جۇڭگو ەلىندە جالپى ورتا ازيانى، ونىڭ ىشىندە قازاقستاندى زەرتتەيتىن بىرنەشە عىلىمي ينستيتۋت جۇمىس جاسايدى. ال بىزدە شە؟ بۇل جاعىنان اۋىز اشىپ ايتارلىقتاي ەشتەڭەمىز جوق. سوندىقتان، «قامشى» پورتالى «قىتايتانۋ» دەيتىن ىرگەلى سالانى دا نازاردان تىس قالدىرمايدى. ويتەتىنى كوپ دۇنيەگە ورىستىڭ كوزىمەن قاراپ، ورىستىڭ ويىمەن ويلاساق، سوقىر بولعاننان پارقىمىز جوق. سوندىقتان تاۋەلسىز ەل رەتىندە كورشى جۇرتتىڭ كوكەيىندە نە جاتقانىن، بەتالىسى قايدا بارا جاتقانىن ءوز الىمىزشە ءار ءسات باقىلاپ وتىرعانىمىز ابزال.
جۇڭگو حىلىق رەسپۋبلتكاسىنىڭ جوعارعى بيلىگى جاقىندا اۋىسادى. بۇل اۋىس-كۇيىس 8 قاراشادا وتەتىن جۇڭگو كوممۋنيستىك پارتياسىنىڭ حVءىىى جالپى قۇرىلتايىنا جوسپارلانىپ وتىر. وسىعان دەيىن قىتايدى بيلەپ كەلگەن پرەزيدەنت حۋ جينتاۋ مەن ۇكىمەت باسشىسى ۋەن جياباۋ بيلىكتەن كەتىپ ولاردىڭ ورنىن قازىرگى ۆيسە-پرەزيدەنت شي جينپيڭ مەن ۆيسە-پرەمەر لي كىچياڭ باسپاقشى.
شي جينپيڭ، ۇلتى - جۇڭگو، 1953 جىلى ماۋسىم ايىندا جۇڭگو حالىق رەسپۋبليكاسىنىڭ ءشانشي پروۆينسياسى فۋپيڭ قالاشىعىندا تۋعان. 1974 جىلدىڭ قاڭتارىندا جۇڭگو كوممۋنيستىك پارتياسىنا مۇشە بولىپ قابىلدانىپ، سينحۋا ۋنيۆەرسيتەتىنىڭ گۋمانيتارلىق-الەۋمەتتىك ينستيتۋتىندا ماركسيزم تەورياسى مەن يدەا-ساياسي تاربيە ماماندىعىن بىتىرگەن. زاڭ عىلىمدارىنىڭ دوكتورى.
ول قازىرگى كۇندە جۇڭگو كوممۋنيستىك پارتياسى ورتالىق ساياسي كەڭەس تۇراقتى كوميتەتى مۇشەسى، ورتالىق حاتشىلار ءبولىمىنىڭ حاتشىسى، جۇڭگو حالىق رەسپۋبليكاسىنىڭ ۆيسە-پرەزيدەنتى، جۇڭگو كوممۋنيستىك پارتياسى ورتالىق اسكەري كوميتەتى ءتوراعاسىنىڭ ورىنباسارى، ورتالىق پارتيا مەكتەبىنىڭ رەكتورى قىزمەتتەرىن اتقارادى.
وسىنشاما بيلىكتى ءبىر باسىنا جيعان قىتايدىڭ بۇل ليدەرى جايلى نە بىلەمىز؟ ول بيلىككە كەلۋىنە قاراي قىتايدى قانداي وزگەرىستەر كۇتىپ تۇر؟ وسى سۇراقتارعا جاۋاپ ىزدەۋ ماقساتىمەن ءبىز قىتايدىڭ ءوز اقپارات كوزدەرىن جانە شەتەلدىك اقپارات قۇرالدارىن ءبىر شارلاپ شىققان ەدىك.
