ق ر مادەنيەت جانە سپورت ءمينيسترى ارىستانبەك مۇحامەدي ۇلى «ۆرەميا» گازەتىنىڭ تىلشىسىنە بەرگەن سۇحباتىندا ديماش قۇدايبەرگەنگە مەملەكەت تاراپىنان قاشان دا قولداۋ كورسەتىلىپ جۇرەتىنىن ايتتى. بۇگىنگى تاڭدا حالىق اراسىندا «مادەنيەت مينيسترلىگى ديماش اسا تانىمالدىلىققا يە بولعان سوڭ عانا جەتىستىگىنە ورتاقتاسىپ ءجۇر» دەگەن قاۋەسەتكە قاتىستى پىكىرىمەن ءبولىستى. سونداي-اق، اڭگىمە بارىسىندا ەكسپو-2017 كورمەسى اياسىندا وتەتىن ءىس-شارالار جونىندە ويىن ايتتى. ماسەلەن، رياننانىڭ ۋادە ەتىلگەن كونسەرتى وتپەيتىن بولىپتى. مۇنىڭ سەبەبىن سۇراعاندا، مۇحامەدي ۇلى ىركىلمەستەن ديماشتى رياننادان ارتىق قوياتىنىن ايتتى.
«ەكسپو-2017 ءۇشىن مينيسترلىك دايىنداعان مادەني باعدارلامعا شەتەل انشىلەرىنىڭ قاتىسى جوق. ءبىزدىڭ مىندەتىمىز – قازاقستاننىڭ كوپۇلتتى ونەرىنىڭ جەتىستىكتەرىن، ەڭ جاقسى تەاترلارى مەن مۇراجايلارىن كورسەتۋ. ماسەلەن، مەن ديماش قۇدايبەرگەندى كونسەرتكە قۋانا-قۋانا شاقىرا الامىن. 27 ماۋسىمدا «استانا ارەنا» ونىڭ ارقاسىندا تولىپ وتىراتىنىنا سەنىمدىمىن. مەن رياننا مەن مادوننادان گورى ديماش قۇدايبەرگەننىڭ كونسەرتىن كۇتەمىن».
سونىمەن قوسا، ديماش قىتايعا بارىپ، تالانتى ەل اسىپ كەلگەن سوڭ عانا مينيسترلىك ونى قولداي باستادى دەگەندەردى سىناپ، وسى ۋاقىتقا دەيىن قازاقتىڭ تالانت يەسىن قاشان دا بيىككە كوتەرىپ جۇرگەندەرىن ايتتى.
«مەن ديماشتى العاش 2012 جىلى «جاس قانات» بايقاۋىندا كورگەنمىن، سودان بەرى ونىمەن ارالاسىپ كەلەمىن. وسى ۋاقىتقا دەيىن ديماش حالىقارالىق، مەملەكەتتىك ءىس-شارالارعا قاتىسىپ كەلدى، ونىڭ رەپەرتۋارىن، دەڭگەيىن جاقسى بىلەمىز. ول – قازاق ۇلتتىق ونەر ۋنيۆەرسيتەتءىءنىڭ ستۋدەنتى. ءسويتىپ، ءبىز مەملەكەت اتىنان ديماشتى «سلاۆيان بازارىنا» جىبەردىك، ول جەڭىسپەن ورالدى. قىتايدىڭ Hunan تەلەارناسىندا وتكەن بايقاۋعا مادەنيەت مينيسترلىگىنىڭ قارجىسى ەسەبىنەن باردى. جوبا بارىسىندا ديماش قازاق ءانىن شىرقايتىن كەزدە ءبىز ونەر اكادەمياسىنىڭ فولكلورلىق-مۋزىكالىق توبىن جىبەردىك، سونداي-اق، ديماش پەن ونىڭ وتانى قازاقستان تۋرالى فيلم تۇسىرگەن Hunan TV ارناسى ءتۇسىرىلىم توبىنىڭ استاناعا كەلۋىنە جاردەمدەستىك. ديماشتىڭ 2016 جىلدىڭ قىركۇيەگىنەن بەرى «قازاقكونسەرتتىڭ» شتاتتاعى قىزمەتكەرى ەكەنىن ەكىنىڭ ءبىرى بىلە بەرمەيدى. بۇل دا مەملەكەتتىڭ قولداۋى. ديماش قۇدايبەرگەن – بارشا حالقىمىزدىڭ ماقتانىشى، ءسوزسىز تالانت يەسى. ءبىز جاس تالانتتىڭ اشىلۋىنا كومەكتەسىپ جاتىرمىز، ول ءبىزدىڭ مىندەتىمىز. جانە ديماشتى جارقىن بولاشاق كۇتىپ تۇرعانىنا سەنىمدىمىن».