الداعى كەلە جاتقان 7 مامىر مەرەكەسىنىڭ ۇلكەن ءمانى بار. ءار حالىق ءۇشىن ەڭ قىمباتى – وتانى. ول جۇمىر جەردەگى سەنىڭ ءتاۋ ەتەر بولشەگىڭ. قازاق باقىتتى حالىق. ءوز ەلى، ءوز جەرى، ءوزىنىڭ ايبىندى، مۇحيت اسىپ، جەر-جاھان تانىعان، ابىرويى اسقاق ەلباسى بار. سول ەلىن سۇيگەن، ەلى سۇيگەن اردا ۇلى – ۇلت كوشباسشىسىنىڭ باستاماسىمەن جىلدان جىلعا الەمدىك ساحنادا بەدەلى بيىكتەپ بارا جاتقان جاسامپاز ورنى بار. ءبىز، ءتاۋباشىل حالىقپىز، ءتاۋبا دەيمىز. ماڭگىلىككە بەت بۇرعان ماقساتىمىز باياندى بولعاي. 

وتتان ىستىق وتانىمىز ءۇشىن ەڭ باستى قۇندىلىق ول قاۋىپسىزدىك. بەرەكە باسى دا بىرلىك پەن بەرەكە بولعان جەرگە ۇيالايدى. باياعىدا بىرەۋ تىنىشتىقتىڭ ءقادىرىن تىنىشسىزدىق ورناعان جەردە ءجۇرىپ بىلەرسىڭ دەپتى. شىن ءسوز. جانى بار ءسوز. الەمنىڭ ءار تۇپكىرىنەن كۇنسايىن ءبىرىن ءبىرىنىڭ جانىن الىپ، شايپاۋ تىرلىك كەشىپ جاتقان جۇرت از ەمەس. ولاردىڭ بولاشاعى، ەلدىك ماسەلەسى بۇلىڭعىر. سوعان قاراپ، باقىتتىڭ مەكەنىنە اينالعان قازاق ەلىندەگى كوپۇلتتى مەملەكەتتىك ساياساتتىڭ دۇرىستىعىنا جانە ەلباسىنىڭ كورەگەندىگىنە تاعى ءبىر مارتە باس يزەيسىڭ.

وتان قورعاۋشىلار كۇنىنىڭ ءمانى جوعارى ەكەندىگىن وسى جەردەن قايتارا توقتالىپ وتكىم كەلەدى. وتان ەڭ اۋەلگى قۇندىلىعىمىز دەسەك، وتان قورعاۋشى ونىڭ كۇزەتشىسى، ونىڭ قورعانى، ونىڭ ايبىنى. سوندىقتان دا ولارعا ءبىزدىڭ ەڭ اسىلىمىزدى سەنىپ تاپسىرىلعان. ەڭ جوعارعى سەنىم وتان قورعاۋشىلارعا جۇكتەلگەن.  باسقا باسقا، وتاندى قورعاۋ ول جانمەن، بويداعى بارىڭمەن ەلگە، جەرگە قىزمەت ەتۋ دەگەن ءسوز. بۇگىنگى ماقالامىزعا ارقاۋ بولىپ وتىرعان ازاماتىمىزدا وسى سوزدەردى جۇرەگىمەن تەرەڭ سەزىنىپ، تۇيسىككەن.  

جاسىراتىنى جوق، ءار ادامنىڭ ماڭدايىنا جازعان قىسقا عۇمىرىندا ءوزىنىڭ بۇكىل جان-دۇنيەسىمەن، بولمىس بىتىمىمەن تاڭداعان سۇيىكتى ماماندىعى بولادى. ءبىزدىڭ كەيىپكەرىمىز  قازاقستان رەسپۋبليكاسى ۇلتتىق ۇلانىنىڭ «وڭتۇستىك» وڭىرلىك قولباسشىلىعىنىڭ جەدەل باسقارما باستىعىنىڭ ورىنباسارى پودپولكوۆنيك باتىربەك مۇسىرەپوۆ اسكەري قىزمەتتى جاستايىنان-اق جانىنداي جاقسى كورىپ، قالاپ العان جولى. 