قىتايلىقتار شي جينپيڭ جايلى نە دەيدى؟
جۇڭگو پورتالى (www.china.org.cn/ www.china.com.cn)شي ءجينپيڭنىڭ ءومىر جولى جايلى «ۆيسە-پرەزيدەنت شي ءجينپيڭنىڭ تالپىنىس جولى» اتتى كولەمدى ماقالا جازىپ، ونى جاستايىنان «ەڭبەكقور، ادال، كىتاپ وقۋعا قۇمار» دەپ كورسەتەدى.
1968 جىلى قىتايدىڭ سول كەزدەگى باسشىسى ماۋ زىدۇڭنىڭ «قالالىق زيالى جاستاردىڭ اۋىلدىق جەرلەرگە بارىپ ەڭبەكپەن تاربيەلەنۋى» دەلىنەتىن ساياساتى جولعا قويىلىپ، كوپتەگەن قالا جاستارى اۋىلعا جىبەرىلەدى. اتالمىش ماقالا شي ءجينپيڭنىڭ 1969 جىلى ءشانشي پروۆينسياسىنداعى ءبىر كىشكەنە اۋىلعا جىبەرىلگەنى جايلى اڭگىمەمەن باستالادى. ماقالا سول اۋىلدىڭ تۇرعىندارىنىڭ ەستەلىكتەرىن ارقاۋ ەتىپ، شي ءجينپيڭنىڭ جاستىق ءومىرى جايلى ءسوز قوزعايدى. شي جينپيڭ بۇل اۋىلعا كەلگەندە ءتىپتى ون التى جاسقا دا تولماپتى، ءبىراق الدىنا ۇلكەن ماقسات قويا بىلگەن ول وزىمەن بىرگە ءبىر ۇلكەن چەمودان كىتاپ الا كەلگەن.
اۋىلداعى ەڭبەك بارىسىندا قالادان كەلگەن جاستاردىڭ اۋىل جۇمىسشىلارىنان قالىسپاي، تىرىسشاڭدىق تانىتىپ ۇلكەندەرمەن يىق تىرەسە ەڭبەككە اتسالىسقانى جايلى ايتىلادى. اۋىل تۇرعىنى، قارت لياڭ شينروڭ بىلاي دەپ ەسكە الاتىن كورىنەدى: «ول وتە ەڭبەكقور بولاتىن! كوك تونىن كيىپ الىپ، بەلىن مەتال جىپپەن قاپسىرا بايلاپ الاتىن، ءتىپتى وقۋ وقيتىن جاستارعا مۇلدەم ۇقسامايدى». اۋىلدا ءجۇرىپ قارا جۇمىستىڭ ءبارىن ىستەگەن جاستار ەڭبەككە ابدەن ءپىسىپ جەتىلگەن دەسەدى: ولار ەسەك جەگىپ تيىرمەن تارتقان، سۋ بوگەتتەرىن سوعىپ، ءۇي تۇرعىزعان، مالدىڭ تەزەگىن اشىتىپ مەتان گازىن وندىرگەن.
شي ءجينپيىنىڭ ساياسي ءومىرى 1974 جىلدىڭ قاڭتارىنان باستالعان ەكەن، ءدال وسى ۋاقىتتا ول قكپ-نا مۇشە بولىپ قابىلدانىپتى. اۋىلداعى ەڭبەكتە ۇزدىك بولىپ كوزگە تۇسكەن ءبىلىمدى جاستىڭ پارتياعا كىرۋ ءوتىنىشىن ءبىرىنشى رەت قابىلداماي تاستاعان، سەبەبى ونىڭ اكەسى سول كەزدەگى بۇرقاسىنى ءالى باسىلا قويماعان «مادەنيەت توكەرىسىندە» ءىستى ادام بولىپ تابىلعان. ەكىنشە رەتكى ءوتىنىشى ساتىمەن قكپ-نىڭ ورتالىعى بەكىتكەن «اكە-شەشەسى ءىستى بولسا دا بالا-شاعاسىنا زالالى تيمەيدى» دەگەن قاۋلىسىنا تۋرا كەلىپ، قابىلدانعان.
