بۇگىن قازاقستان مۇسىلماندارى ءدىني باسقارماسىنىڭ ۇيىمداستىرۋىمەن وسكەمەن قالاسىندا بەلگىلى ءدىن قايراتكەرى حاليفا التايدىڭ 100 جىلدىعىنا ارنالعان «بولاشاققا باعدار: رۋحاني جاڭعىرۋ جانە حاليفا التايدىڭ عىلىمي مۇراسى» اتتى حالىقارالىق كونفەرەنسيا ءوتتى، دەپ حابارلايدى قامشى اقپاراتتىق اگەنتتىگى. بۇل جونىندە قمدب باسپا ءسوز قىزمەتى جازدى.

كونفەرەنسيا جۇمىسىنا قمدب ءتوراعاسى، باس ءمۇفتي ەرجان قاجى مالعاجى ۇلى، رەسەيدىڭ ومبى، التاي ايماعىنىڭ مۇفتيلەرى، قمدب-نىڭ عالىمدارى مەن وكىل يمامدارى، حاليفا التايدىڭ ءومىرى مەن عىلىمي مۇراسىن زەرتتەۋشى عالىمدار، ءدىنتانۋشىلار، زيالى قاۋىم وكىلدەرى قاتىستى.

اتاپ ايتقاندا، بەلگىلى عالىم، عىلىم دوكتورى يسلام جەمەنەي، م.اۋەزوۆ اتىنداعى ادەبيەت جانە ونەر ينستيتۋتى ابايتانۋ جانە جاڭا ءداۋىر ادەبيەتى ءبولىمىنىڭ مەڭگەرۋشىسى، پروفەسسور سەرىكقازى قوراباي، رەسپۋبليكالىق الاشتانۋ ورتالىعىنىڭ ديرەكتورى تۇردىقۇل شاڭباي، رەسەيدىڭ ومبى ايماعىنىڭ ءمۇفتيى بوتا قاجى باكۋلين، رەسەيدىڭ التاي رەسپۋبليكاسىنىڭ ءمۇفتيى جانبولات قاجى وقتاۋبايەۆ، ت.ب. عالىمدار قاتىسىپ، مازمۇندى بايانداما جاسادى.

باس ءمۇفتي ەرجان قاجى مالعاجى ۇلى ءوز بايانداماسىندا: «تاريح قويناۋىنا كوز جۇگىرتسەك، ساق، عۇن، تۇرىك قاعاناتى، قاراقان مەملەكەتى، التىن وردا يمپەرياسى جانە قازاق حاندىعى داۋىرلەرىندە اتا-بابالارىمىز زامانا ۇدەرىسىنەن قالىس قالماي، قالا مەن كوشپەلى مادەنيەتتى قاتار دامىتىپ، قال-قادەرىنشە وزىق وركەنيەت جاساۋعا ۇمتىلدى. تاريحي سانامىزدى وياتۋ ماقساتىندا ۇلت كوشباسشىسى ن.نازاربايەۆتىڭ ۇيىتقى بولۋىمەن 2004 جىلى «مادەني مۇرا» باعدارلاماسى اياسىندا قازاقستان اۋماعىنداعى تاريحي-مادەني ەسكەرتكىشتەر مەن نىساندار جاڭعىرتىلدى. ال 2013 جىلى «حالىق – تاريح تولقىنىندا» باع­دارلاماسى ارقىلى الەمنىڭ ەڭ بەلدى ارحيۆتەرىنەن ءتول تاريحىمىزعا قاتىستى قۇجاتتاردىڭ كوشىرمەسى ەلگە اكەلىندى. بۇل ەلباسى ايتقان رۋحاني جاڭعىرۋعا ازىرلىك ىسپەتتى اتقارىلعان ەرەن ەڭبەكتەر ەدى. وسى تۇرعىدا قازاقستان مۇسىلماندارى ءدىني باسقارماسى دا 2013-2015 جىلدار ارالىعىن «ءدىن مەن ءداستۇر ساباقتاستىعى» جىلى دەپ جاريالاپ، وسى مەرزىم ىشىندە ءسالت-داستۇرىمىز بەن اسىل ءدىنىمىز كەڭىنەن ناسيحاتتالدى. سونىمەن بىرگە، 2016 جىل – «ءدىن جانە تاريح تاعىلىمى» جىلى دەپ اتالىپ، تاعىلىمعا تولى تاريحىمىز تۋرالى بىرنەشە زەرتتەۋلەر جاريالانىپ، كىتاپتار جارىق كوردى، كونفەرەنسيالار مەن دوڭگەلەك ۇستەلدەر ۇيىمداستىرىلدى. بۇل ءبىزدىڭ ەلباسىنىڭ ساياساتىن ءاردايىم قىزۋ قولدايتىنىمىزدى جانە قمدب-نىڭ قوعام ۇدەرىسىنەن تىس قالمايتىنىن كورسەتتى»، – دەپ اتاپ ءوتتى.

ايتا كەتەيىك، كونفەرەنسيانىڭ ماقساتى – ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىن ناسيحاتتاۋ، تاۋەلسىزدىك جىلدارىنداعى ەلىمىزدەگى ءداستۇرلى يسلامنىڭ دامۋ بارىسىن سارالاۋ، حاليفا التايدىڭ ەڭبەكتەرىن ناسيحاتتاۋ، جات اعىمداردىڭ الدىن الۋ، ءداستۇرلى يسلامعا نەگىزدەلگەن ۇلتتىق قۇندىلىقتاردى تانىتۋ ت.ب.

شولۋشى: گۇلىم جاقان