ول الماتىنىڭ ىرگەسىندەگى قاسكەلەڭ اۋىلىندا 1980 جىلى دۇنيەگە كەلدى. اكەسى سەيسەن مەن اناسى ەرەنكۇلدىڭ وتباسىندا باقىتتىڭ بال شەكەرىن ءىشىپ، ۇيەلمەلى-سۇيەلمەلى جەتىلگەن ون بالانىڭ سەگىزىنشىسى. اكەسى مارقۇم «بىرەۋدىڭ الا ءجىبىن اتتاماڭدار. ادالىنان ەڭبەك ەتىپ، ەلگە، جۇرتقا جاقسىلىق جاساۋدان تارتىنباڭدار. سوندا عانا ناعىز ازامات اتاناسىڭدار»، دەگەن تاربيەسىن كورىپ وسكەن باتىربەك اكە اماناتىنا ءسال قىلاۋ ءتۇسىرىپ كورگەن ەمەس. وڭىنان ءجۇرىپ، شاماسى كەلسە جاقسىلىق جاساۋعا جان ۇشىرىپ تۇرعانى. 

2000 جىلى ارناي اسكەري ءبىلىم الىپ، قىزمەت جولىن ۇلتتىق ۇلاننىڭ قاراكەمەر كەنتىندەگى وقۋ ورتالىعىندا ۆزۆود كومانديرى بولىپ باستادى. كەيىن پەتروپاۆلداعى اسكەري ينستيتۋتتا قىزمەت اتقاردى. وسى جەردەن استاناداعى ەلباسى اتىنداعى ۇلتتىق قورعانىس ۋنيۆەرسيتىنە وقۋعا ءتۇستى. وقۋعا ءتۇسىپ قانا قويماي، ونى ۇزدىك ءبىتىردى. كەيىن وسى بىرەگەي وقۋ ورنىنىڭ دوكتورانتۋراسىن دا ويداعىداي ءتامامدادى. سول اسكەري ءبىلىمنىڭ ورداسىندا ۇستازدىق ەتتى. ارينە، بۇنىڭ بارلىعى دا بىرەر ءسوزدى حاتقا ءتۇسىرىپ، جازعانعا عانا وڭاي بولار. ونىڭ ارتىندا باتىربەكتىڭ ەڭ اۋەلگى بىلىمگە دەگەن، بىلۋگە دەگەن قۇلاش اشقان قۇشتارلىعى جاتسا، ەكىنشىدەن ەڭبەكتى سۇيە بىلگەن ىنتازارلىعى جاتقانى راس. ءبىراق ول قاي اسكەري قۇرىلىمدا قىزمەت اتقارىپ، قانداي لاۋازىمىنىڭ تۇتقاسىن ۇستاماسىن، اسكەري انتقا ادالدىعىن ۇنەمى ىسىمەن، كاسىبي شەبەرلىگىمەن دالەلدەپ كەلە جاتقان ازامات. قاراماعىنداعى قىزمەتكەرلەرگە دەگەن اعالىق جاناشىرلىعى مەن بىلگەنىن ۇيرەتۋگە تىرىساتىن باۋىرمالدىعىنىڭ ارقاسىندا ارىپتەستەرىنىڭ اراسىندا زور سىي-قۇرمەتكە بولەنگەن. ءمىنسىز اسكەري قىزمەتى جولىندا تالاي ماراپات پەن ماقتاۋلارعا يە بولدى دا. ولاردىڭ قاتارىندا «ءمىنسىز قىزمەتى ءۇشىن» كەۋدە بەلگىسىنىڭ ءۇش بىردەي دارەجەسىن يەلەنگەنىن، «قارۋلى كۇشتەرگە – 10 جىل»، «ارميا گەنەرالى ساعادات نۇرماعانبەتوۆ» اتىنداعى، «جەڭىستىڭ 70 جىلدىعىنا» ارنالعان مەدەلدارمەن ماراپاتتالعان.       