1975 جىلى اۋىلدا جەتى جىلعا جۋىق ەڭبەك ەتكەن شي ءجينپيڭدى باسشىلارى سينحۋا ۋنيۆەرسيتەتىنە ءتۇسىپ وقۋعا ۇسىنادى. اۋىلدا ءبىراز جىلدار قارا حالىق اراسىندا ءومىر سۇرگەن بولاشاق باسشى اقىرى باعىتىنان جازباي بيلىكتىڭ بيىك شىڭىنا قاراي قادام تاستايدى.
باس بيلىككە ءبىر-اق قادام:
جۇڭگو حالىق رەسپۋبليكاسىندا ۆيسە-پرەزيدەنت جانە ورتالىق اسكەري كوميتەتى ءتوراعاسىنىڭ ورىنباسارى، ورتالىق پارتيا مەكتەبىنىڭ رەكتورى قاتارلى مانساپتاردى اتقارعان باسشى كەلەسى بيلىك اۋىسار ساتتە باس بيلىككە بىردەن سايلاناتىن ءداستۇر بولعان. مىسالى قىتايدىڭ قازىرگى پرەزيدەنتى حۋ جيتاۋ بيلىككە ءدال وسىلاي كەلگەن ەدى. ول 1993 جىلدان 2003 جىلى پرەزيدەنت بولىپ سايلانار الدىندا ورتالىق پارتيا مەكتەبىنىڭ رەكتورى، سايلانۋدان بىرنەشە جىل بۇرىن ۆيسە-پرەزيدەنت جانە ورتالىق اسكەري كوميتەتى ءتوراعاسىنىڭ ورىنباسارى قاتارلى جۇمىستاردى اتقارعان.
شەتەلدىك باسىلىمدار نە دەيدى؟
الايدا جاقىندا عانا جۇڭگو بيلىگىنىڭ تالاس-تارتىسىنا كۋا بولعان شەتەلدىك باسىلىمدار دۇركىرەي شۋلاعان ەدى.
جۇڭگو ەكونوميكاسىنىڭ بۇگىنگىدەي زور دامۋىن الىپ كەلگەن قىزىل رەفورماتور، باسشى دىڭ شياۋپيڭ ەكەنى كوپشىلىككە ءمالىم بولسا كەرەك. قىتايدىڭ قازىرگى بيلىگى ءوزىن ءدال سول دىڭنىڭ ءىزباسارىمىز دەپ ەسەپتەيدى، ياعني ولار ەكونوميكالىق جانە باسقادا رەفورمالاردى تەرەڭدەتە تۇسۋگە مۇددەلى. دەگەنمەن جۇڭگو بيلىگىندە تەرەڭ رەفورمالارعا قارسى توپتار جوق ەمەس. ولار بۇرىنعى ريەۆوليۋسياشىلدىق، سوسيوليستىك باعىتتى جەلەۋ ەتىپ بيلىكتى ءوز قولىنا قاراتقىسى كەلەدى. ۇستىمىزدەگى جىلدىڭ اقپان ايىندا الەمدى ءدۇر سىلكىندىرگەن جۇڭگو بيلىگىندەگى تالاس-تارتىس وسىنىڭ ايقىن ايعاعى بولدى.
چۇڭچيڭ قالاسىنىڭ (قىتايدىڭ ورتالىقتان باسقارىلاتىن ءتورت ۇلكەن قالالارىنىڭ ءبىرى) اكىمى بو شيلاي پوليسيا باسقارماسىنىڭ باستىعى ۋاڭ ءليجيۋندى شاپالاقپەن ۇرىپ جانە ونى قۋدالاپ ومىرىنە قاۋىپ توندىرگەنى سەبەپتى ۋاڭ ليجيۋن قىتايداعى اقش ەلشىلىگىنە بارىپ پانالاعان ەدى. بۇل وقيعادان كەيىن جۇڭگو بيلىگىندەگى بىلىق بىردەن سۋ بەتىنە قالقىپ شىعا كەلدى.
