كەيبىر  قالالاردىڭ وزىنە ءتان وزگەشە قۇپياسى بولادى دەپ جاتادى. ال اتاقتى پاريج قالاسىنىڭ قانداي  قۇپياسى بولعاندىعى  تۋرالى قامشى اقپاراتتىق اگەنتتىگى وقىرمان نازارىنا  قىزىقتى دەرەك ۇسىنادى.

  ورتاعاسىرلىق پاريج ءبىز ويلاعانداي سيقىرلى، عاجاپ بولماعان ەكەن.  XIV عاسىردا پاريجدە  حالىق اراسىندا تانىمال ناۋبايشى ءومىر سۇرگەن. دەرەكتەرگە سۇيەنسەك، ول ناۋبايشىنىڭ قولىنان جاسالعان بارلىق دامدەردى  پاتشا كارل VI-نىڭ ءوزى ارنايى تاپسىرىسپەن الدىرتىپ وتىرعان.  ناۋبايشىنىڭ شاشتاراز دوسى بولعان. ەكەۋى جەرتولە استىنداعى ءبىر بولمەنى ءبولىسىپ بىرگە تۇرعان.

ەكى دوستىڭ ناقتى ەسىمدەرى بەلگىسىز. الايدا ناۋبايشىنىڭ بالىشتەرى بۇكىل پاريجگە تانىمال بولعان. تەك وسى بالىشتەردىڭ قۇرامىنا ادام ەتى دە كىرگەنىن ەكى دوستان باسقا ەشكىم بىلمەسە كەرەك.

ادام ەتىن  تاۋىپ بەرۋ قىزمەتىن شاشتاراز جىگىت جۇزەگە اسىرعان. ول زاماندا شاشتاراز ۇستاراشى قىزمەتىن دە اتقارعان. ولار تەك شاش قيىپ قانا قويماي، كليەنتتىردىڭ ساقال- مۇرتتارىن قىرعان. سونىمەن بىرگە، ولار ءتىس جۇلدىرتۋ، سۇلىكپەن ەمدەۋ سياقتى قىزمەتتەردى دە اتقارعان كورىنەدى. وسىعان بايلانىستى ۇستاراشى/شاشتارازدىڭ بولمەسىندەگى قان ىزدەرى ەشكىمدى تاڭقالدىرماعان دا، شوشىتپاعان.

ۇستاراشى سونداعى ەليتا وكىلدەرىنە تيىسپەگەن. تەك كەدەي، جالعىزباستى ادامداردى عانا «ەت» ەتكەن. ورنالاسقان تۇرعىلىقتى جەردە ۋنيۆەرسيتەت بولعاندىقتان كەلۋشى قۇرباندار شەگى تولاستاماعان. ۇستاراشىعا تەك قانا ناۋبايشىمەن كەلىسىپ قويۋ عانا كەرەك  بولعان. ۇستارامەن باۋىزدالعان ادام دەنەسىن جەرتولەدە ناۋبايشى كۇتىپ تۇرادى ەكەن. ارى قارايعى ارەكەت ناۋبايشىنىڭ قۇزىرىندا بولعان.

قاندىقولدار قۇرباندارىن بىرىككەن كۇشپەن بولشەكتەپ، قالعان دەنە قالدىقتارىن تاستاپ وتىرعان. ودان كەيىن باستى پروسەسس- وسى ەتپەن بالىشتەر ءپىسىرۋ. ول بالىشتەردەن  ءتىپتى پاتشاعا دەيىن ءدام تاتقان.

 1384 پەن 1387 جىلدار ارالىعىندا وسىنداي ىسپەن اينالىسقان ەكى دوستىڭ تۇبىنە جەتكەن نارسە مىناۋ بولدى:

ۇستاراشىعا كەلگەن كليەنتتەردىڭ ءبىرى ءيتىن بىرگە ەرتىپ كەلىپ، ونى سىرتتا بايلاپ كەتكەن. الگى كەلۋشى جىگىتتى باۋىزداپ جەرتولەگە كىرگىزىپ بولشەكتەپ جاتقان ارالىقتا سىرتتا تۇرعان يت يەسىن ىزدەپ ۇرە باستايدى. ەلدىڭ نازارىن اۋدارتقان يت بىر-ەكى كۇن بويى دالادا تۇرادى. يتكە نازار اۋدارعان جۇرت ونى بوساتقان ۋاقىتتا، ول الگى جەرتولەگە سەكىرىپ كىرىپ كەتەدى. وسى وقيعادا ەكى دوستىڭ قۇپياسى اشىلىپ قالادى.

ۇستالعاندار سوتتالدى، ءولىم جازاسىنا كەسىلىپ، ولاردى تىرىدەي ورتەدى. ساراي تۇرعىندارىنىڭ ىشىندە وسى ۋاقىتقا دەيىن قانداي ەت جەپ جۇرگەنىن بىلگەننەن كەيىن  قايتىس بولعاندار بار دەسەدى.

ارادا ءبىراز ۋاقىت ءوتىپ وسى قىلمىس ورىن العان ءۇي جەرمەن جەكسەن ەتىلگەن. بىرنەشە عاسىر بويى اتالعان ءۇيدىڭ ورنىنا ەشتەڭە سالىنباعان.

ال بۇگىن، ءدال وسى ءۇيدىڭ ورنى تۇبەگەيلى وزگەرىسكە ۇشىرادى. وندا جەرگىلىكتى پوليسيا ۋچاسكەسىنىڭ عيماراتى ورنالاسىپتى. ءدال  وسى ۋچاسكەدەگى كولىكجاي  شەتىندە ورنالاسقان تاس – سول زامانداعى  ەكى ازاپتاۋشىنىڭ قۇرباندارىن بولشەكتەگەن جەر بولعان ەكەن. 

دايىنداعان: نازەركە مۇسا