مەملەكەت باسشىسىنىڭ تاپسىرماسىمەن ق ر پرەمەر-مينيسترى باقىتجان ساعىنتايەۆ جۇمىس ساپارىمەن قاراعاندى وبلىسىنا باردى، وندا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى مەن ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى مىندەتتەردى ىسكە اسىرۋ بارىسىمەن تانىسادى، دەپ حابارلايدى Qamshy.kz اقپارات اگەنتتىگى پرەمەر-مينيستردىڭ باسپا ءسوز قىزمەتىنە سىلتەمە جاساپ.

بۇل وڭىردە باقىتجان ساعىنتايەۆ ءبىرقاتار ونەركاسىپتىك جانە وندىرىستىك نىسانداردى ارالايدى، ولاردىڭ ىشىندە مەتاللۋرگيالىق كرەمنيي شىعاراتىن «Tau-Ken Temir» ج ش س، ءسۇتتى قايتا وڭدەيتىن جانە ءسۇت ونىمدەرىن وندىرەتىن «ناتيجە» ءسۇت فابريكاسى» ج ش س، سونداي-اق نان-توقاش ونىمدەرىن وندىرەتىن «سارىارقا نان» ج ش س كاسىپورىندارى بار.

باقىتجان ساعىنتايەۆ مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى اياسىندا ىسكە اسىرىلىپ جاتقان قازاقستاننىڭ ونەركاسىپتىك كاسىپورىندارىن تەحنولوگيالىق جاڭعىرتۋ ماسەلەلەرى جونىندە رەسپۋبليكالىق كەڭەس، «اتامەكەن» كاسىپكەرلەر پالاتاسىنىڭ وڭىرلىك كەڭەسى مۇشەلەرىمەن شاعىن جانە ورتا بيزنەستى دامىتۋ ماسەلەلەرى بويىنشا كەزدەسۋ، سونداي-اق مونوقالالاردى دامىتۋ جونىندە كەڭەس وتكىزەدى دەپ كۇتىلۋدە.

بۇدان وزگە، ق ر پرەمەر-مينيسترى باقىتجان ساعىنتايەۆ «قاراعاندى-تەمىرتاۋ» اۆتوكولىك جولىنىڭ ۋچاسكەسىندەگى «ورتالىق-وڭتۇستىك» كولىك ءدالىزىن جوندەۋ بارىسىمەن تانىسادى، سونداي-اق جەس-2 جانە «ارسەلورميتتال تەمىرتاۋ» اق-نىڭ باسقا دا وندىرىستىك نىساندارىن ارالايدى.

انىقتاما:

قاراعاندى وبلىسىنىڭ ىشكى وڭىرلىك ءونىمى قۇرىلىمىندا ونەركاسىپ ۇلەسى - 53،2%، اۋىل شارۋاشىلىعى – 1،6%، قۇرىلىس – 1،6%، ساۋدا – 10،3%، كولىك – 5،2% قۇرايدى.

وبلىستىڭ ءىرى كاسىپورىندارى: «قازاقمىس كورپوراسياسى» ج ش س، «Kazcentrelectroprovod» ج ش س، «ارسەلورميتتال تەمىرتاۋ» اق، «ەۆرازيان فۋدس» اق، «تاۋ-كەن تەمىر» ج ش س، «جايرەم تاۋ-كەن بايىتۋ كومبيناتى» اق، «شۇباركول كومىر» اق، «تەمىرتاۋ ەلەكتر-مەتاللۋرگيا كومبيناتى» اق، «وركەن» ج ش س، «ەر-تاي» ج ش س، «اپرەل قۇلاگەر» ج ش س.