترىنا قىزمەتكە قابىلدانادى.
سول جىلداردان بەرى ءا.كەنجە ۇلى 33 جىل بويى تەاتر ونەرىنە جان اياماي قىزمەت ەتتى، وسى تەاتردىڭ ساحناسىنان تۇسپەدى. شىعارماشىلىق عۇمىرىندا ول قوزى («قوزى كورپەش-بايان سۇلۋ»)، الشاعىر («قاراقىپشاق قوبىلاندى»)، كوتىبار («ايمان-شولپان»)، كەڭگىرباي («ەڭلىك-كەبەك»)، اباي («اباي-ايگەرىم»)، شوقان (شوقان ءۋاليحانوۆ)، تاعى دا باسقا بەينەلەردى ءساتتى سومداپ، شەبەر ويىنى كورەرمەندەر جۇرەگىنە ۇيالادى.
ءاشىرالى كەنجە ۇلى جاساعان جۇزدەن اسا كەيىپكەرلەرىنىڭ ءارقايسىسى وزىندىك دارا مىنەزىمەن، بولمىسىمەن ەرەكشەلەنەدى. شەبەر ساحناگەردىڭ شىعارماشىلىعىنىڭ سوڭعى كەزەڭىندە ورىنداعان مارد («توميريس»)، قۇنانباي («اباي-توعجان») بەينەلەرى ايرىقشا كوزگە ءتۇسىپ، ماماندار تاراپىنان جوعارى باعا الدى. ونەر ءۇشىن تۋىپ، ساحنا ءۇشىن جارالعان جايدارى مىنەزدى، ادامي قاسيەتتەرى جوعارى ءا.كەنجە ۇلى بارلىق ورتادا سىيلى بولدى، اينالاسىنداعىلار قۇرمەت تۇتتى.
قازاق ساحنا ونەرىنە قوسقان ۇلەسى ءۇشىن ول 1982 جىلى قازاقستاننىڭ ەڭبەك سىڭىرگەن ءارتيسى، 1998 جىلى قازاقستاننىڭ حالىق ءارتيسى اتاعىن الدى.