مەملەكەت باسشىسىنىڭ قازاقستان حالقىنا جولداۋىندا كورسەتىلگەن تاپسىرمالارىنا سايكەس ماڭعىستاۋ وبلىسىندا ءوڭىردىڭ تۇراقتى ەكونوميكالىق دامۋىن قامتاماسىز ەتۋ ماقساتىندا ينۆەستيسيا تارتۋ بويىنشا بەلسەندى جۇمىس جۇرگىزىلۋدە. سوڭعى ءۇش جىلدا وبلىستىڭ نەگىزگى كاپيتالىنا 2،9 ترلن تەڭگەدەن استام ينۆەستيسيا تارتىلعان، دەپ حابارلايدى قوعامدىق كوممۋنيكاسيا ورتالىعى.

ونەركاسىپ جانە يندۋستريالىق-يننوۆاسيالىق دامۋ باسقارماسىنىڭ مالىمەتىنشە، بيىل جالپى قۇنى شامامەن 230 ملرد تەڭگەنى قۇرايتىن 17 جوبا ىسكە قوسىلىپ، ناتيجەسىندە 550-گە جۋىق تۇراقتى جاڭا جۇمىس ورنى اشىلعان.

-جىل سوڭىنا دەيىن جالپى قۇنى 38 ملرد تەڭگە بولاتىن تاعى بەس جوبانى پايدالانۋعا بەرۋ جوسپارلانىپ وتىر. بۇدان بولەك، جىل باسىنان بەرى ءىرى شەتەلدىك ينۆەستورلاردى تارتۋ جانە ەكىجاقتى ىنتىماقتاستىقتى نىعايتۋ ماقساتىندا جاقىن جانە الىس شەتەلدەردىڭ ەلشىلەرى مەن كونسۋلدارىمەن، سونداي-اق ءوڭىردىڭ ينۆەستيسيالىق جانە ساۋدا-ەكونوميكالىق مۇمكىندىكتەرىمەن تانىسۋ ءۇشىن كەلگەن شەتەلدىك ينۆەستورلارمەن شامامەن 20 كەزدەسۋ وتكىزىلدى، – دەپ حابارلادى باسقارما وكىلدەرى.

وبلىستىق ونەركاسىپ جانە يندۋستريالىق-يننوۆاسيالىق دامۋ باسقارماسىنىڭ اقپاراتىنا سايكەس، «اقتاۋ تەڭىز پورتى» ارنايى ەكونوميكالىق ايماعىنىڭ اۋماعىن كەڭەيتۋ جۇمىستارى جالعاسۋدا. بيىل ونىڭ كولەمى 1،9 مىڭ گەكتاردان 4،4 مىڭ گەكتارعا دەيىن ۇلعايتىلدى. سونىمەن قاتار، ارنايى ەكونوميكالىق ايماق قۇرامىنا قوسۋ ءۇشىن شامامەن 23 مىڭ گەكتار بولاتىن قوسىمشا جەر تەلىمدەرىن ەنگىزۋ بويىنشا جۇمىستار جۇرگىزىلۋدە.