26 شىلدەدە ورال قالاسىندا جايىق كۇنى اياسىندا  «قورشاعان ورتانىڭ جاعدايىن جاقسارتۋداعى ايەلدەردىڭ ءرولى» اتتى حالىقارالىق فورۋم وتەدى.

اتالمىش شارا 2016 جىلى 4 قازاندا قازاقستان مەن رەسەي ۇكىمەتتەرى  اراسىندا قول قويىلعان  ترانشەكارالىق وزەندەردىڭ ەكوجۇيەسىن ساقتاۋ  جونىندەگى كەلىسىم اياسىندا وتەدى.  قازاقستان مەن رەسەي بىرلەسىپ وتكىزەتىن بۇل شارا بيىل 21ء-نشى رەت وتكىزىلەتىن جايىق ەكسپەديسياسىنىڭ زاڭدى جالعاسى بولىپ تابىلادى. فورۋمنىڭ باستى ماقساتى - جايىق وزەنىنىڭ ەكوجۇيەسىن ساقتاۋ، جاقسارتۋ، «جاسىل»  ەكونوميكانى  دامىتۋ.

2017 جىلدىڭ 11 ناۋرىزىندا  بقو اكىمى ا. كولگىنوۆ پەن ورىنبور وبلىسىنىڭ گۋبەرناتورى  يۋ. بەرگتىڭ اراسىندا جايىق وزەنى تۋرالى حاتتاماعا قول قويىلىپ، جىل سايىن ارنايى جايىق كۇنىن وتكىزۋ شاراسى بەلگىلەندى. 

فورۋمدى ق ر پرەزيدەنتى جانىنداعى ايەلدەر ىستەرى جانە وتباسىلىق –دەموگرافيالىق ساياسات جونىندەگى ۇلتتىق كوميسسيا،  قازاقستانداعى   بۇۇ دامۋ باعدارلاماسى اياسىندا وبلىس اكىمدىگىمەن بىرلەسە  ۇيىمداستىردى.

فورۋمعا  رەسەي فەدەراسياسىنىڭ باشقۇرتستان، ورەنبۋرگ، ساراتوۆ، چەليابينسك وبلىستارىنان، حالىقارالىق ۇەۇ، اقتوبە، اتىراۋ وبلىستارىنان دەلەگاتتار جانە جەرگىلىكتى، ورتالىق اتقارۋشى  ورگانداردان  بارلىعى 300 ادام قاتىسادى دەپ كۇتىلۋدە.

ايەل كاسىپكەرلەردى «جاسىل ەكونوميكانى» دامىتۋعا تارتۋ- فورۋمنىڭ نەگىزگى تاقىرىپتارىنىڭ ءبىرى. سونداي اق رەسەيدەگى «ەكولوگيا جىلى-2017»، استانا قالاسىنداعى «ەكسپو 2017» حالىقارالىق كورمەسى اياسىندا ەكونوميكانىڭ جەتەكشى سالاسى «جاسىل» تەحنولوگيا جونىندەگى بىرلەسكەن جوبالاردى ەنگىزۋ ماسەلەسى دە ۇسىنىلدى.  سونىمەن بىرگە فورۋمدا تۋريزم سالاسىنداعى  بيزنەستى دامىتۋ، قىزمەت كورسەتۋ، سۋۆەنيرلىك ونىمدەردى ءوندىرۋ، قوناق ءۇي بيزنەسى تاعى دا وزگە ماسەلەلەر كوتەرىلەتىن بولادى.