حاميت ىسقاق ءابىلقاسىم ۇلى – قىتايداعى قانداستار اراسىنان شىققان جۇڭگو حالىق رەسپۋبليكاسىنىڭ مەملەكەتتىك 1 دارەجەلى ءانشىسى. التى قىردىڭ استىنان ەستىلەتىن اسقاق ءۇنى، كەڭ دالانى كەرنەيتىن كەرىم ءانى ميلليونداردىڭ جۇرەگىنە جاتتالىپ قالعان. بىرەۋ بىلسە بىرەۋ بىلمەس، 1962 جىلى وتباسى بەرگى بەتكە اۋعان ەلمەن بىرگە كوشكەندە ول جۇڭگو قازاقتارىنداعى ان-مەن كۇيدى جيناۋدى ماقسات قويىپ، مۇمكىندىگى بولا تۇرا قالىپ قالعان.
1939 جىلى 10 قازاندا شاۋەشەك قالاسىندا دۇنيەگە كەلگەن. 1947-1958 جىلدارى شاۋەشەك قالاسىندا مەكتەپتە وقىعان. وعان قوسا 1951 جىلى قىركۇيەكتەن 1958 جىلى اقپانعا دەيىن اسكەري قوسىنعا قابىلدانىپ، التاي اسكەري رايونىندا جاۋىنگەر بولعان. 1959 جىلى قاڭتاردا شىڭجاڭ اسكەري رايونىنىڭ دەنە-تاربيە كومانداسىنا اۋىسقان. 1961 جىلى قازاندا شىڭجاڭ اسكەري رايونىنىڭ ويىن-ساۋىق ۇيىرمەسىنە ارتيست بولىپ قابىلدانعان. وسى ۋاقىتتان باستاپ حاميت ءابىلقاسىم ۇلى 40 جىلىن اسكەري سالاعا ارنادى. حاميت ىسقاق ۇلى ۇزاق جىلدار بويى قىتايدىڭ باتىس شەكاراسىنداعى اسكەري كازارمالاردا تۇرعان جاۋىنگەرلەرگە ءان ايتىپ بەردى، تيان-شان، كۇنلۇن، الي قارلى تاۋلارىنداعى كازارمالار مەن زاستاۆالاردى ارالاپ ءان شىرقادى. 1999 جىلى ماۋسىم ايىندا زەينەتكە شىققان. اسكەري شەنى گەنەرال-مايور. 2011 جىلى 30 قازاندا دۇنيە سالدى.
حاميت ىسقاق جۇڭگو اسكەري كۇشتەرى اراسىندا جەكە ورىنداۋشىلىقتان 1973، 1975، 1978، 1979، 1980، 1981 جىلدارى قاتارىنان 7 جىل ەڭ جوعارى سىيلىقتى يەلەنگەن. 1989 جىلى قحر 40 جىلدىعىندا بۇكىلقىتايلىق اسكەر اراسىندا ونەر بايقاۋىنان باس جۇلدەگە يە بولعان.
رەپەرتۋارىنا 300-دەن استام ءان جينالعان حاميت ىسقاق قىتايعا قازاقتىڭ 200-دەن استام اندەرىن تانىتتى، حالىق اراسىندا 5 ءۇن تاسپاسى تارادى. ول اسكەري قىزمەتىندە مەملەكەت اتىنان فرانسيا، سسسر(كەيىننەن بارلىق تمد مەملەكەتتەرى)، جاپونيا، شۆەيساريا، يوردانيا، پاكىستان، ارگەنتينا، ۆەتنامدا ءىسساپاردا بولعان. قىتايداعى مەملەكەت ىشىندە وتكەن ءتۇرلى ونەربايقاۋىندا كوپ التىن مەدالدار العان ءانشى 1993 جىلدان باستاپ جۇڭگو ورتالىق ۇكىمەتىنىڭ ەرەكشە سىياقىسىن الىپ وتىرعان. ول قاي مەملەكەتكە، قاي وڭىرگە بارسا دا تىم بوملاسا ءبىر ءاندى مىندەتتى تۇردە قازاقشا ورىنداپ وتىرعان.
حاميت ىسقاق شىڭجاڭداعى قازاقتار اراسىنان شىققان تەنور داۋىستى ايگىلى ءانشى. جۇرت ونى شىنايى كوڭىلدەرىمەن القاپ «قازاقتىڭ ءان پاتشاسى» دەپ اتاپ كەتتى. حاميتتىڭ تىنىسى كەڭ، داۋىسى زور، ءۇنى جاعىمدى، ءسوزى ۇعىمدى، ورىنداۋى قىزىقتى دا جالىندى، ساحنا تارتىمدىلىعى قۋاتتى بولعان. ول قازاقتىڭ عانا ەمەس ۇيعىردىڭ حالىق اندەرىن قازاق، ۇيعىر، جۇڭگو تىلدەرىندە تامىلجىتا شىرقاپ، قالىڭ ەلدىڭ قالاۋىن العان. 1965 جىلى جۇڭگو پرەمەر-مينيسترى چجوۋ ەنلاي شىڭجاڭداعى ۇلتتارمەن كەزدەسۋگە كەلەدى. وسى كەزدەسۋدەگى ساۋىقكەشتە حاميت ىسقاق ۇلىنىڭ ونەرىنە ءتانتى بولعان قىتايدىڭ رەفورماتور پرەمەرى چجوۋ ەنلاي شىڭجاڭ اۆتونوميالى اۋدانى باسشىسىنان: «مەن قازاقتىڭ جاس ءانشىسى حاميتتىڭ قازاقتىڭ قۇلاققا جاعىمدى حالىق ءانىن قايتالاي ايتىپ بەرۋىن سۇرايمىن » دەيدى. حاميت ىسقاق قازاقتىڭ حالىق ءانى «بوزتورعايدى» ىركىلمەي ايتىپ بەرگەندە، چجوۋ ەنلاي ساحناعا ادىمداي كوتەرىلىپ: «ءبىز ەندى «ءبىز كەلەمىز داڭعىل جولمەن» ءانىن ايتساق قالاي؟» دەپ ءىلتيپاتىن ءبىلدىرىپ، قازاقتىڭ انشىسىمەن قوسىلا ءان ايتادى.
وسىدان ون جىلدان كەيىنگى مەملەكەت مەرەكەسىندە، چجوۋ ەنلاي شەتەلدىك مامانداردى قابىلداپ، سالتاناتتى كەش وتكىزگەندە، مادەنيەت مينيسترلىگى مەن ارميانىڭ باس ساياسي باسقارماسىنداعى مادەنيەت ءبولىمى ارقىلى حاميت ىسقاقتى بەجىڭگە شاقىرتىپ الىپ، شەتەلدىك ماماندارعا شىڭجاڭنىڭ حالىق اندەرىن ايتقىزىپ بەرەدى. ونىڭ وزىنە ءتان ءان ايتۋ ءستيلى شەتەلدىك قوناقتاردىڭ قوشامەتىنە بولەندى.
وقىرمان نازارىنا "شىڭجاڭ 3" قازاق ءتىلدى تەلەارناسىنىڭ ءانشىنىڭ قازاسىنا وراي ارناۋلى حابارىن قوسا ۇسىنامىز. سونداي-اق، ءانشىنىڭ اندەرىن مىنا سىلتەمەدەن تىڭداي الاسىز. http://ankui.kz/