قارۋ ۇستاپ ەل قورعاپ جۇرگەن ءار ازامات ءۇشىن ەڭ باستىسى جەدەلدىگى جانە جەكە باسىنىڭ جاۋىنگەرلىك دايارلىعى. وزدەرىڭىزگە كورىپ، ءبىلىپ جۇرگەندەرىڭىزدەي الەمنىڭ تۇپكىر-تۇپكىرىندە نەبىر قىمعۋىت وقيعالاردى كورۋگە بولادى. تاپا-تال تۇستە قىرىپ-جويىپ، ءبىرىن بىرىنە قارۋ الىپ شابۋىلداپ، لاڭكەستىكتىڭ ويرانىن سالىپ جۇرگەن جاعدايلار تاڭسىق بولماي بارادى. سوندىقتان دا ءبىز بۇنداي وقيعالارعا، وسىلارمەن ىمىراسىز كۇرەسۋگە ساقاداي ساي بولۋعا، حالقىمىزعا تيتتەي دە قاۋىپ-قاتەر تۋدىراتىن جاعدايلاردى بولدىرماۋعا ءبىز جەدەل تۇرعىدا دايىن بولۋىمىز كەرەك. بۇل كەزەكتە ءبىزدىڭ باسقارمانىڭ جەتەكشىلىگىمەن وڭىرلىك قولباسشىلىقتىڭ ءتىيىستى قىزمەتتەرى ۇدايى دايىندىقتارىن پىسىقتىپ وتىرادى، - دەيدى پودپولكوۆنيك ب.مۇسىرەپوۆ بىزبەن اڭگىمەلەسكەندە.

اسقارالى ازاماتتىڭ جان-جارى زۋحرا دا ەرىنە تىرەۋ بولعان جان. ەكەۋى شاحسەنەم، باقىت، سۇلاتاناي ەسىمدى قىزدارىن ونەگەلى تاربيەلەپ ءوسىرىپ وتىر. ەندى اكە جولىن قۋار ۇلدارى بولسا دەگەن ارماندارى دا جوق ەمەس.       

ءيسى قازاققا تانىمال، ساناڭا وي سالار «نە پايدا» اتتى تالعامدى ءاننىڭ ماتىنىندە: «بۇل ومىردەن نە پايدا، حالقىڭا قىزمەت ەتپەسەڭ» دەگەن جولدار بار. ءيا، شىندىعىندا دا وتانىڭ، حالقىڭا، تۋعان جەرىڭە يىلە قىزمەت ەتپەسەڭ، قۇر سۇلدەنى كوتەرىپ جەر باسىپ جۇرگەننەن نە پايدا، نە ءعارىپ. قايتارا ايتقاندا، تۋعان ەلگە قىزمەت ەتۋدىڭ ەڭ اسقارالى شىڭى، ءقادىرلىسى دە قۇرمەتتىسى ونى كوز الارتقان جاۋدان قورعاۋ، تىنىشتىعىن كۇزەتۋ ەكەنى راس.

ۇلتتىق قاۋىپسىزدىگىمىزدىڭ بىردەن ءبىر تەمىرقازىعى بولىپ سانالاتىن مەملەكەتتىڭ ىشكى تىنىشتىعىنىڭ سەنىمدى كۇزەتىلۋىنە ۇلەسىن قوسىپ جۇرگەن ماقالامىزدىڭ باس كەيىپكەرىنىڭ ەڭبەگى دە پارىقتى ءھام ابىرويلى. ارماندارىڭا جەتە بەر العاداي ازامات. وتان قورعاۋشىلار كۇنى مەن ۇلى جەڭىس مەرەكەسى قۇتتى بولسىن!   

مايور ارمان اۋباكىروۆ، الماتى قالاسى