چۇڭچيڭ قالاسىن ءبىراز جىل باسقارعان بو شيلاي جوعارى بيلىككە تالپىنعان انتي-رەفورماشىلداردىڭ ءبىرى بولاتىن. ول اتالمىش قالادا ريەۆوليۋسياشىلدىق، قاتاڭ سوسيوليستىك باعىتتى ۇستانىپ، ەركىن نارىقتىق ەكونوميكاعا اياۋسىز سوققى بەرگەن ەدى. ياعني چۇڭچيڭ قالاسىنداعى تۇرعىن ءۇي باعاسى قىتايدىڭ باسقا قالالارىنان كوپ تومەن بولدى؛ زات باعاسى قولدان كۇشتەپ تومەندەتىلدى؛ «پاراقور» باسشىلار اياۋسىز جازالاندى. سونىمەن قاتار، بونىڭ باستاماسىمەن اتالمىش قالادا ريەۆوليۋسياشىلدىق اندەر ايتىلىپ، جىرلار جىرلاندى، بۇكىل قالا قىزىل جالاۋلارمەن كومكەرىلدى. بۇل ءىس-شارالاردىڭ بارلىعى ەكونوميكالىق داعدارىستان قينالعان حالىق ءۇشىن ۇلكەن مەدەت ەكەنى ايتپاسا دا بەلگىلى. وسىلايشا حالىقتى وزىنە قاراتقان بو ءبىر كەزدەرى ريەۆوليۋسياشىلدىق ءان-جىرلاردى ايتۋدى استانا بەيجيڭگە دە جەتكىزگەن ەدى. دەگەنمەن بۇل ءىسى رەفورماشىل ورتالىق بيلىككە ۇناماعان بولسا كەرەك، قىزىل كونسەرتكە كەلگەن ورتالىق باسشىلارى ساۋساقپەن سانارلىقتاي بولىپتى.
ءسويتىپ ءجۇرىپ بونىڭ شارۋاسىنان شي شىقتى، ءوزىنىڭ ادال كومەكشىسى، چۇڭچيڭ قالاسى پوليسيا باسقارماسىنىڭ باستىعى ۋاڭ ءليجيۋندى شاپالاقپەن ۇرىپ، ونى قۋدالاعانى سەبەپتى ۋاڭ قىتايداعى اقش ەلشىلىگىنە بارىپ پانالاپ بونىڭ بيلىكتەگى بىلىعىن بار الەمگە پاش ەتتى: ريەۆوليۋسياشىل باسشى چۇڭچيڭ قالاسىنىڭ اكىمى بولعان كەزدە جانە ودان بۇرىندارى دا كوپتەگەن ادامداردان پارا العان، قولىنداعى بيلىكتى ءوز مۇددەسىنە پايدالانعان، كوپتەگەن ايەلدەرمەن زاڭسىز جىنىستىق بايلانىستا بولعان، ت.ب.
ءدال وسى وقيعادان كەيىن، ياعني 2012 جىلى مامىر ايىنىڭ 14 جۇلدىزى، اقش-تىڭ تايمس جۋرنالى ءوز مۇقاباسىنا بو شيلايدىڭ ۇلكەن پورترەتىن سالىپ «The People's Republic of Scandal» (داۋ-داماي حالىق رەسپۋبليكاسى) دەپ بۇكىل الەمدى ءدۇر سىلكىندىردى.
