استانالىق قاڭعىباستار جاپپاي كوكشەتاۋعا كوشىپ كەتتى، دەپ جازادى قامشى اقپاراتتىق اگەنتتىگى.

كتك ارناسىنىڭ حابارلاۋىنشا، ولاردى ارنايى اۆتوبۋسقا تيەپ، وسىندا الىپ كەلگەن. «ەلوردالىق» دەگەن اتتان ايرىلعان ۇي-كۇيسىزدەردى ەندى تۇرعىندار تۇرماق، جەرگىلىكتى قاڭعىباستار دا جاقتىرىپ جاتقان جوق. ويتكەنى، نانعا ناعىز تالاس باستالعان. ال باس قالادان جەر اۋىپ كەتكەندەر وزدەرىن ەكسپو قارساڭىندا قۋىپ جىبەردى دەپ وكپەلەپ وتىر. 

ال كوكشەتاۋ كوشەلەرىندە ءوز قاڭعىباستارى جەتپەگەندەي ەندىگى استانالىق قاڭعىباستار قوسىلىپ، كوشەنىڭ ءار بۇرىشىن جاۋلاپ العان. قالاداعى كەز-كەلگەن قوقىس جاشىگىنىڭ ماڭىنان تاعام تەرگەن ەلوردالىق تۇراعى جوق ادامدى كەزدەستىرۋگە بولادى. كوبى ۇيلەردىڭ ماڭىنداعى جاسىل جەلەك، اعاشتىڭ ءتۇبىن دەمالاتىن ورىنعا اينالدىرىپ العان. مىنە، ءارقايسىسى ءار جەردە دومالاپ ۇيىقتاپ جاتىر. كەز-كەلگەنىن وياتىپ سۇراساڭىز، «ەسىلدىڭ سول جاعالاۋىنان كوشىپ كەلدىم» دەيدى. 

ارينە، قاڭعىباستاردىڭ 300 شاقىرىمدى ارتقا تاستاپ، استانادان كوكشەتاۋعا قونىس اۋدارۋ ويلارىندا دا بولماپتى. ايتۋلارىنشا، ولاردى ارنايى اۆتوبۋسپەن كوكشەتاۋعا جەتكىزگەن دە، كوشەلەرگە قويا بەرگەن.

كوكشەتاۋعا قونىس اۋدارعان ەلوردالىق تۇراقتى مەكەن-جايى جوق  ادامداردىڭ كوڭىل-كۇيلەرى جوق. استاناداعى «جىلىكتى ورىندارىنان» ايرىلعانىنا اشۋلى. ونىڭ ۇستىنە شاقىرىلماعان قوناقتارعا جەرگىلىكتى قاڭعىباستار قىر كورسەتە باستاعان. تۇرعىنداردا ولاردى مۇسىركەپ وتىرعان جوق.

مەكەن-جايى وزگەرگەن استانالىق قاڭعىباستار ەكسپو وتەتىن جەرگە بارماس ەدىك دەپ رەنجۋلى. ال پوليسەيلەر ۇي-كۇيسىزدەردى باس قالادان قۋىپ جاتقان جوقپىز دەيدى. كەرىسىنشە، ارنايى ورتالىققا جەتكىزىپ، باس ساۋعالايتىن جەر تاۋىپ بەرگەن.

وسىعان قاتىستى استانا قالالىق ءىىد باسپا ءسوز حاتشىسى سوفيا قىلىشبەكوۆا ءبۇي دەدى: «ورتالىققا 300 استام تۇراقتى مەكەن جايى جوق ازامات جەتكىزىلدى. ولاردىڭ كىم ەكەنى انىقتالعاننان كەيىن تۋىستارىن ىزدەيمىز».  

سونداي-اق، پوليسەيلەر ءۇي كۇيسىزدەردىڭ اۋرۋىن انىقتاپ، ەمدەلۋىنە، قۇجاتتارىن قايتا قالپىنا كەلتىرۋگە دە كومەكتەسىپ جاتىر ەكەن. ال كۇتپەگەن جەردەن جەر اۋىپ كەتكەن قاڭعىباستار استانانى ساعىنىپ جۇرگەندەرىن ايتادى. ءبىراق قايتارعا سوقىر تيىندارى دا جوق. ەندى ولارعا ەكسپو بىتپەيىنشە، ياعني كۇزگە دەيىن ازىعىن كوكشەتاۋدان تابۋعا تۋرا كەلەدى.