بۇگىن ورال وزەنى بويىمەن ءداستۇرلى تۇردە ۇيىمداستىرىلاتىن ءححى تاريحي-مادەني، ەكولوگيالىق ەكسپەديسياسى ءوز جۇمىسىن باستادى. بۇل شارا 2016 جىلدىڭ كۇزىندە قازاقستان مەن رەسەي ەلدەرى باسشىلارى قول قويعان كەلىسىم اياسىندا ەكى ەلدىڭ پىكىرلەستەرىنىڭ باسىن بىرىكتىردى.
ەكسپەديسيانىڭ يدەيالىق دەم بەرۋشىسى ءارى كوشباسشىسى ەلەنا تاراسەنكو ارداگەرلەردى، ەكولوگ-عالىمدار مەن ولكەتانۋشىلاردى، قوعام قايراتكەرلەرى مەن جاستاردى، ماسس-مەديا وكىلدەرى مەن سپورتشىلاردى، تۋريزم جانە سپورت ۇيىمداستىرۋشىلارىن بۇل جولى دا ءوز تۋى استىنا بىرىكتىرە ءبىلدى. بۇگىن ەكسپەديسيا مىقتى دوستىق قارىم-قاتىناس ورناعان كورشىلەس ورىنبور جەرىنەن باستاۋ الماق. رەسەيلىك اعايىن باتىس قازاقستان وبلىسىنىڭ اكىمى التاي كولگىنوۆ باستاعان ءبىر توپ ءوڭىر دەلەگاسيا مۇشەلەرىن ورىنبور وبلىسىنىڭ ەلەك اۋدانى ماڭىنان قارسى الماق.
ەكسپەديسيا باعدارلاماعا سايكەس رەسەي جەرىنىڭ پودستەپكي اۋىلىنان 21 شىلدەدە قوزعالاتىن بولادى. بىرنەشە كۇنگە ەسەپتەلگەن ەكسپەديسيا بارىسىندا ورالدىڭ ءبىرىڭعاي كۇندەرى مەرەكەسىن اتاپ وتۋگە وراي باتىس قازاقستان وبلىسى مەن ورىنبور وبلىسىنىڭ ءوڭىر باسشىلارىنىڭ باسقوسۋى، ءتۇرلى جيىندار مەن مەرەكەلىك كونسەرتتەر، جاستار فلەشموبتارىن وتكىزۋ جوسپارلانعان.
مەرەكەلىك شارالار اياسىندا اعىمداعى جىلدىڭ كوكتەمىندە ورال وزەنى تۋرالى ەكى ەل اراسىنداعى ورتاق حاتتاماعا سايكەس بقو وبلىس اكىمى ا.كولگىنوۆ پەن ورىنبور وبلىسىنىڭ گۋبەرناتورى يۋ.بەرەگ رەسمي تۇردە بەكىتكەن ورالدىڭ ءبىرىڭعاي كۇندەرى مەكەمەسىنىڭ سيمۆولى ورناتىلاتىن بولادى. وسى ايتۋلى كۇنگە وراي «ورال وزەنىنە قومقورلىق جاساي وتىرىپ، باۋىرلاس حالىقتاردىڭ ەلدەرى مەن دوستىعىن ساقتايمىز» تاقىرىبىندا تاريحي-ەكولوگيالىق كونفەرەنسيا وتكىزىلەدى.
ورال-جايىق ەكسپەديسياسى ورىنبور وبلىسىنىڭ سۋلى ايماقتارىندا وتكىزىلەدى. بۇدان سوڭ ەكسپەديسيا باتىس قازاقستان وبلىسىنىڭ ءبورلى، شىڭعىرلاۋ، تەرەكتى اۋداندارىنداعى ۋسپەنوۆكا، جاڭاتالاپ، جارسۋات، اقسۋات اۋىلدارىندا، ورال قالاسىنىڭ جەلايەۆ، زاشاعان كەنتتەرىنە ايالداپ، جەرگىلىكتى تۇرعىندارمەن كەزدەسىپ، ءتۇرلى مادەني-سپورتتىق شارالار وتكىزەدى.
ەكى ەلدىڭ بىرلەسكەن جاڭا برەندىنىڭ شارىقتاۋ شەگى 26 شىلدە كۇنى ورال قالاسىندا وتەتىن «قورشاعان ورتانى جاقسارتۋداعى ايەلدەردىڭ ءرولى» اتتى حالىقارالىق فورۋم بولماق.