ۋاڭ وقيعاسىنان كەيىن جۇڭگو رەفورماشىل ۇكىمەتى بونى قالاي باسۋدىڭ ءادىسىن تاپقانداي بولدى. 2012 جىلدىڭ ناۋرىز ايىندا جۇڭگو پرەمەر-مينيسترى ۋەن جياباۋدىڭ شەتەلدىك اقپارات وكىلدەرىنە بەرگەن سۇحباتىندا بىلاي دەلىنگەن:
«ۋاڭ وقيعاسى تۋىنداعان سوڭ، ول قوعامنىڭ زور نازارىن اۋداردى، حالىقارادا بۇعان كوز تىگىپ وتىر. مەندە سەنىممەن ايتايىن، بۇل ءىس ورتالىقتىڭ ءجىتى نازارىندا، قاتىستى ورىندارعا بۇل ءىستى تەكسەرۋدى تاپسىرامىز... چۇڭچيڭ قالالىق كوميتەتى مەن باسشىلىعى قايتا ويلانىپ، ۋاڭ وقيعاسىنان ساباق الۋى كەرەك».
جۇڭگو بيلىگى بونى مىقتاپ وماقاستىردى. بو پارتيادان قۋىلدى جانە بارلىق بيلىگىنەن ايىرىلدى.
بونىڭ بىلىعى اشكەرەلەنگەن باستاپ سوتتالعانعا دەيىن جارتى جىلدان استام ۋاقىت ءوتتى. بۇل ارالىقتا جۇڭگو بيلىگى ءوز ىشىندە ىمىراعا كەلە الماي جاتتى دەپ حابارلايدى اقش-تاعى قحر-نىڭ وپپازيسيالىق كۇشتەرى توپتالعان اقپارات ورتالىعى VOA china (امەريكا ءۇنى، قىتايشا). ءبىر پارتيا بيلەگەن قحر-دا ەشقانداي وپپازيسيالىق كۇش ءومىر سۇرە الماي كەلەدى. بۇنداعى باستى سەبەپ بونىڭ قولداۋشىلارى سول ورتالىق بيلىكتە ىقپادى ورىنداردا وتىرعان ەكەن. بونىڭ تاعدىرى ءدال وسى ءوز قولداۋشىلارى مەن جاڭاعى رەفورماشىل بيلىكتىڭ اراسىندا شەشىلگەن.
سونىمەن بۇل بىلىقتا جەڭىسكە جەتكەن رەفورماشىل كۇشتەر ءوز بيلىگىن ارمەن جالعاستىرۋدى كوزدەيتىنى داۋسىز. ال ءبىزدىڭ ماقالا الدىندا تانىسقان الگى ۆيسە-پرەزيدەنت شي جينپيڭ ءدال سول رەفورماشىل توپتىڭ تاڭداعان ادامى دەسەدى. بو شيلايدىڭ ماقساتى حالىق سەنىمىمەن شيدىڭ ورنىن زاڭدى تۇردە باسۋ بولاتىن. دەگەنمەن ورتا جولدا سۇرىنگەن بو ەندى بيلىكتەن ماڭگىگە ماقۇرىم بولدى.
قىركۇيەك ايىنىڭ ادىڭعى ەكى اپتاسىندا قىتايدىڭ بولاشاق پرەزيدەنتى شي جينپيڭ اقپارات كوزدەرىنەن بىردەن عايىپ بوپ كەتكەن ەدى. بۇل ءوزى دە دۇركىرەپ قىزىپ تۇرعان حالىقارالىق اقپارات الەمىن ءتىپتى دە دۇرلىكتىرىپ جىبەردى. «نيۋ يورك تايمس» گازەتى ارنايى ماقالا جازىپ «ءشيدىڭ جوعالىپ كەتۋى قىتايلىقتار ارسىندا وسەك-اياڭدى ءوربىتىپ جىبەردى» دەگەن. اتالمىش ماقالا جۇڭگو اقپارات كوزدەرى مەن ساياساتكەرلەرىنىڭ سوزدەرىنە سىلتەمە جاساي وتىرىپ، شي سپورتىق جاتتىعۋلار كەزىندە ءسىڭىرىن سوزىپ العان نەمەسە قاستاندىقپەن جاسالعان جول كولىك وقيعاسىندا جارالانعان دەپ جازادى. قالاي دەگەنمەندە بيلىكتەگى تالاس-تارتىس قانشاما شىتىرمان بولانىمەن، ءشيدىڭ باس بيلىككە ءبىر-اق قادام جەتپەي تۇرعانى شىندىق.
