جاقىندا بارناۋلدا بۇرىن-سوڭدى بولماعان جاعداي ورىن الدى  دەپ جازادى قامشى اقپاراتتىق اگەنتتىگى. التايدىڭ پەريناتالدى كلينيكاسىنىڭ ماماندارى كەلىپ تۇسكەن جۇكتى ايەلدى قاراپ شىعىپ، ءوز كوزدەرىنە وزدەرى سەنبەدى.

شارانا 41ء-شى اپتاعا دەيىن جاتىردا ەمەس، قۇرساق قۋىسىندا بىتكەن. دارىگەرلەر بىردەن ايەلگە وپەراسيا جاسادى. ۋاقىت وتكىزىپ السا ولىمگە الىپ كەلۋى مۇمكىن ەدى.

الەمدە مۇنداي ونشاقتى وقيعا بولعان. سوندىقتان دارىگەرلەر وسى جاعدايعا دايىن بولدى.

جۇكتى ايەلگە وتا جاساي وتىرىپ، تاۋەكەلگە بەل بۋدى. سەبەبى قاتتى قانسىراۋدان ايەل مەن ونىڭ بالاسىنىڭ ومىرىنە ءقاۋىپ ءتوندى. ولاردىڭ باقىتىنا وراي، حيرۋرگ وتە تاجىريبەلى ءارى بىلىكتى مامان بولدى. ول وپەراسيانى ءساتتى جاساپ شىقتى.

دارىگەرلەر ايەلدىڭ تۋىلعاننان جاتىر موينىنىڭ دامۋىندا اقاۋ بولعان دەپ بولجايدى. ەمبريون اعزاداعى قالدىقتى مۇشەگە جابىسىپ، ول جارىلعاننان كەيىن قۇرساق قۋىسىنا تۇسكەن.

اناسىنىڭ باقىتىنا وراي قان كەتپەدى. سەبەبى ونىڭ ورنالاسقان جەرى مەن كولەمىنە بايلانىستى قانسىراپ ولىمگە دەيىن الىپ كەلۋى مۇمكىن ەدى.

دارىگەرلەر دەنى ساۋ بالانى دۇنيەگە الىپ كەلۋ ءۇشىن قانداي كۇش جۇمساعانىن ەسكەرە وتىرىپ، قىزىن ۆەرونيكا دەپ اتادى. گرەك تىلىنەن اۋدارعاندا «جەڭىس الىپ كەلەدى» دەگەن ماعىنا بىلدىرەدى.

ءقازىر انا مەن بالانىڭ جاعدايى جاقسى. ءومىرى مەن دەنساۋلىعىنا ەشقانداي ءقاۋىپ ءتونىپ تۇرعان جوق. ءسابي اناسىمەن ءبىر پالاتادا جاتىر.

دايىنداعان: اسەم المۇحانبەت