بۇگىن، 1 جەلتوقسان كۇنى مۇنايلى اۋدانىنداعى ماڭعىستاۋ اۋىلىندا اۋداندىق ورتالىق ەمحاناعا جاڭا سانيتارلىق اۆتوكولىكتەردىڭ كىلتتەرى تابىستالدى. بۇل اۋىل تۇرعىندارىنا شۇعىل مەديسينالىق كومەك كورسەتۋدى جەتىلدىرۋ باعىتىنداعى ماڭىزدى قادام. شاراعا ماڭعىستاۋ وبلىسىنىڭ اكىمى نۇرداۋلەت قيلىباي، وبلىستىق ءماسليحات ءتوراعاسى، دەنساۋلىق ساقتاۋ سالاسىنىڭ وكىلدەرى مەن ارداگەرلەرى قاتىستى.

جالپى سانى 18 سانيتارلىق اۆتوكولىك اۋداندىق جانە قالالىق ەمحانالار مەن اۋرۋحانالارعا ۇلەستىرىلدى. جاڭا سانيتارلىق كولىكتەر Haval M6 بازاسىندا جاساقتالعان. ولار پاسيەنتتەرگە العاشقى كومەك كورسەتۋگە، سونداي-اق ناۋقاستاردى مەديسينالىق مەكەمەلەرگە جەتكىزۋگە ارنالعان. كولىك ءبىر مەزەتتە 3 ادامدى (وتىرىپ) جانە 1 پاسيەنتتى (جاتىپ) تاسىمالداۋعا مۇمكىندىك بەرەدى. جارىق-دىبىستىق جۇيە، كاتالكا، مەديسينالىق شكاف جانە قاجەتتى جابدىقتارمەن تولىق جاراقتاندىرىلعان.

ءوز سوزىندە وبلىس اكىمى جاڭا كولىكتەردىڭ ءموبيلدى توپتاردىڭ جۇمىسىن جەڭىلدەتىپ، اۋىل-ايماقتا كورسەتىلەتىن مەديسينالىق قىزمەتتىڭ ساپاسىن ارتتىراتىنىن اتاپ ءوتتى.

«مەملەكەت باسشىسى قاسىم-جومارت كەمەل ۇلى توقايەۆ جولداۋلارىندا اتاپ وتكەندەي، حالىق دەنساۋلىعىن قورعاۋ – مەملەكەتتىڭ باستى باسىمدىقتارىنىڭ ءبىرى. وسى تاپسىرمالاردى ورىنداۋ ماقساتىندا وڭىردە مەديسينالىق قىزمەتتىڭ قولجەتىمدىلىگى مەن ساپاسىن ارتتىرۋ باعىتىنداعى جۇمىستار جۇيەلى تۇردە جۇرگىزىلىپ كەلەدى. مەديسينا قىزمەتكەرلەرىنىڭ ەڭبەگى – ادام ءومىرىنىڭ قاۋىپسىزدىگى مەن قوعام يگىلىگىنىڭ كەپىلى. بۇگىن تابىستالىپ وتىرعان اۆتوكولىكتەر سىزدەردىڭ جۇمىستارىڭىزدىڭ ونىمدىلىگىن ارتتىرىپ، تۇرعىندارعا كورسەتىلەتىن قىزمەت ساپاسىن جاڭا دەڭگەيگە كوتەرۋگە ىقپال ەتەدى دەپ سەنەمىن»، – دەدى نۇرداۋلەت قيلىباي.

ايرىقشا اتاپ وتەرلىگى، اۋدان اۋماعىنا ءدال وسىنداي زاماناۋي سانيتارلىق كولىكتەر العاش رەت ءبولىنىپ وتىر. بۇل اۋىل حالقىنا كورسەتىلەتىن مەديسينالىق كومەككە، شۇعىل شاقىرتۋعا شىعاتىن بريگادالاردىڭ جەدەلدىگىنە، شالعاي ەلدى مەكەندەردىڭ ينفراقۇرىلىمدىق قاجەتتىلىكتەرىن شەشۋگە جاڭا سەرپىن بەرەدى.

سوڭعى جىلدارى وبلىستا مەديسينا مەكەمەلەرىنىڭ ماتەريالدىق-تەحنيكالىق بازاسى كەزەڭ-كەزەڭىمەن جاڭارتىلىپ، جاڭا دەنساۋلىق ساقتاۋ نىساندارى ىسكە قوسىلىپ، كۇردەلى جوندەۋ جانە زاماناۋي قۇرىلعىلارمەن قامتۋ جۇمىستارى قارقىن العان. بۇگىنگى كولىك تابىستاۋ ءراسىمى سول جۇيەلى جۇمىستاردىڭ حالىق دەنساۋلىعىن نىعايتۋ جانە مەديسينالىق كومەكتى جەتىلدىرۋ باعىتىنا ناقتى باعىتتالعان ناتيجەسىنىڭ ءبىرى.

جاڭا سانيتارلىق اۆتوكولىكتەر ەندى تۇرعىندارعا ۋاقتىلى كومەك كورسەتۋگە، شۇعىل مەديسينى قىزمەتتىڭ تيىمدىلىگىن ارتتىرۋعا جانە اۋىل حالقىنىڭ دەنساۋلىعىن جاقسارتۋ ىسىنە قىزمەت ەتەتىن بولادى.

ماڭعىستاۋ وبلىسى اكىمىنىڭ باسپا ءسوز قىزمەتى