جۇڭگو جۇرتى شي ءجينپيڭدى كوبىرەك قولدايتىن ءارى وعان مول سەنىممەن قارايتىن كورىنەدى، سەبەبى ول جاستايىنان قاراپايىم حالىق اراسىندا ءوسىپ، ەڭبەك ەتىپ ءجۇرىپ ەسەيگەن. حالىقتىڭ مۇڭ-مۇقتاجىن جاقسى بىلەدى. جانە كەيبىر اقپارات كوزدەرىنە سۇيەنسەك، شي فۋتبول جانكۇيەرى ەكەن. كوپتەگەن فۋتبول سۇيەتىن قىتايلىقتار ءۇشىن ءشيدىڭ بيلىككە كەلۋى سىبايلاس جەمقورلىق جايلاعان جۇڭگو فۋتبولىن سەرپىلتۋگە كومەگىن تيگىزەدى-مىس.
شي ءجينپيڭنىڭ ساياسي ءومىر جولىنا شولۋ:
1975-1979 ج.ج. سينحۋا ۋنيۆەرسيتەتى حيميا فاكۋلتەتىندە نەگىزگى ورگانيكالىق سينتەزدەر ماماندىعى بويىنشا وقىعان.
1979-1982 ج.ج. گو-ۋ-يۋان (ورتالىق ۇكىمەت) قىزمەت باسقارماسىندا، ورتالىق اسكەري كوميتەتىنىڭ قىزمەت باسقارماسى حاتشىسى.
1982-1983 ج.ج. حىبەي پروۆيسياسى جىڭديڭ اۋداندىق كوميتەتىنىڭ ورىنباسار حاتشى.
1983-1985 ج.ج. حىبەي جىڭديڭ اۋداندىق كوميتەتىنىڭ حاتشىسى، قوسىمشا اۋداندىق قارۋلى ءبولىمى ساياسي كوميتەتىنىڭ ءبىرىنشى باسشىسى، پارتيا كوميتەتىنىڭ ءبىرىنشى حاتشىسى.
1985-1988 ج.ج. ءفۋجيان پروۆيسياسىنىڭ ءشيامىن قالالىق كوميتەتىنىڭ مۇشەسى، قالا اكىمىنىڭ ورىنباسارى.
1988-1990 ج.ج. ءفۋجيان پروۆيسياسى نيڭدى اۋماقتىق كوميتەتتىڭ حاتشىسى، قوسىمشا نيڭدى ايماقتىق اسكەري وكرۋگى پارتيا كوميتەتىنىڭ ءبىرىنشى حاتشىسى.
1990-1995 ج.ج. ءفۋجيان پروۆيسيالىق كوميتەتى حاتشىسىنىڭ ورىنباسارى، فۋجوۋ قالالىق كوميتەتتىڭ حاتشىسى، قالالىق حالىق كەڭەسى تۇراقتى كوميتەتىنىڭ باستىعى، قوسىمشا فۋجوۋ اسكەري وكرۋگى پارتيا كوميتەتىنىڭ ءبىرىنشى حاتشىسى.
1995-1996 جىلدارىي ءفۋجيان پروۆينسياسى كوميتەتى باستىعىنىڭ ورىنباسارى، فۋجوۋ قالالىق كوميتەتىنىڭ حاتشسى، قالالىق حالىق كەڭەسى تۇراقتى كوميتەتىنىڭ باستىعى، قوسىمشا فۋجوۋ اسكەري وكرۋگى پارتيا كوميتەتىنىڭ ءبىرىنشى حاتشىسى قىزمەتتەرىن اتقارعان.
1996-1999 ج.ج. ءفۋجيان پروۆينسياسى كوميتەتى باستىعىنىڭ ورىنباسارى، قوسىمشا پروۆينسيالىق زەڭبىرەكشىلىەر دايىندىق پولكى كوميتەتىنىڭ باستىعى.
