بۇگىن قازاقتىڭ جەزتاڭداي ءانشىسى رامازان ستامعازييەۆ ەردىڭ جاسى ەلۋگە تولدى. رامازان ستامعازييەۆتىڭ ءوزى قانداي بيىككە جەتسە دە، قازاقى قاراپايىم قالپىنان اينىعان ەمەس. ونىڭ قوڭىر داۋىسى قازاق دالاسىنىڭ تۇكپىر-تۇكپىرىنە جەتىپ، ونەر سۇيەر قاۋىمنىڭ جۇرەگىنە جاتتالىپ قالعان. رامازان ستامعازييەۆ دومبىراسىن جاي عانا سابالاپ جۇرگەن ونەرپاز ەمەس، قازاقتىڭ قاي اۋىلىنا بارسا دا ءتورىن ۇسىناتىن بۇگىننىڭ سال-سەرىسى. قازاق ءان ونەرىنىڭ قاي مەكتەبىنىڭ بولسا دا ءانىن ناقىشىنا كەلتىرىپ شىرقاپ جۇرگەن رامازان ستامعازييەۆ ۇلگىلى ۇستاز، نەمەرەلەرىنە سۇيىكتى اتا، 30 جىلدان بەرى قازاقتىڭ حالىق اندەرى مەن ءداستۇرلى اندەرىن كەڭىنەن ناسيحاتتاپ جۇرگەن قازاقستاننىڭ ەڭبەك سىڭىرگەن ءارتىسى. 

رامازان ءومىرالى ۇلى  1967 الماتى وبلىسى رايىمبەك اۋدانى كوكپياز اۋىلىندا دۇنيەگە كەلگەن. ونەرگە بالا كەزىنەن قۇشتار بولعان. 1989 ج. الماتى ەسترادا-سيرك ۋچيليششەسىن (ق.بايبوسىنوۆ كلاسى بويىنشا) بىتىرگەن. 1989 جىلدان "قازاقكونسەرت" بىرلەستىگى قۇرامىندا ونەر كورسەتىپ ءجۇر. 1989 - 2005 جىلدارى قازاقكونسەرت ونەر بىرلەستىگىندە ءانشى. 2006 - 2009 جىلدارى قۇرمانعازى اتىنداعى قازاق ۇلتتىق كونسەرۆاتورياسىندا وقىتۋشى. 2009 - 2012 جىلدارى رەسپۋبليكالىق ەسترادا - سيرك كوللەدجىندە وقىتۋشى. 2012 جىلدان قازاق ۇلتتىق ونەر اكادەمياسىنىڭ "ءداستۇرلى ءان مۋزىكاسى" كافەدراسىندا وقىتۋشى، اعا وقىتۋشى، كافەدرا مەڭگەرۋشىسى لاۋازىمىن اتقارادى. 

ستامعازييەۆ شىرقاعان «قاپەزدىڭ ءانى»، «ەكى جيرەن»، «كوكشەتاۋ»، «تەمىرتاس» سياقتى الاش ارىستارىنىڭ اندەرى حالىقتىڭ قۇلاعىنا ونىڭ داۋىسىمەن سىڭگەن. «قامشى» اقپاراتتىق اگەنتتىگى ۇجىمى بۇگىنگى تۋعان كۇنىنە وراي انشىگە ۇزاق ءومىر، شىعارماشىلىق تابىس، شاڭىراعىنا شاتتىق، وتباسىنا باقىت تىلەيدى.