1999-2000 ج.ج. ءفۋجيان پروۆينسياسى كوميتەتى باستىعىنىڭ ورىنباسارى، پروۆينسيانىڭ ۋاقىتشا سايلانعان اكىمى، قوسىمشا ءنانجيڭ اسكەري وكرۋگى مەملەكەت قورعانىسىن ۇيىمداستىرۋ كوميتەتى باستىعىنىڭ ورىنباسارى، ءفۋجيان پروۆينسيالىق مەملەكەت قورعانىسىن ۇيىمداستىرۋ كوميتەتىنىڭ باستىعى، پروۆينسيالىق زەڭبىرەكشىلىەر دايىندىق پولكى كوميتەتىنىڭ باستىعى.
2000-2002 ج.ج. ءفۋجيان پروۆينسياسى كوميتەتى باستىعىنىڭ ورىنباسارى، پروۆينسيا اكىمى. (1998-2002 جىلدار ارالىعىندا سينحۋا ۋنيۆەرسيتەتىنىڭ گۋمانيتارلىق-الەۋمەتتىك ينستيتۋتىندا ماركسيزم تەورياسى مەن يدەا-ساياسي تاربيە ماماندىعى بويىنشا ماگيستراتۋرانى قىزمەت اتقارا ءجۇرىپ وقيدى، سونىمەن قاتار زاڭ عىلىمدارى دوكتورى دارەجەسىن دە الادى.)
2002 جىلى جىجياڭ پروۆينسياسى كوميتەتى باستىعىنىڭ ورىنباسارى، پروۆينسيانىڭ ۋاقىتشا اكىمى.
2002-2003 ج.ج. جىجياڭ پروۆينسياسى كوميتەتى باستىعىنىڭ ورىنباسارى، پروۆينسيانىڭ ۋاقىتشا اكىمى، قوسىمشا پروۆينسيالىق اسكەري وكرۋگى پارتيا كوميتەتىنىڭ ءبىرىنشى حاتشىسى.
2003-2007 ج.ج. جىجياڭ پروۆينسياسى كوميتەتى باستىعىنىڭ ورىنباسارى، پروۆينسيالىق حالىق كەڭەسى تۇراقتى كوميتەتىنىڭ باستىعى، قوسىمشا پروۆينسيالىق اسكەري وكرۋگ پارتيا كوميتەتىنىڭ ءبىرىنشى حاتشىسى.
2007 جىلى شاڭحاي قالالىق كوميتەتىنىڭ حاتشىسى، قوسىمشا شاڭحاي اسكەري وكرۋگى پارتيا كوميتەتىنىڭ ءبىرىنشى حاتشىسى.
2007-2008 ج.ج. ورتالىق ساياسي كەڭەسىنىڭ تۇراقتى مۇشەسى، ورتالىق حاتشى ءبولىمىنىڭ حاتشىسى، ورتالىق پارتيا مەكتەبىنىڭ رەكتورى.
2008-2010 ج.ج. ورتالىق ساياسي كەڭەسى تۇراقتى كوميتەتىنىڭ مۇشەسى، ورتالىق حاتشى ءبولىمىنىڭ حاتشىسى، قحر-دىڭ ۆيسە-پرەزيدەنتى، ورتالىق پارتيا مەكتەبىنىڭ رەكتورى.
2010 جىلدان قازىرگە دەيىن ورتالىق ساياسي كەڭەس تۇراقتى كوميتەتى مۇشەسى، ورتالىق حاتشى ءبولىمىنىڭ حاتشىسى، قحر-دىڭ ۆيسە-پرەزيدەنتى، جۇڭگو كوممۋنيستىك پارتياسى ورتالىق اسكەري كوميتەتى ءتوراعاسىنىڭ ورىنباسارى، ورتالىق پارتيا مەكتەبىنىڭ رەكتورى قىزمەتتەرىن اتقارىپ كەلەدى.
ماقالانى دايىنداعان بيبول ءالىپباي
پىكىر قالدىرۋ